2 KORINTOA 4

1E'yo 'dirisi amani ovᴜria azi ngaza 'diri be, ekile amani yiki isulerile, ama andeni kᴜ. 2Te ama ga e'yo drinzarᴜ zizarᴜ 'diyi si, ama acini lokirisi kᴜ, ama ojani e'yo Munguni inzo be kᴜ; te amani e'yo adarᴜ ecelerisi, ama ama e'da onyirᴜ asisile 'ba driani vᴜ Mungu ma milia. 3Te e'yo barᴜ amaniri ka ovᴜ a'bᴜ-zarᴜ, eri ovᴜ a'bᴜzarᴜ 'ba dri japi 'diyi dri. 4'Ba 'diyisi adroᴜ nyaku 'dirini ofu 'ba a'ipi kᴜ 'diyi ma asisile ma mile efi ra, angᴜ 'iza diza Kristo ovᴜpi wura Munguniri ma e'yo barᴜniri kazᴜ dizᴜ yi vᴜ kᴜ beni. 5Te ama olᴜni ama ngᴜlᴜpi ma e'yo kᴜ, te Kristo Yesu ma e'yo'i, kini eri Opi'i, azini ama'i ama ati'ba emini Yesu ma e'yosi. 6A'disikᴜ Mungu 'yopi, Diza ma di ini alia-ri di asi amani alia 'bo, nita diza Munguni ovᴜpi Yesu Kristo ma miliariniri ma angᴜ 'iza fezᴜ. 7Te ama ovᴜ afa aje amborᴜ 'diri be imvᴜ sile odrisi 'diyi ma alia, okpo agapi tᴜri ma ovᴜ ani Munguni, te amaniri'i kᴜ. 8Inza ama e'yo driasi, te ombeni ama kᴜ ; fe ama dri asi otiza ra, te asi amani fᴜni kᴜ; 9dro ama vᴜti okposi ra, te kᴜni ama ari'ba dri kᴜ; o'be ama va nyakua, te jani ama dri kᴜ; 10o'du vᴜsi dria ama fuza yini Yesuni fuzᴜ kairi oji ama ruaa, idri Yesuni ma e'da i ani ama ruaa indi. 11A'disikᴜ ama'i ovᴜpi idrirᴜ 'diyi ovᴜ fezarᴜ o'du dria drata vᴜ Yesu ma e'yosi, idri Yesuni ma e'da i ani rua draza amani ma alia indi beni. 12'Dini drani azi nga okposi ama alia, te idrini emi alia. 13Te amani ovᴜria orindi a'itani 'diri be, ekile e'yoni ovᴜle sizarᴜ kini, Ma a'i ra, ma 'yo anirile, ama alᴜ indi ama a'i ra, ama 'yo ani 'di, 14amani niria eri'i Opi Yesuni engapiri nga ama enga indi Yesu be, azini nga ama e'da emi be eri ma milia. 15E'yo dria ovᴜ emisi, 'yeta anzutiri ezᴜpi tre 'ba kakaᴜ ma e'yosiri ma 'ba ani awa'difo fezani i erezᴜ tᴜ diza fezᴜ Mungu dri. 16E'yo 'dirisi ama andeni kᴜ, te agu amani amveri ka 'ye dra dra ti, agu amani alealerᴜri ovᴜ 'bazarᴜ o'dirᴜ o'dirᴜ o'du dria. 17Te inzata amani nzipi kᴜ ovᴜpi o'du werea a'duleri eri ama dri diza nzipi tᴜ 'dani 'dani agapi drile drileri 'ye'i, 18amani afa ndrele ra 'diyi luria kᴜ, te afa ndrele kᴜ 'diyi; a'disikᴜ afa ndrele ra 'diyi yi ovᴜ etu 'disi a'dule, te afa ndrele kᴜ 'diyi yi ovᴜ 'dani 'dani.

will be added

X\