2 KORINTOA 11

1Ma le te emi ma te nga asi e'yo mani azaniri erizᴜ were. Emi te nga emi asi mani fo! 2'Dini ma ovᴜ ma'yalasi emisi ma'yala Mungunirisi, te ma azi emi fezᴜ agupi alᴜ dri, mani ani emi ejizᴜ Kristo vᴜ aliria alarᴜrile. 3Te ma ovᴜ urisi, ekile urini Evani icile lokiri onzi erinisirile, asisile emini kazᴜ yi ezazᴜ e'yo adarᴜ azini e'yo alarᴜ ovᴜpi Kristo ma aliari kᴜzᴜ kᴜ. 4A'disikᴜ 'ba azini ka eca, ka Yesu ndᴜ amani olᴜle kᴜri olᴜ'i, kani emi a'i orindi ndᴜ ndra emini a'ile kᴜri, kani e'yo barᴜ ndᴜ ndra emini a'ile kᴜri, emi adri emi asi te onyirᴜ. 5Te ma ega ma ovᴜni 'ba ti opele ambo agapi tᴜ tᴜ 'diyi ma vᴜtialerᴜ alᴜni kᴜ. 6Te ma ka dri fu e'yo olᴜzasi were ti, te nitasini ma 'dini yo; ama ece e'yo 'diri e'yo driasi emi vᴜ, 'ba dria ma eselia. 7Ma 'ye ndra onzi mani ma ngᴜlᴜpi 'baria wererᴜ, emini ani ovᴜzᴜ amborᴜ, mani e'yo barᴜ Munguni olᴜle emi tia tokorisi ya? 8Ma opa ndra kanisa azini 'diyi ma afa, oya a'izᴜ, azi mani 'yele emi dririsi. 9Te mani ovᴜria emi eselia azini ovᴜria afa kokorᴜ ti, ma ovᴜni nzizarᴜ 'ba alᴜni dri kᴜ, te adripi engapi Makedoniaa 'diyi fe ndra afa ovᴜpi ma be yo 'diyini. E'yo driasi ma mba ndra ma ta ma kazᴜ ovᴜzᴜ nzizarᴜ emi dri kᴜ, azini ma nga ma ta mba 'dini 'dani. 10Ekile e'yo adarᴜ Kristonirini ovᴜle ma aliarile, 'ba alᴜni ngani enyaza mani ma enyazᴜ 'diri oga ma dri angᴜ Aka-yaaria kᴜ. 11A'disi ya? Mani emi lele kᴜrisi ya? Mungu ni ra! 12Te e'yo mani 'yeleri ma nga 'ye 'dani, ma ma oga ani geri 'ba geri ndapi yi e'dazᴜ trotro ekile amale, e'yo yini yi enyazᴜri ma alia 'diyi dri beni. 13Te 'ba 'dinile 'diyi ovᴜ 'ba ti opele inzorᴜ, 'ba azi ngapi lokirisi, 'ba yi e'dapi inzosi ovᴜzᴜ 'ba Kristoni ti opele 'diyirᴜ 'diyi. 14Te 'di ovᴜni e'yo osutarᴜni kᴜ, a'disikᴜ Satani ma ngᴜlᴜpini adri i e'da inzosi malaika dizanirirᴜ. 15E'yo 'dirisi eri ovᴜni e'yo amboni kᴜ 'ba azi ngapi eri dri 'diyi ka yi e'da inzosi 'ba onyi ma azi ngapi 'diyirᴜ. Te asiza yiniri nga ovᴜ azi yinile. 16Ma 'yo dika, 'Ba alᴜni ma ega kini ma azaza 'dini kᴜ; te emi ka ega 'dini ti, emi a'i di ma 'ba azazarᴜle, 'dini ma nga ani ma enya were beni. 17(E'yo mani 'yoleri ma 'yoni Opini azilerisi kᴜ, te ekile mani azale azarile, mani ma asi 'baria ceni ma enyazᴜ 'dini 'di; 18'ba kakaᴜni yi enyale e'yo ruanisirisi, ma'i ma nga vini ma enya indi.) 19A'disikᴜ emi adri emi asi te 'ba azazarᴜ 'diyi vᴜ ayikosi, emini ovᴜle ondᴜa berisi! 20A'disikᴜ emi adri emi asi te 'ba azini ka emi 'ba ati'barᴜ, ka emi afa onya, ka emi obi, ka i ngᴜlᴜpi 'du 'ba uru, ka emi mile osa. 21Ma 'yo drinza fezᴜ, ekile ama ndra okpo kokorᴜle. Te 'ba azini ma asi ka ovᴜ okporᴜ —ma 'yo ekile azazarᴜle—ma asini vini alᴜ ovᴜ okporᴜ indi. 22Yi 'ba Ebraniani ya? Ma'i alᴜ indi. Yi 'ba Israelini ya? Ma'i alᴜ indi. Yi ori Iburahimuni ya? Ma'i alᴜ indi. 23Yi 'ba Kristo ma azi ngapi 'diyi ya? Ma 'yo ekile 'ba azazarᴜle—ma bani drile ; ma azi okporᴜ ma alia aga ra, arujo ma alia aga ra, cota ma alia aga ra, dra ma alia pale kakaᴜ. 24Pale towi, 'ba Yahudini co ma ninisi kali na drini oromi, kali na drini oromi. 25Pale na co ma kalisi; pale alᴜ o'be ma onisi. Pale na ogmu nyo i ma be ; ini rra, etu zu, ma ovᴜ yi alirᴜ ma alia 'dani; 26ma ovᴜ acita alia pale kakaᴜ, ma ovᴜ ndra dra sia ogogo yi ara ma alia, ma dra sia 'ba afa opapi 'diyi dri, ma dra sia ori'ba mani 'diyi dri, ma dra sia 'ba Jururᴜ 'diyi dri, ma dra sia aku amborᴜ ma alia, ma dra sia asea, ma dra sia miri alia, ma dra sia adripi inzorᴜ 'diyi dri; 27azi okporᴜ pisi rua suza be, ovᴜzᴜ o'du koza kokorᴜ pale kakaᴜ, abiri pisi yi avijo be, ovᴜzᴜ nyaka kokorᴜ pale kakaᴜ, egbe pisi ovᴜzᴜ pililirᴜri be. 28Candi amve 'diyi ma dria, candi i epapi ma asia o'du driari indi, eri asi otiza mani kanisa dria 'diyi ma e'yosiri'i. 29A'dini okpo kokorᴜni ya? Ma vini okpo kokorᴜ indi kᴜ ya? Yi fe a'dini abazᴜni ya? Ma asi veni ani indi kᴜ ya? 30Ka le ma ma enya ma, ma nga ma enya okpoako mani ma e'yosi. 31Mungu Opi Yesu ma Ati, ovᴜpi inzizarᴜ 'dani 'daniri, ni ra ma lini inzo kᴜ. 32Gavena Damasikiaa ovᴜpi opi Areta ma palaari te ndra aku Damasikiaari ma agei, lezᴜ ma bizᴜ, 33te yi esi ma va acalaka alia, derisa abi ma aliari ma talasi, 'dini ma pa ma eri dri ra.

will be added

X\