2 KORINTOA 1

1Paulo, 'ba ti pele Kristo Yesuni e'yo Munguni lelenirisiri, adripi Timoteo be, Kanisa Munguni ovᴜpi Korintoari pi vᴜ, 'ba alatararᴜ dria ovᴜpi Akaya dria ma alia 'diyi be: 2'Yeta anzutiri pi ma ovᴜ emi vᴜ asi anzurᴜ be engazᴜ Mungu Ata amani pi vᴜ Opi Yesu Kristo be. 3Awa'difo Mungu Opi amani Yesu Kristo ma Ati vᴜ, eri Ata yiki be azini Mungu asi omiza driani; 4eri ama asi omipi inzata amani ma alia driari, 'dini amani ecozᴜ 'ba dria ovᴜpi inzata ma alia 'diyi ma asi omizarᴜ, asi omiza nde Munguni ama ngᴜlᴜpi ma asi omizᴜrisi. 5Ekile candi Kristoni 'diyini gale ama ruaarile, 'dinile asi omiza amani ga tre Kristosi indi. 6Te yi ka ama inza ra, eri emini asi omiza pi isuzᴜ pata be ani; yi ka ama asi omi ra, eri emini asi omiza isuzᴜ ani, asi omiza nde emi 'bapi okporᴜ candi trotro amani isulerile 'diyi nyazᴜ asi tezasiri'i. 7Azini asi teza amani e'yo eminisiri eri pa so kiri kiri; amani niria kini ekile emini ti ecile ama be candi ma aliarile, 'dinile emi nga ti eci asi omiza ma alia indi. 8Te ama leni emi ma ovᴜ nita kokorᴜ kᴜ, adripi, inzata amani ecapi ama rᴜaa Asiari ma e'yosi ; te eri ovᴜ nzizarᴜ tᴜ, aga okpo amani ra, 'dini ama 'bani ama asi kini ama nga ama idri pa ra, 'dini kᴜ. 9Te ama'irᴜni, ama ovᴜ e'yo liza dratani be ama ngᴜlᴜpi ma dria, ama ma 'ba ani a'ita amani ama ma ngᴜlᴜpi ma dria kᴜ, te Mungu 'ba draza engapiri ma dria; 10eri ari ndra ama drata amborᴜ 'dapiri ma alia ra, eri nga vini ama ari ra; ama 'ba ama asi eri ma dria e'yo drileri ma e'yosi 'bo, kini eri nga ama ari 'dani. 11Emi indi ma ko ama aza Mungu ziza eminisi, 'ba kakaᴜ ma fe ani awa'difo Mungu dri ama ma e'yosi beni, afa feza ovᴜpi fezarᴜ ama dri 'ba kakaᴜni Mungu zilerisirisi. 12E'yo amani ama enyazᴜri 'di, e'yo eti nzeza nita ama asiarini nzeleri kini acita amani nyakua, azini tᴜni emi vᴜri, ovᴜ e'yo alatararᴜ ma alia azini asi lokiri kokorᴜ Mungu ma miliarisi, ondᴜa ruani ma alia kᴜ, te 'yeta anzutiri Munguni ma alia. 13Te ama sini e'yo andini emi dri kᴜ, te kiri e'yo emini ecole lale azini vale rari'i a'dule ; azini ma 'ba ma asi emi dria kini emi nga e'yoni va kpere asizaniria, 14ekile emini ama ma e'yo vale nga wererile, kini emi eco emi enyazᴜ amasi ekile amani ama enyale emisi o'du Opi amani Yesuni ma aliarile. 15Mani ovᴜria a'ita 'diri be, ma ega ndra okorisi muzᴜ emi vᴜ emi ma isu ani asi ndriza iriri beni ; 16'dini ma ega ndra agazᴜ emi vᴜ 'disi muzᴜ Makedoniaa, azini mani engaria Makedoniaa emvizᴜ emi vᴜ dika, emi ma nga ani ma ji kᴜ geri muzᴜ Yudiaaria beni. 17E'yo 'dirisi mani egaria 'dinile, ma 'ye ojaojaasi ya? Kani e'yo mani egale ma ma 'yeri ma ega e'yo ruanile, mani e'yo 'yoza ojazᴜ E, e, azini Kᴜ, kᴜ, 'dinile ya? 18Te ekile Munguni ovᴜle e'yo ada berile, e'yo 'yoza amani emi vᴜri ovᴜni E pi Kᴜ be 'dini kᴜ. 19'Dini Mvi Munguni, Yesu Kristo ovupi olᴜzarᴜ emi eselia amasiri, ada amani olᴜle Silivano pi Timoteo beri, ovᴜni E azini Kᴜ, 'dini kᴜ ; te eri ma alia eri E-ni 'dani. 20Aziza Munguni ka ovᴜ kakaᴜ ngopi ti, eri ma alia omvizani ovᴜ E. E'yo 'dirisi ama adri Amena 'yo erisi diza fezᴜ Mungu dri. 21Te ama 'bapi okporᴜ emi be Kristo ma alia, odᴜ osᴜpi ama driari, eri Mungu'i; 22eri 'ba afa ini ecetarᴜri ama dria, fe vini Orindi asi amani ma alia afa toborᴜrile. 23Te ma omve Mungu ovᴜzᴜ e'yo nzepirirᴜ idri mani ma dria—ma ecani Korintoa kᴜ lᴜ mani emi kᴜzᴜ asi ndrizasi. 24Ovᴜni kini ama opirᴜ a'ita emini ma drilia, 'dini kᴜ, te ama ovᴜ 'ba ayiko emini ma aza kopi 'diyirᴜ, a'disikᴜ emi so pa ci a'itasi ra.

will be added

X\