1 KORINTOA 7

1Te e'yo ndra emini silerisi: 'Ba ka okᴜ ma rua elo kᴜ, 'diri onyirᴜ. 2Te agupi dria alᴜ alᴜ ma ovᴜ okᴜ ini be, azini okᴜ dria alᴜ alᴜ ma ovᴜ agupi ini be, 'dini yi kazᴜ ovᴜzᴜ awurᴜ kᴜ. 3Agupi nde ma fe okᴜ ini dri e'yo 'yekeri, azini vini okᴜ ma fe agupi ini dri e'yo 'yekeri indi. 4Okᴜ ovᴜni okpo be rᴜa inisi kᴜ, te agupi'i ; 'dinile indi agupi ovᴜni okpo be rᴜa inisi kᴜ, te okᴜ'i. 5Emi oga emini emi ecizᴜ tualᴜ kᴜ, pe kiri emi ka e'yo ede emi eselia 'yezᴜ 'dinile o'du weresi, eco emini emi fezarᴜ Mungu zizᴜ ani; te emi eci emi tᴜalᴜ dika, Satani kazᴜ emi obezᴜ kᴜ okpo emini emi rua dri sizᴜrini ovᴜle wererisi. 6Te ma 'yo e'yo 'diri yini ma a'ile 'yozᴜ rarisi, te azitanisi kᴜ. 7Te ma le te 'ba dria ma ovᴜ male. Te di 'ba dria alᴜ alᴜ ovᴜ feza i vile engapi Mungu vᴜri be, alᴜri dri 'dini, aziri dri 'doni. 8Te ma e'yo 'yo 'ba ojolorᴜ 'diyi pi ma tia awᴜzi be, eri ovᴜ onyirᴜ yi dri yi ka ovᴜ ekile male 'dani. 9Te yi ka ovᴜ okpo be yi rᴜa dri sizᴜ kᴜ, ma je yi je je. A'disikᴜ okᴜ bizᴜ eri onyirᴜ aga lini suzᴜ 'ba rᴜaari ra. 10Te 'ba yi jepi 'bo 'diyi dri ma azita fe ra, te ma'i kᴜ, Opi feni, kini, okᴜ ma co i esele i agupi be kᴜ 11(te ka esele co ra, eri ma adri agupi kokorᴜ, ka'dini kᴜ eri ma emvi e'yo edezᴜ agupi ini be avasi)—azini vini agupi ma kᴜ okᴜ ini kᴜ. 12Te 'ba azini acepi 'diyi ma tia ma e'yo 'yo ma'i, Opi 'yoni kᴜ, kini adripi azini alᴜ ka ovᴜ okᴜ a'ipi kᴜri be, azini okᴜ nde le adrizᴜ eri be, agupi nde ma kᴜ eri kᴜ. 13Te okᴜ azini ka ovᴜ agupi a'ipi kᴜri be, azini agupi nde le adrizᴜ eri be, eri ma kᴜ agupi ini kᴜ. 14A'disikᴜ agupi a'ipi kᴜri ovᴜ 'bazarᴜ alatararᴜ okᴜ ndesi, azini okᴜ a'ipi kᴜri ovᴜ 'bazarᴜ alatararᴜ agupi ndesi. Ka'dini yo anzi emini ovᴜ alata kokorᴜ, te curu'do yi ovᴜ alatararᴜ. 15Te 'ba a'ipi kᴜri ka le esele co ra, ma co esele ra; azita ombeni adripi nde kani amvipi nde ati'borᴜ e'yo 'dinile 'disi kᴜ. Te Mungu omve ama ovᴜzᴜ asi anzurᴜ ma alia. 16Okᴜ la! mi ni ngoni ngoni mi nga mi agupi pa ya? Agupi la! mi ni ngoni ngoni mi nga mi okᴜ pa ya? 17'Dini Opini e'yo awale 'ba alᴜ alᴜ dririle, ekile Munguni 'ba alᴜ alᴜ omvelerile, eri ma aci 'dinile. Ma adri 'ba imba 'dinile kanisa vᴜsi dria. 18Omve 'ba agele liza beri ya? Eri ma o'bi ovᴜzᴜ agele liza kokorᴜrile kᴜ. Omve 'ba agele liza kokorᴜri ya? Eri ma a'i agele liza kᴜ. 19Te agele lizᴜ rari toko, te agele lizᴜ kᴜri toko, te azita Munguni ta mbazᴜ'i. 20'Ba dria alᴜ alᴜ ma ovᴜ 'dani omveta yini eri omvezᴜri ma alia. 21Omve mi de mi ati'boni ya? Mi asi e'yo 'dirisi kᴜ. Te ka eco mini