2 TESALONIKIA 3

1E'yo acepiri 'di, adripi, emi ma zi Mungu ama dri, e'yo olᴜza Opini ma idri i ani drile drile mbele, ma ovᴜ inzizarᴜ ekile emi eseliarile, 2azini Mungu ma ari ama ani 'ba e'yo 'yepi saarᴜ 'diyi pi ma dria 'ba asi onzi be 'diyi pie; a'disikᴜ 'ba dria ovᴜni a'ita be kᴜ. 3Te Opini asi adarᴜ be, emi 'bazᴜ okporᴜ, emi agei tezᴜ 'ba onziri dri. 4Ama 'ba ama asi Opi ma dria e'yo eminisi 'bo, nizᴜ kini emi e'yo amani azile emi tia 'diyi 'ye, azini emi nga yi 'ye 'dani. 5Opi ma ce asi emini ma dri kililirᴜ leta emini Mungu lezᴜri ma alia, cazᴜ asi teza Kristoniri vᴜ. 6Ama azi di emi tia, adripi, Opi amani Yesu Kristo ma rᴜsi, kini emi ma ona emi adripi dria alᴜ alᴜ acipi saarᴜ, e'yo amani idrile emi vᴜ emini a'ile 'diyi ma vᴜti bipi kᴜ 'diyisi. 7Emi ma ngᴜlᴜpi ni geri onyirᴜ emini te ngazᴜ ovᴜzᴜ amaleri; a'disikᴜ ama acini ndra emi eselia saarᴜ kᴜ, 8te ama nyani 'ba azini ma nyaka tokorᴜ alᴜni kᴜ, te ama inza ama azi okporᴜsi azi ngazᴜ ini be etu be, e'yo amani ma fe 'ba alᴜni emi eseliarini andezᴜ kᴜ. 9Ovᴜni kini ama ovᴜni okpo be 'yezᴜ 'dinile kᴜ, 'dinini kᴜ, te ama le ama ma ngᴜlᴜpi 'bazᴜ ecetarᴜ emi dri, emini ani 'yezᴜ amani 'yelerile beni. 10Amani ndra nga ovᴜria emi be indi, ama azi e'yo 'diri emi tia, kini: Agu ka le azi nga kᴜ, ma nya nyaka kᴜ indi. 11Ama eri kini 'ba azini emi eselia acipi saarᴜ 'diyi indi, te yi ovᴜoᴜrᴜ, ngani azi alᴜni kᴜ, te yi ri e'yo osᴜ 'ba ma eselia. 12Te ama e'yo azi 'ba 'dinile 'diyi ma tia, matᴜ 'bazᴜ yi vᴜ Opi Yesu Kristo ma alia, yi ma nga azi asi e'yeresi, yi ma nya nyaka yi ma ngᴜlᴜpiniri’i. 13Te adripi, emi ma ande e'yo 'yeza onyirisi kᴜ. 14'Ba azini ka e'yo amani 'yole waraga 'diri ma aliari eri kᴜ, emi ma ovᴜ mile be agu nderisi, emi eci emi eri be kᴜ, eri ma ovᴜ ani drinzasi beni. 15Te emi ma 'ba eri ari'borᴜ 'dini kᴜ, emi ma imba eri adripile. 16Curu'do Opi asi anzurᴜiniri ma ngᴜlᴜpi ma fe asi anzurᴜ emi dri o'du dria geri driasi. Opi ma ovᴜ emi be dria. 17Mai Paulo, ma si zita emi zizᴜ ci ci 'diri ma drisi ma'i. 'Di eceta mani sile waraga mani 'diyi ma alia driari; ma adri si 'dini. 18'Yeta anzutiri Opi amani Yesu Kristoniri ma ovᴜ emi be dria.

will be added

X\