2 KORINTOA 6

1'Dini amani azi ngaria eri be tualᴜ, ama matᴜ 'ba emi vᴜ kini emi ma a'i 'yeta anziutiri Munguni tokorᴜ kᴜ. 2Te eri ‘yora, Ma eri mi etu 'yekerisi, ma ko mi aza o'du patinirisi ra. Mi lu, etu 'yekeri 'di; mi lu, o'du pataniri 'di. 3Ama 'bani afa kᴜ-mᴜrᴜ 'ba ma geria e'yo alᴜni ma alia kᴜ, 'ba kazᴜ asᴜ sᴜzᴜ ama ruaa azi amani ma e'yosi kᴜ, 4te e'yo dria ma alia ama ece ama onyirᴜ, 'ba azi Munguni ma aza kopi 'diyile : ovᴜzᴜ asi teza be tᴜ, inzata piyi ma alia, ocoko pie, pari ewarᴜ 'diyi pie, 5cota pie, lazᴜ arurᴜri pie, otreŋa ombasiri pie, azi okporᴜ 'diyi pie, ovᴜzᴜ o'du koza kokorᴜ ini be rrari pie, ovᴜzᴜ abirisiri pie; 6e'yo alatararᴜri pisi, nita pie, asi teza e'yereri pie, asi onyirᴜ pie, Orindi Alatararᴜri pie, leta lokiri kokorᴜri pie, 7e'yo adarᴜri pie, okpo Munguni pie ; afa ombani e'yo kililirᴜrini 'diyi 'duzᴜ dri ndiria azini dri ejiria ; 8'ba ka ama inzi ra kani ka drinza fe, ka ama ru 'yo onzi kani onyirᴜ ti. Yi ama o'da ekile 'ba 'ba icipi 'diyile, de ama 'ba adani; 9ekile 'ba nile kᴜ 'diyile, de 'ba ni ama tᴜ; ekile 'ba drapi dra 'diyile, te mi lu, ama de idrirᴜ; ekile 'ba cole co imbatasi 'diyile, te lini dra ama dria kᴜ; 10ekile 'ba candi be 'diyile, de ama ayiko be o'du driasi; ekile'ba aliorᴜle, te lonyi fezᴜ 'ba kakaᴜ dri ; ekile 'ba afa kokorᴜle, de ama afa dria ma e'ipini. 11Ama zi tile amani mgborᴜ e'yo 'yozᴜ emi tia, emi 'ba Korintoa 'diyi la; asi amani ovᴜ walarᴜ. 12Emi isuni pari wererᴜ dri fupi kᴜri ama asia kᴜ, te emi isu pari wererᴜri bani ava emi ngᴜlᴜpi ma asiari ma alia. 13Curu'do emi ma ofe arotini tro tro—ma 'yo emi tia ekile anzi ma tiarile—emi ma zi vini emi asi walarᴜ indi fo! 14Emi ma eci emi ovᴜzᴜ 'ba a'ipi kᴜ 'diyi ma azirᴜ kᴜ. Te onyi pi i emᴜ tualᴜ onzi be ngoni ngoni ya? Diza pi i eci ini be ngoni ngoni ya? 15Kristo pi Beliali be yi e'yo a'i alᴜ ngoni ngoni ya? 'Ba a'ipiri ma esele ovᴜ 'ba a'ipi kᴜri be tualᴜ ngoni ngoni ya? 16Hekalu Munguni pi i eci wura inzile inzi 'diyi be ngoni ngoni ya? A'disikᴜ ama ovᴜ hekalu Mungu idrirᴜrini; ekile Munguni 'yolerile, Ma nga ovᴜ yi ma alia, azini ma nga aci yi ma eselia, ma nga ovᴜ Mungu yini, yi nga ovᴜ 'ba mani. 17E'yo 'dirisi emi efᴜ yi eseliasi, emi co emi esele yi be re, Opi ‘yora, emi ma elo afa alatara kokorᴜri kᴜ; te ma nga emi a'i ra, 18ma nga ovᴜ emi ma Atarᴜ, emi nga ovᴜ ma anzipirᴜ azini ma ezopirᴜ, Opi Okpo dria beri 'yo ra.

will be added

X\