2 KORINTOA 12

1Ma ma enya ma ra, ka 'ba si 'yezarᴜ 'dini kᴜ ti; te ma nga ca afa ndreza piyi ma e'yo 'yozᴜ eceta Opini be. 2Ma ni 'ba azini Kristo alia, vᴜtinia eli mᴜdri drini su aga curu'do 'bo, 'du 'ba 'diri, ji pi kpere 'bu nari alia—kani rua be yani, ma nini kᴜ, kani rua kokorᴜ yani, ma nini kᴜ, Mungu ni ra. 3Azini ma ni 'ba 'dinile 'diri—kani rᴜa be yani, kani rua kokorᴜ yani, ma nini kᴜ; Mungu ni ra— 4'du eri ji pi Paradisia, azini eri eri e'yo 'bani ecole 'yozarᴜ kᴜ, ovᴜpi azizarᴜ 'ba ma 'yo kᴜ 'diyi. 5Ma nga ma enya 'ba 'dinileri ma e'yosi ra, te ma ngani ma enya ma ngᴜlᴜpi ma e'yosi kᴜ, pe lᴜ okpoako mani ma e'yosi a'dule. 6Te ma ka le ma enya ra ti, ma ngani ovᴜ azazarᴜ kᴜ, mani ngale e'yo adarᴜ 'yole'irisi. Te ma ovᴜ urisi, 'ba azini kazᴜ egazᴜ ma onyirᴜ aga e'yo erini ndrele ma alia kani erile ma vᴜri ra 'dini kᴜ. 7Te ma kazᴜ ovᴜzᴜ afᴜsi aga ra, eceta 'diyini ovᴜle amborᴜ tᴜrisi kᴜ, fe ma dri oci ruaari, 'di ojioᴜ Satanini ma cozᴜri, ma kazᴜ ovᴜzᴜ afᴜsi aga ra kᴜ. 8E'yo 'dirisi ma 'ba matᴜ Opi vᴜ pale na, oci nderi ma kᴜ ma ra; 9te eri 'yo ma tia, 'Yeta anzu-tiri maniri fu dri mi dri ra, a'disikᴜ okpo mani ca i paria 'yeke okpoako ma alia. E'yo 'disi ma bani nga ma enya okpoako mani ma e'yosi ayikosi aga ra, okpo Kristoni ma ovᴜ ma dria ma a'bᴜzᴜ ani beni. 10E'yo 'dirisi ma a'i okpoako pi ayikosi, egaŋa yini ma 'yezᴜ onziri pie, e'yo ewarᴜ 'diyi pie, inzata pie, candi pie, e'yo Kristonisi; a'disikᴜ ma ka ovᴜ okpo kokorᴜ, isu de ma okpo be. 11Ma eca azazarᴜ 'bo! Te emi omi ma emi'i, de isu onyironi emi ndra ma inzi ra. A'disikᴜ ma ovᴜni 'ba ti opele ambo agapi tᴜ tᴜ 'diyi ma vᴜtialerᴜ alᴜni kᴜ, ma ka tro ovᴜ 'ba tokoniti. 12Te eceta 'ba ti opelerini 'ye yi ndra emi eselia asi teza dria be, eceta piyisi, tali pie, tali okporᴜ 'diyi pie. 13E'yo emi 'bapi kanisa azini ma vᴜtialerᴜri ngori ya? Eri kiri mani ma 'bazᴜ emi dri nzizarᴜ kᴜri'i kᴜ ya? Emi kᴜ onzi mani 'diri! 14Mi lu, 'di pale na mani ovᴜzᴜ ngonde muzᴜ emi vᴜri. Te ma ngani ovᴜ nzizarᴜ emi dri kᴜ, a'disikᴜ ma ndruni afa emini kᴜ, te emi'i ; te le anzi ma mba afa ma ta 'ba yi tipi 'diyi dri kᴜ, te bani 'ba yi tipi 'diyi yi ma mba afa ma ta anzi drini. 15'Dini ma nga di ma afa fe ayikosi tᴜ, azini vini ma ngᴜlᴜpi fe teketeke indi, orindi emini ma e'yosi. Leta maniri ka zo drile aga ra, leta eminiri anu anu ya? 16Ma ovᴜ di 'dini, ma 'bani ma nzizarᴜ emi dri kᴜ 'bo, te mani ovᴜria ondᴜa onzi be ma bi emi lokirisi. 17Ma nya afa emini onzi 'ba mani tini opele emi vᴜ 'diyi ma azisi ra ya? 18Ma azi ndra Titoni, azini ma pe adripi nderi ma ti muzᴜ eri be. Tito nya emi afa onzi ra ya? Ama acini orindi alᴜsi kᴜ ya? Azini pamvᴜ alᴜsi kᴜ ya? 19Emi ega ecazᴜ kpere curᴜ'do ama e'yo amaniri ma eti nze emi tia, e'yo ama driari trᴜzᴜ ya? Mungu ma milia ama 'yo Kristo alia, te 'ba mani lele 'diyi la, ama e'yo dria 'yo emi sizᴜ urᴜ. 20Te ma rᴜ kani mani muria ma ngani emi isu mani lelerile kᴜ, azini emi ngani vini ma isu ekile emini lelerile kᴜ yani ; awata pi kazᴜ ovᴜzᴜ indi, ma'yala pie, adra pie, agata gaza pie, ajidimara pie, ru ndroza pie, afᴜ 'bani yi ipizᴜri pie, awata saarᴜri pie kᴜ. 21Ma ovᴜ urisi mani muria dika Mungu mani kazᴜ ma omvizᴜ ele emi milia kᴜ, ma kazᴜ 'ba kakaᴜ ezapi 'bo 'diyi ma azi owᴜzᴜ kᴜ, yi asi ojapi kᴜ e'yo alatara kokorᴜri kᴜpi, ali 'baza pie, mile aci yini 'yeleri pie kᴜ 'diyi.

will be added

X\