1 TIMOTEO 5

1Mi ega mbazaᴜ ma dria kᴜ, te mi omi eri ma asi ekile atale; karile ekile adripile, 2okᴜ 'wara 'diyi ekile andripile, okᴜ o'di 'diyi ekile amvipile, asi alarᴜsi dria. 3Mi inzi awᴜzi ovᴜpi awᴜzi adarᴜ 'diyi. 4Te awᴜzi ka ovᴜ anzi be, kani anzi 'diyi ma anzi be, yi ma ni okorisi 'ba yi vile akua 'diyi inzizᴜ, azini aroti ofezᴜ 'ba yi tipi 'diyi dri; 'di ovᴜ onyirᴜ Mungu ma milia. 5Te awᴜzi ovᴜpi awᴜzi adarᴜ, kᴜle a'duleri, 'ba i asi Mungu vᴜ asi tezasi, ovᴜ 'dani matᴜ 'bazᴜ azini Mungu zizᴜ inisi etusi; 6te awᴜ-zioᴜ asi 'bapi ayiko nyakuni ma driari dra 'bo, ka tro ovᴜ idrirᴜ ti. 7Mi ma azi e'yo 'diyi, 'ba ma ovᴜ ani asᴜ kokorᴜ. 8Te 'ba azini ka 'ba ini 'diyi ma aza ko afasi kᴜ, tᴜni 'ba eri vile akua 'diyi, ka'dini eri ga a'ita nderi si, onzi erini aga 'ba a'ipi kᴜriniri ra. 9'Ba alᴜni ma ovᴜ sizarᴜ awᴜzirᴜ kᴜ de nga eli erini cani kali azia kᴜ, de eri ndra okᴜ agupi alᴜni; 10'ba ka eri ma e'yo eti nze onyirᴜ, eri ka ndra anZi ini ezo onyirᴜ, ka ndra omu a'i wa'dirᴜ, ka ndra 'ba alatararᴜ ma pa oji, ka ndra 'ba inzale 'diyi ma aza ko, ka ndra 'yeta onyirᴜ ma vᴜti bi e'yo driasi. 11Te mi ma ga awᴜzi o'dirᴜ 'diyi ma ru siko si, a'disikᴜ yi ka ca ovᴜzᴜ asi mbaza be Kristo gazᴜ yi nga le mu agupia, 12te yi nga e'yo liza isu yini a'ita yini okori 'belerisi. 13Azini vini yi nga eca ovᴜoᴜrᴜ, acizᴜ saarᴜ saarᴜ aku tiasi aku tiasi ; ovoᴜrᴜ a'dule kᴜ, te 'ba ru ezapi e'yo osᴜpi 'ba ma eselia, e'yo dri fupi kᴜ 'diyi o'yopi 'diyirᴜ. 14E'yo 'dirisi ma le awᴜzi o'dirᴜ 'diyi ma mu agupia, ma oti anzi, ma te aku yini ma agei, ma fe ari'bo dri pari o'data o'dazᴜ kᴜ. 15A'disikᴜ 'ba azini oja yi vile curu'do Satani ma vᴜti bizᴜ 'bo. 16Okᴜ alᴜ a'ipiri ka ovᴜ awᴜzi be, eri ma ko yi aza afasi eri'i, e'yoni kazᴜ ovᴜzᴜ nzizarᴜ kanisa dri kᴜ; kanisa ma ko ani awᴜzi ovᴜpi awᴜzi adadarᴜ 'diyi ma aza'i. 17'Ba ma la 'ba 'wara 'ba dri cepi onyirᴜ 'diyi fudri inzita isuzᴜ pale iri, tᴜni 'ba azi ngapi e'yo olᴜza pisi imbata be 'diyi; 18'dini e'yo siza ‘yora, Mi ma ombe ranya ma ti erini anya tᴜria kᴜ, azini dika, 'Ba azi ngapiri fᴜ dri oya erini a'izᴜ ra. 19Mi ma a'i asᴜ sᴜle 'ba 'wara azini ma ruaari kᴜ, pe kiri 'ba e'yo eti nzepi iri kani na 'diyi ma e'yosi. 20Mi ma ega 'ba e'yo ezapi 'diyi ma dria 'ba dria ma milia, 'dini 'ba azini acepi 'diyi ma ovᴜ urisi beni. 21Ma azi mi tia Mungu ma milia, Kristo Yesu ma milia, azini malaika erini opele 'diyi ma milia indi, mi ma mba e'yo 'diyi ma ta, mi ma li e'yo eti erikokorᴜ kᴜ, mi ma 'ye e'yo alᴜni 'ba opezasi kᴜ. 22Mi ti mi dri 'ba ma dria mbele kᴜ, mi ma fi e'yo onzi 'ba azinini ma alia kᴜ; mi mba mi ma ta ovᴜzᴜ alarᴜ 'dani. 23Mi mvu yi a'dule dika kᴜ, te mi mvu patiefi ma su were, azo mi alia mi 'yepi dika dikarisi. 24E'yo onzi 'ba azinini 'diyi e'da yi 'ba ma milia, acizᴜ yi ma drilia e'yo liza vᴜ, te 'ba azinini 'diyi bi yi ma vᴜti vilerisi. 25'Dinile azi onyirᴜ e'da yi 'ba ma milia indi; te ovᴜpi 'dinile kᴜ 'diyi, econi yi zizarᴜ kᴜ.

will be added

X\