mi trᴜzarᴜ ra, mi 'ye di 'dini. 22A'disikᴜ 'ba omvele Opi ma alia de eri ati'boniri, eri 'ba Opini trᴜleri'i. Te 'ba omvele de eri trᴜzarᴜri, eri ati'bo Kristoniri'i. 23Emi ovᴜ je-zarᴜ ajesi; emi ma ovᴜ ati'ba 'banirᴜ kᴜ. 24Adripi mani, 'ba dria alᴜ alᴜ ma ovᴜ 'dani Mungu be, e'yo nde ndra yini eri omvezᴜri ma alia. 25Te e'yo ezoanzi aliriarᴜ 'diyinisi ma ovᴜni azita Opini be kᴜ, te ma egata maniri fe, ekile 'ba yiki isu-pi Opi vᴜ ovᴜzᴜ adarᴜrile. 26Ma osu e'yo 'diri ovᴜ onyirᴜ candi ewarᴜ curu'dorisi, kini onyirᴜni 'ba ma adri ini ovᴜlerile. 27Ombe mi okᴜ be ya? Mi ndrᴜ ayuza kᴜ. Ayu mi okᴜ rᴜaarisi 'bo ya? Mi ndru okᴜ kᴜ. 28Te mi ka okᴜ je ra ti, mi 'yeni onzi kᴜ ; aliria ka mu agupia ti, eri 'yeni vini onzi kᴜ. Te 'ba 'yepi 'dini 'diyi nga inzata isu rᴜasi ra, te ma le bani emi isu inzata kᴜ. 29Te ma 'yo 'dini, ma adripi, kini ewu ace were; engazᴜ curu’do 'ba ovupi okᴜ be 'diyi ma ovᴜ ekile yi ovᴜ okᴜ kokorᴜle, 30te 'ba awᴜ wᴜpi 'diyi ekile yi wᴜni kᴜrile, 'ba ayiko be 'diyi ekile yi ayiko kokorᴜle, 'ba afa jepi 'diyi ekile yi afa kokorᴜle, 31'ba azi ngapi afa nyakunisi 'diyi ekile yi ngani azi afa nyakunisi tᴜ tᴜ kᴜle. A'disikᴜ wura nyaku 'doriniri 'ye aga aga. 32Te ma le emi ma ovᴜ asi otiza kokorᴜ. 'Ba okᴜ kokorᴜri i asi fe e'yo Opini egazᴜ, geri ndazᴜ ayiko fezᴜ Opi dri; 33te 'ba okᴜ beri i asi fe e'yo nyakuni egazᴜ. geri ndazᴜ ayiko fezᴜ okᴜ ini dri, 34asi ini awa i ani. Te okᴜ agupi kokorᴜri kani aliria eri i asi fe e'yo Opini egazᴜ, eri ma ovᴜ ani alatararᴜ ruasi azini orindisi indi; te okᴜni i asi fe e'yo nyakuni egazᴜ, geri ndazᴜ ayiko fezᴜ agupi ini dri. 35Te ma e'yo 'diri 'yo emi aza kozᴜ, te ovᴜni emi ewuzᴜ bakasi kᴜ, te ma le e'yo ma ovᴜ 'yeke etuzu, te emi ma fe emi asi opi dri egata azini emi sepi amveri kokorᴜ. 36Te 'ba azini ka ega i 'yeni i aliria vᴜ onyirᴜ kᴜ, eri ka mba de 'bo, azini e'yoni le ma ovᴜ 'dinile, eri ma 'ye ini lelerile: onzini yo—ma je yi je je. 37Te 'ba pa sopi asi okporᴜsi e'yo ini ma alia, 'bani omile omi kᴜ, ovᴜpi okpo be e'yo 'yezᴜ i ma ngᴜlᴜpini lelerileri, eri ka e'yo 'diri ede i asia 'bo kini eri nga i ma zamva ma ta mba aliriarᴜ, eri nga 'ye 'yeke. 38'Dini 'ba fepi aliria ini jepiri eri 'ye 'yeke; te 'ba eri fepi jepi kᴜri 'ye vini onyirᴜ aga ra. 39De agupini ovᴜria idrirᴜ, okᴜ erini ovᴜ ombezarᴜ 'dani. Te agupi ka dra ra eri ovᴜ trᴜzarᴜ muzᴜ agupi azinia erini lelerile, te kiri Opi ma alia a'dule. 40Te ma ega drileba erini nga aga ra eri ka adri 'dani erini ovᴜlerile. Te ma ega ma ovᴜ Orindi Munguni be indi.

will be added

X\