1 TIMOTEO 3

1E'yo 'yoza 'diri ovᴜ adarᴜ: 'Ba azini ka azi kanisa andrizᴜri ndru, eri 'ba i asi azi onyirᴜ ma dria. 2E'yo 'dirisi 'ba 'ba andripiri ma ovᴜ 'ba e'yoni ndele kᴜ, ovᴜpi okᴜ be alᴜ, asi e'yere be, asisile anzurᴜ be, 'ba acipi kililirᴜ, omu a'ipi avasi wa'dirᴜ, 'ba 'ba imbapi onyirᴜ, 3'ba atipi ewasi kᴜ, 'ba 'ba copi kᴜri'i; te eri ma ovᴜ 'ba e'yere, 'ba awapi mbele kᴜ, 'ba ava 'bapi silingi ma dria kᴜri'i. 4Eri ma ce 'ba eri vile joa 'diyi dri onyirᴜ, anzi erini ma eri e'yo erini inzita be e'yo driasi ; 5te 'ba azini ka ni jo ini ma dri cezᴜ kᴜ, eri nga kanisa Munguni agei te ngoni ngoni ya? 6Eri ma ovᴜ 'ba fipi o'dirᴜri kᴜ, eri kazᴜ ovᴜzᴜ afᴜsi erini ngazᴜ ani e'dezᴜ e'yo liza 'ba asᴜ sᴜpirini ma alia kᴜ; 7azini eri ma ovᴜ 'ba 'ba ovᴜpi amvelerᴜ 'diyini eri ma e'yo eti nzele onyirᴜ-ri'i, eri kazᴜ e'dezᴜ o'data kani emba 'ba asᴜ sᴜpirini ma alia kᴜ. 8'Dinile 'ba azi ma aza kopi 'diyi ma ovᴜ inzita be, ma ovᴜ andre iri be kᴜ, 'ba ewa mvupi tᴜ 'diyi'i kᴜ, 'ba orodri ndrupi geri onzisi 'diyi'i kᴜ; 9'ba e'yo ziza vale kᴜ a'itaniri ma ta mbapi asisile alarᴜ be 'diyi. 10'Ba ma o'bi 'ba 'diyi oko raka te e'yo ka yi nde kᴜ, yi ma fi azi 'ba aza kozᴜri ma alia ndo. 11'Dinile okᴜ yini ma ovᴜ inzita be, ma ovᴜ asᴜ be kᴜ, mile be yi agei tezᴜ e'yo driasi, asi adarᴜ be e'yo driasi. 12'Ba azi ma aza kopi 'diyi ma ovᴜ okᴜ be alᴜ, anzi yini pi ma dri cezᴜ onyirᴜ 'ba aku yinia 'diyi be; 13te 'ba aza kopi azi ngapi onyirᴜ 'bo 'diyi isu inzita onyirᴜ yi ma ngᴜlᴜpi dri, azini asi teza amborᴜ a'ita nde ovᴜpi Kristo Yesu ma aliari ma alia. 14Ma e'yo 'diri si mi vᴜ mani egaria ace were ma nga mu mi vᴜ, 15te ma ka ma dri ici 'dani, mi ma ni ani geri ecopi onyirᴜ 'bani ani ovᴜzᴜ jo Munguni ma aliari beni, 'di kanisa Mungu idrirᴜrini, pati idiaferᴜ azini jo eti e'yo adarᴜniri'i. 16'Ba econi agata gazarᴜ e'yo 'dirisi kᴜ, e'yo zizarᴜ vale kᴜ adriza 'bani ani Mungu inzizᴜriniri ovᴜ amborᴜ ada: Eri e'da i rᴜa ma alia, ece eri 'ba kililirᴜ Orindisi, malaika ndre eri ra, olᴜ e'yo erini suru ndᴜ ndᴜ ma eselia, a'i eri nyakua, 'du eri uru diza ma alia.

will be added

X\