2 KORINTOA 2

1Te ma ede 'diri ma asia, ma ngani eca emi vᴜ candi be dika kᴜ. 2'Dini ma ka candi fe emi dri, a'dini ayiko fe ma drini ya? Eri 'ba candi isupi ma driari'i kᴜ ya? 3Ma si ndra e'yo 'diri 'dinile, mani emuria emi vᴜ ma kazᴜ candi isuzᴜ emi vᴜ kᴜ, de onyirᴜni emini ayiko fezᴜ ma dri ; ma ovᴜ a'ita be emi dria vᴜ kini ayiko mani eri ayiko emi driani indi. 4'Dini mani ndra ovᴜria inzata kakaᴜ ma alia azini asi lizasi, ma si ndra e'yo emi vᴜ mindre be tᴜ, candi fezᴜ emi dri kᴜ, te fezᴜ emini leta mani avasi agapi tᴜ emi vᴜri nizᴜ. 5Te 'ba azini ka ndra candi fe ra, feni ndra ma dri kᴜ—te ma leni 'yo okposi kᴜ 'bo—eri fe candi were were emi dri dria. 6Panga onzi 'ba kakaᴜni fele 'ba 'dinile 'diri driri fu dri eri dri ra; 7'dini kani bani onyirᴜni emi ma kᴜ onzi erini, eri asi omizᴜ, 'ba 'dinile 'diri kazᴜ abazᴜ candi agapiri ma alia kᴜ. 8E'yo 'dirisi ma matᴜ 'ba emi vᴜ emi ma ece ale adarᴜri eri vᴜ'i. 9Te ma si ndra waraga e'yo 'dirisi, emi o'bizᴜ, kani emi ovᴜ e'yo eriza be e'yo dria ma alia yani. 10Te 'ba ngoni ngo emini eri ma onzi kᴜzᴜri, ma kᴜ alᴜ indi. 'Dini 'ba azini ma onzi mani kᴜle 'bori, ma ka eri kᴜ ra, ma eri kᴜ e'yo eminisi Kristo ma milia, 11'dini Satani kazᴜ ama ndezᴜ lokiri inisi kᴜ; a'disikᴜ amani e'yo otᴜza erini inzorᴜ 'diyi nile rarisi. 12Te ma ka ndra ca Troaa e'yo barᴜ Kristonisi, azini jotile ka ovᴜ zizarᴜ ma dri Opi ma alia ra ti, 13ma asi ambini kᴜ mani ma adripi Titoni isule kᴜrisi. Te mani yi kᴜria, ma fᴜ mu Makedoniaa. 14Te awa'difo Mungu vᴜ, erini ama dri cele etuzu ari'ba agazᴜ ari pezᴜ Kristo ma aliarisi, erini nita iniri ma aji ecele pari dri dria amasirisi. 15'Dini ama ovᴜ Kristo ma aji arikarirᴜri Mungu vᴜ, 'ba yi opapi ra 'diyi pi ma eselia 'ba dri japi 'diyi be; 16'ba azini 'diyi dri ama aji dratanirirᴜ cazᴜ drata vᴜ, 'ba azini 'diyi dri ama aji idrinirirᴜ cazᴜ idri vᴜ. A'di eco e'yo 'diyisini ya? 17'Dini ama ovᴜni 'ba e'yo Munguni ezapi lokirisi ekile 'ba kakaᴜ 'diyile kᴜ; te asi adarᴜsi, ekile 'ba Munguni 'diyile, Mungu ma milia ama e'yo olᴜ Kristo alia.

will be added

X\