2 PETERO 3

1Ba mani lele 'diyi, 'diri bani waraga mani sile emi vᴜ iriri'i, te yi ma alia iri tro ma fe asisile emini alarᴜrini engazᴜ e'yo egazᴜ dika; 2emi ma ega e'yo nabi alatararᴜ 'diyini ondrile drio 'diyi pi, azita Opi 'Ba 'ba Papirini fele geri 'ba ti opele emini 'diyi vᴜrisiri be. 3Te emi ma ni e'yo 'diri okorisi, kini, ewu tini asizᴜrisi 'ba e'yo onzopi 'diyi yi nga eca e'yo onzozᴜ, acizᴜ li yini ma vᴜtia, 4'yozᴜ kini, E'yo aziza azile emviza erinisiri ngoa ya? Te engazᴜ ewu ama a'bipini o'du kozᴜria kpere curu’do, afa dria adri ekile yini adrile engazᴜ nyaku eti 'bazᴜriarile. 5Te yi ma dri avi e'yo 'dirisi aka, kini, 'bu pi ovᴜ indi e'yo 'yoza Mungunisi andra drio, nyaku efᴜpi miri ma alia i okᴜpi miri ma aliari be; 6e'yo nde 'diyisi wudrikuru ewu 'dasiri ja ndra dri ra, yini tile driniarisi. 7Te 'bu curu'dori pi nyaku be, yi ovᴜ ta mbazarᴜ aci tezᴜ e'yo 'yoza ndesi, kpere cazᴜ o'du Munguni e'yo lizᴜ azini 'ba Mungu rᴜpi kᴜ 'diyi ma dri jazᴜria. 8Te 'ba mani lele 'diyi, e'yo alᴜ 'diri ma avi emi dri kᴜ, kini, o'du alᴜ ovᴜ Opi dri ekile eli alifᴜ alᴜle, te eli alifᴜ alᴜ 'diyi ovᴜ ekile o'du alᴜle. 9Opi icini i dri e'yo aziza erinisi, 'ba azi 'diyini dri iciza egalerile kᴜ, te eri ma asi te emisi te te, erini lele 'ba alᴜni ma ja dri kᴜ, te 'ba dria ma oja yi asi rarisi. 10Te o'du Opini nga eca oguoᴜni ecalerile, te o'du ndesi 'buni nga dri ja noza amborᴜ be, te afa dria yi nga aka acisi, te nyaku pi afa 'yele alenia 'diyi be nga ovᴜ vezarᴜ teketeke ra. 11Afa 'diyi dria ka nga ovᴜ dri jazarᴜ 'dinile, emi ma ovᴜ di ani 'ba ngonirᴜ ka ya? Emi ma ovᴜ adriza alatararᴜ be Mungu inzizᴜ, 12o'du Mungunirini ecazᴜri ma mile gazᴜ, lezᴜ avasi eri ma eca mbelerᴜ. O'du nde 'dirisi 'buni nga ti ko ve ra, nga aka ra, te afa dria yi nga ra acini yi velerisi! 13Te ama'i, ama 'bu o'dirᴜ pi ma mile ga nyaku o'dirᴜ be, pari e'yo kililirᴜrini ovᴜzᴜ alenia, erini azileri'i. 14E'yo 'disi, 'ba mani lele 'diyi, emini e'yo 'diyi ma mile garia, emi ma 'ye asi driasi eri ma isu emi asi anzurᴜ be, ondi kokorᴜ, azini drinza kokorᴜ. 15Te emi ega kini asi teza Opi amanirini eri patani; ekile Paulo adripi amani lelerini sile emi vᴜ, ondᴜa ovᴜpi fezarᴜ eri dririsirile. 16Eri 'yo e'yo e'yo 'diyi ma dria waraga erini ma alia dria. Te e'yo azini waraga nde ma alia yi ewarᴜ nizᴜ ; 'ba e'yo nipi kᴜ 'diyi pi oja e'yo nde onzi, 'ba pa sopi okporᴜ kᴜ 'diyi be, ekile yini e'yo siza azini ojale onzi yi ma ngᴜlᴜpi dri jazᴜrile. 17E'yo 'disi, emi 'ba mani lele 'diyi, emini e'yo 'diri nile driorisi, emi ma te emi agei, abaza 'ba azi onzi 'yepi 'diyini kazᴜ emi sezᴜ e'dezᴜ, emini ani pa soza emini okporᴜri kᴜzᴜ kᴜ. 18Te emi ma zo 'yeta anzutiri Opi amani Yesu Kristo ama Papiriniri pisi nita erini be. Diza ma ovᴜ eri vᴜ curu'do azini 'dani 'dani. Amena.

will be added

X\