1 PETERO 1

1Petero, 'ba Yesu Kristoni ti peleri, 'Ba yi erepi ani'barᴜ angᴜ Pontoari pi ma alia 'diyi vᴜ, Galatia pie, Kapadokia pie, Asia pie, Bitunia pie, 2yi 'ba opezarᴜ Mungu Atani nile drio, Orindini 'bale alatararᴜ, yini e'yo erizᴜ, Yesu Kristoni i ma ari oyazᴜ ani yi ma dria 'diyi : 'Yeta anzutiri pi ma ga tre emi vᴜ asi anzurᴜ be. 3Ru Mungu Opi amani Yesu Kristo ma Atani ma ovᴜ inzizarᴜ, erini ama tile dika yiki ini amborᴜsi, amani e'yo teza idriniri isuzᴜ engata Yesu Kristoni 'ba draza ma eseliarisi, 4amani vini awᴜrᴜso dri japi kᴜ, ondi kokorᴜ, onyupi kᴜ, tani mbazarᴜ 'bua emi driri tezᴜ. 5A'ita eminisi okpo Munguniri emi agei te, emini ani pata ovᴜpi ngonde i ecezᴜ ewu asizᴜriari isuzᴜ. 6E'yo nde 'dirisi, e'yo ka le eca ewarᴜ, emi ka tro candi isu obeta ndᴜ ndᴜsi ewu were curu'dorisi ti, te emi ovᴜ ayikosi ambo, 7a'ita emini ovᴜpi o'bizarᴜ 'bo, ovᴜpi aje be amborᴜ mele o'bile acisi raka te i ezapi ndori agapi rari ma e'da i afa inzitarᴜ, dizarᴜ, ru iduzarᴜ, o'du Yesu Kristoni i ecezᴜrisi. 8Te emi eri le avasi ra, de ndra emi ndreni eri kᴜ ; azini emi ka tro eri ndre curu'do kᴜ ti, emi a'i eri ra, emi ovᴜ ani ayikosi erisi ayiko amborᴜ 'bani ecole e'yoni 'yole tisi kᴜ dizarᴜ tᴜri be, 9emini de e'yo asiza a'ita eminirini biria, 'di pata orindi emini pazᴜri'i. 10Nabi 'yeta anzutiri ngapi ecapi emi vᴜri ma e'yo ondripi drio 'diyi ozi ndra pata 'diri ma e'yo tᴜ, etini ndruzᴜ; 11yi ndrᴜ kani Orindi Kristoni ovᴜpi yi ma alia candi Kristoni pi ma e'yo eti nzepi oko, diza ecapi vᴜtiniari pieri ece e'yo 'diri a'di ma e'yosi ya, kani ewu ngorisi yani. 12Eri ovᴜ ecezarᴜ yi dri kini yi koni ndra yi ma ngᴜlᴜpi ma aza e'yo nde 'diyisi kᴜ, te yi ko emi ma aza; 'ba e'yo bari olᴜpi emi dri Orindi Alatararᴜ ti epele 'buarisi 'diyi olᴜ e'yo 'diyi emi dri curu'do 'bo; malaika le e'yo 'diyi lu avasi. 13E'yo 'dirisi emi ma ombe asisile emini kirikiri, emi ma ovᴜ mile be emi agei tezᴜ, emi ma 'ba emi asi 'yeta anzutiri Munguni ngapi ecapi emi vᴜ o'du Yesu Kristoni i ecezᴜrisiri ma dria, asi tezasi dria. 14Emi ma ovᴜ ekile anzi e'yo eripi 'diyile, emi ma ede emi e'dazᴜ ekile ndra oko emini 'yele lisi aniako eminisirile kᴜ, 15te ekile 'ba emi omvepirini ovᴜle alatararᴜrile, emi ma ovᴜ alatararᴜ indi adriza emini ma alia dria; 16erini ovᴜle sizarᴜrisi kini, Emi ma ovᴜ alatararᴜ mani ovᴜle alatararᴜrisi. 17Te emi ka 'ba 'ba opepi kᴜ te 'ba alᴜ alᴜ ma e'yo lipi azi erini vᴜsiri omve Atarᴜ, emi ma ovᴜ urisi ewu emini ovᴜzᴜ ani'borᴜ 'doarisi, 18emini niria kini yi onzeni ndra emi adriza toko emi a'bipini imbaleri ma aliasi afa yi ezapi ra kani dahabuni, kani meleni 'diyisi kᴜ, 19te ari aje be amborᴜ Kristonirisi, ekile kabilomva ezata kokorᴜ azini nyebile kokorᴜri ma arisirile. 20Ni ndra eri drio, de nga nyaku eti 'bani i kᴜ, te ece eri ewu vile asizᴜ 'dorisi, emi ma e'yosi. 21Erisi emi ovᴜ a'itasi Mungu eri engapi 'ba draza eselia diza fepi eri driri vᴜ, a'ita emini pi asi 'baza emini be ma ovᴜ ani Mungu vᴜ. 22'Dinile emini orindi emini 'baria alatararᴜ 'bo, emini e'yo adarᴜri erilerisi ovᴜzᴜ ani adripi vᴜ ale lokiri kokorᴜrisi, emi ma le emi emi eselia avasi asi driasi. 23Emi ovᴜ osizarᴜ o'dirᴜ 'bo, ori ecopi mazarᴜrisi kᴜ te ori ecopi mazarᴜ kᴜrisi, 'di e'yo Munguni ovᴜpi idrirᴜ, adripi 'dani 'daniri'i. 24Te Ba rᴜa ari beri dria ovᴜ asele azini rᴜa ndriza erini dria ovᴜ ase fᴜle. Ase onyu ra, te fᴜni lu ra, 25te e'yo 'yoza Opiniri nga ovᴜ 'dani 'dani. Te e'yo 'yoza 'diri eri e'yo barᴜ 'bani olᴜle emi tia 'bori'i.

will be added

X\