1 KORINTOA 9

1Ma ovᴜni trᴜzarᴜ kᴜ ya? Ma ovᴜni 'ba ti pelerirᴜ kᴜ ya? Ma ndreni Yesu Opi amani ma'i kᴜ ya? Emi ovᴜni azi pamvᴜ mani Opi ma alia kᴜ ya? 2Ma ka tro ovᴜ 'ba ti pelerirᴜ 'ba azini vᴜ kᴜ ti, ma ovᴜ 'ba ti pelerirᴜ emi vᴜ ra; a'disikᴜ e'yo mani ovᴜzᴜ 'ba ti pele Opi ma aliarirᴜri, ecetani bani emi'i. 3E'yo mani omvile 'ba ma e'yo ozipi 'diyi ma tiari eri 'di. 4Feni ama dri okpo nyaka nyazᴜ azini afa mvuza mvuzᴜrini kᴜ ya? 5Feni ama dri okpo acizᴜ okᴜ amani amvipi e'yo a'ipirᴜri be, ekile 'ba ti opele azini 'diyile, adripi Opini 'diyi pie, Kefa be kᴜ ya? 6Kani kiri ama'i Baranaba be, feni okpo ama dri azi ngale drisiri kᴜzᴜ ja kᴜ ya? 7Asikari ngori mu ombaa i ma ngᴜlᴜpi ma afasini ya? 'Ba ngori ka zabibu pati esi amvua, ngani efini nya kᴜ ya? 'Ba ngori ka ndri oce, ngani lesuni mbe kᴜ ya? 8E'yo mani 'yole 'diri eri 'bani 'yoleniri'i ya? Azita 'yoni trotro 'dinile indi kᴜ ya? 9A'disikᴜ eri ovᴜ sizarᴜ azita Musani ma alia kini, Mi ma ombe ranya ma ti, erini anya otᴜria kᴜ. Mungu ega e'yo ranyani ra ya? 10Eri 'yoni bani e'yo amanisi kᴜ ya? Ada, si e'yo amanisi, a'disikᴜ onyirᴜ 'ba amvu 'yapiri ma 'ya asi tezasi, azini 'ba anya copiri ma co asi tezasi, kini, i nga efiniri nya ra. 11Ama ka afa orindini ri emi vᴜ, ka'dini eri e'yo amboro ama ka afa loza rᴜa ma aza kozori isu emi vᴜ ya? 12'Ba azini ka ovᴜ okpo be 'yezᴜ 'dinile emi vᴜ, agapiri ama'i kᴜ ya? Te ti, ama 'yeni okpo 'dirisi kᴜ, te ama a'i candi dria, ama kazᴜ e'yo barᴜ Kristoniri ogazᴜ kᴜ 13Emi nini kini 'ba azi alatararᴜ ngapi hekalua 'diyi, yi adri afa hekaluni nya ra kᴜ ya? 'Ba azi 'yepi pari edeta edezᴜria 'diyi adrini afa pari edeta edezᴜria 'diyi ma azi nya ra kᴜ ya? 14'Dini Opi azi kini 'ba e'yo bari olᴜpi 'diyi ma isu afa yi ma idri ma aza kozᴜri e'yo barisi. 15Te ma 'yeni ani afa 'diyi ma azi alᴜni kᴜ, azini vini ma sini e'yo 'diri eri ma ovᴜ ani 'yezarᴜ ma vᴜ 'dini kᴜ. Te mani drazᴜri onyirᴜ aga 'bani e'yo mani ma enyazᴜri 'bazᴜ tokorᴜri ra. 16Te ma ka e'yo bari olᴜ, 'di ovᴜni e'yo mani ma enyazᴜri kᴜ; mi ma mi mi; ada, candi ma dri ma ka e'yo bari olᴜ kᴜ! 17Te ma ka 'diri 'ye avasi ceni, orodri mani indi ; te ma ka 'ye avasi ceni kᴜ ti, kᴜ azi e'yo bari olᴜzᴜri ma dri 'bo. 18Ka'dini orodri maniri ngoni ya? Eri 'di : mani e'yo bari olᴜria, ma ma 'ba e'yo bari ovᴜzᴜ aje kokorᴜ, ma ma 'ye okpo mani e'yo bari ma alia-risi ma ma ngᴜlᴜpi ma aza kozᴜ kᴜ. 19Ma ka tro ovᴜ ati'borᴜ 'ba alᴜni dri kᴜ ti, ma fe ma ovᴜzᴜ ati'borᴜ ceni 'ba dria dri, ma ma isᴜ ani 'ba kakaᴜ aga ra beni. 20'Ba Yahudini vᴜ ma eca ovᴜ 'ba Yahudinirᴜ, ma ma isu 'ba Yahudini ani; 'ba azita ma palaa 'diyi vᴜ ma eca ovᴜzᴜ 'ba azita palaarirᴜ—ma ma ngᴜlᴜpini ovᴜria 'ba azita ma palaa-ri'i kᴜ—te ma ma isu 'ba azita palaa 'diyi ani. 21'Ba azita kokorᴜ 'diyi vᴜ ma eca ovᴜ ekile 'ba azita koko-rᴜrirᴜ—mani ovᴜria azita kokorᴜ Mungu vᴜ kᴜ, te azita be Kristo vᴜ .—ma ma isu 'ba azita kokorᴜ 'diyi ani. 22'Ba okpo koko 'diyi vᴜ ma eca ovᴜ okpo kokorᴜ, ma ma isu 'ba okpo kokorᴜ 'diyi ani. Ma eca afa driale 'ba dria vᴜ, 'dini geri driasi ma ma opa 'ba azini 'diyi ani beni. 23Te ma 'ye afa dria e'yo barisi, ma ma isu ti ecita e'yo bari ma aliari yi be tualᴜ ani. 24Emi nini 'ba ongu nzᴜpi avita ma alia 'diyi nzᴜ dria, te kiri 'ba alᴜ a'i afa nde azilerini kᴜ ya? Emi ma nzᴜ 'dini, emini afa a'izᴜ ani. 25Te 'ba o'bipi asi driasi abala ma alia 'diyi dria alᴜ alᴜ adri i ma agei te e'yo driasi. Te yi e'yo 'diri 'ye ekilaza ecopi mapi rari a'izᴜ, te ama'i ekilaza ecopi mapi kᴜri'i. 26Ka'dini ma nzᴜ ani 'dini saarᴜ kᴜ, ma 'ba si drisi 'dini oli sizᴜ toko kᴜ; 27te ma rua mani odi okposi eri 'bazᴜ ati'borᴜ, yi kazᴜ ma gazᴜ kᴜ, mani e'yo olᴜzᴜ 'ba azini tia 'bori ti.

will be added

X\