1 KORINTOA 8

1E'yo nyaka fele wura inzile inzi 'diyi dririsi: ama ni ra ama dria ovᴜ nita be. Nita eri 'ba dri afᴜ feni, te leta eri 'ba ezoni. 2'Ba azini ka osu kini i ni e’yo ra, isu de eri nini nga ekile onyirᴜ eri ma ni rarile 'dini kᴜ. 3Te 'ba Munguni lepi avasiri, Mungu ni 'ba nderi ra. 4E'yo nyaka fele wura inzile inzi 'diyi dririsi, ama ni ra kini wura 'bani inzile inzi nyakuari eri afa tokoni, azini Mungu azini yo pe alᴜ eri'i. 5Te ka tro afa kakaᴜ indi yini omvele mungurᴜ, kani 'bua kani nyakua 'diyi ti—ekile 'bani ovᴜle mungu be kakaᴜ azini opi be kakaᴜ-rile— 6te ama vᴜni Mungu eri alᴜ, Ata'i, afa dria efᴜ eri ma alia, azini ama'i ovᴜzᴜ erinirᴜ; azini Opi alᴜ, Yesu Kristo'i, afa dria efᴜ geri eri vᴜrisi, azini ama efᴜ geri eri vᴜrisi indi. 7Te 'ba dria ovᴜni nita 'diri be kᴜ. Te 'ba azini, wura inzile inzi 'diyi ma e'yoni yi sile 'bo kpere curu'dorisi 'diyi, yi afa nya ekile eri afa fele wura inzile inziri dririle; te e'yo niza yini, erini ovᴜle okpo kokorᴜrisi, eca onzi. 8Te nyaka feni Munguni ama a'izᴜni kᴜ. Te ama ka nya kᴜ, onzi amani agani ani kᴜ ; ama ka nya ra, onyi amani agani vini kᴜ. 9Te emi ma ovᴜ mile be, okpo emini 'diri kazᴜ ecazᴜ kᴜmᴜrᴜ 'ba okpo kokorᴜ 'diyi dri kᴜ. 10Te 'ba azini ka mi, ovᴜpi nita beri, ndre mini riria mesa tia wura inzile inziri ma joa, 'ba okpo kokorᴜ 'diri ma e'yo niza ngani eri se drile drile kpere erini afa fele wura inzile inziri driri nyazᴜ kᴜ ya? 11'Dini nita minirisi, 'ba okpo kokorᴜ nderi ja dri ra, eri adripi Kristoni drale erisiri'i. 12'Dini emini adripi 'diyi 'yeria onzi, azini emini e'yo niza yini ovᴜpi okpo kokorᴜri furia, emi 'ye onzi Kristo vᴜ. 13E'yo 'dirisi, nyaka ka ma adripi fe e'dezᴜni, ma ngani za nya dika alᴜni kᴜ, ma kazᴜ ma adripi fezᴜ e'dezᴜ kᴜ.

will be added

X\