2 TIMOTEO 2

1E'yo 'dirisi mi'i, mva mani la, mi ma ovᴜ okporᴜ 'yeta anzutiri ovᴜpi Kristo Yesu ma aliarisi, 2azini e'yo mini erile ma vᴜ 'ba e'yo eti nzepi kakaᴜ 'diyi ma miliari, mi ma fe tani mbazᴜ 'ba asi ada be ecopi 'ba azini imbapi indi 'diyi dri. 3Mi ma a'i candi isuzᴜ ma be ekile asikari onyirᴜ Kristo Yesunirile. 4Te asikari mupi ombaa 'bo 'diyi ma alᴜni ngani i eci adriza nyaku 'doriniri be kᴜ, eri ma fe ani ayiko 'ba eri sipi asikarirᴜri dri beni. 5Te 'ba azini ka o'bi avita ma alia, eri ngani ekilaza isu kᴜ ka nzᴜ azita nderini lelerile kᴜria. 6'Ba i ecandipi amvu ma azisiri ma e'do afa kazaniri nyazᴜ okoni. 7Mi ma dro asisile mini e'yo mani 'yoleri ma dria, te Opini nga e'yo vaza fe mi dri e'yo dria ma alia. 8Mi ma ega Yesu Kristo, Daudi ma orirᴜ, engapi 'ba draza ma eselia 'bori ma e'yo, ekile e'yo barᴜ mani olᴜlerile; 9e'yo barᴜ 'dirisi ma ovᴜ ecandizarᴜ kpere mani ovᴜzᴜ ombezarᴜ ekile 'ba onzi 'yepirile. Te e'yo Munguniri ovᴜni ombezarᴜ kᴜ. 10E'yo 'dirisi ma a'i candi 'diyi dria asi tezasi 'ba Munguni opele 'diyi ma e'yosi, 'dini yi indi ma isu pata ovᴜpi diza 'dani 'daniri be ovᴜpi Kristo Yesu ma aliari. 11Te e'yo 'yoza 'diri ovᴜ adarᴜ, kini : Ama ka dra eri be, ama nga ovᴜ idrirᴜ eri be indi; 12ama ka candi a'i asi teza be, ama nga opi nya eri be indi; ama ka eri ga si, eri'i eri nga ama ga si indi; 13ama ka ovᴜ a'ita kokorᴜ, eri'i eri ovᴜ asi ada be 'dani— te eri econi i ma ngᴜlᴜpi gazarᴜ kᴜ. 14Mi fe yi ma ega e'yo 'diyi, mi ma azi e'yoni yi dri Opi ma milia, yi ma ga agata e'yo 'yoza toko toko 'diyisi kᴜ, 'di orodri kokorᴜ, eri lᴜ 'ba eripi 'diyi eza eza. 15Mima'ba mi asi mi ngᴜlᴜpi ecezᴜ Mungu dri 'ba Munguni a'ile rarirᴜ, 'ba azi ngapi drinzani ngazᴜ ani eri bizᴜ kᴜ, e'yo adaniri ma esele awapi kililirᴜrili'i. 16Te mi ma kᴜ e'yo 'yoza toko toko inzita kokorᴜ 'diyi ja, te yi nga aga tᴜ e'yo alatarakokorᴜri alia, 17e'yo yini nga anya ekile bele gbogborᴜ-rile. Humenaya pi Fileto be ovᴜ 'ba 'diyi ma eselia; 18'ba 'diyi yi eza ra, yi gbi e'yo adarᴜri rwa, yini 'yole kini engata 'ba draza ma eseliari 'ye i 'borisi. Yi 'ba azini ma a'ita asᴜ va. 19Te jo eti Munguniri so pa okporᴜ 'dani, eceta 'diri ovᴜ ekpazarᴜ ruania ci, kini: Opi ni 'ba ini 'diyi ra, azini 'Ba dria ru Opini omvepi 'diyi ma kᴜ e'yo onzi ja. 20Jo amborᴜ ma alia imvᴜ ovᴜni lᴜ edele melesi azini dahabusi 'diyi a'dule kᴜ, te edele patisi azini sile odrisi 'diyi yi indi ; azini 'diyi ma azi inzitarᴜ, azini 'diyi ma azi inzita kokorᴜ. 21'Ba azini ka i ngᴜlᴜpi 'ba alarᴜ e'yo 'diyi kᴜzᴜ, eri nga ovᴜ imvᴜ azi inzitarᴜrini, 'bazarᴜ alatararᴜ, dri fupi onyirᴜ opi ma azisi, ovᴜpi ngonde azi onyirᴜ 'diyisi driari. 22Te mi ma apa li 'baza ndᴜ ndᴜ karilaᴜni 'diyisi ra, mi bi e'yo kililirᴜri pi ma vᴜti, a'ita pie, leta avasiri pie, asi anzurᴜ pie, 'ba Opi ma ru omvepi asi alarᴜsi 'diyi be tualᴜ. 23Te mi ma ga zita zile azazarᴜ azini ondᴜa kokorᴜ 'diyi si, mini nile yi nga omba ejinirisi. 24Te ati'bo Opiniri ma 'ba omba kᴜ, te eri ma ovᴜ e'yere 'ba dria vᴜ, eco erini ani 'ba imbazarᴜ beni, ovᴜzᴜ asi teza be candi ma alia, 25'ba i ma dri arᴜpi 'diyi imbazᴜ asi e'yeresi. Kani Munguni nga asi ojaza fe yi dri e'yo adani nizᴜ ra yani, 26yi ma isu ani egata o'dirᴜ, yini efᴜzᴜ emba 'ba asᴜ sᴜpirini ma aliasi, de yi ovᴜ obizarᴜ idrirᴜ eri dri ati'barᴜ e'yo erini leleri 'yezᴜ.

will be added

X\