1 KORINTOA 16

1Curu'do, e'yo afa okᴜzᴜ 'ba alatararᴜ 'diyi ma aza kozᴜri ma e'yosi: ekile mani e'yo azile kanisa Galatiaa 'diyi ma tiarile, emi ma 'ye 'dinile indi. 2Sabato ma o'du alᴜ vᴜsi dria, emi dria alᴜ alᴜ ma 'ba afa kalaa tani mbazᴜ i vᴜ ci, ekile ini drileba isulerile, 'dini emi ma nga afa azini okᴜ mani ecaria kᴜ beni. 3Te ma ka eca ra, ma nga 'ba emini opele waragasi 'diyi ma ti pe afa feza emini jizᴜ Yerusalemua. 4Te eri ka ovᴜ 'yeke mani muzᴜ indi, yi nga mu ama be. 5Te ma nga emu emi vᴜ, mani agaria Makedonia ma alesi 'boria, a'disikᴜ ma nga aga Makedoniaarisi ra, 6te kani ma nga ovᴜ emi be ra yani, kani tezᴜ ewu egbeniri ma alia dria, emini ma jizᴜ kᴜzᴜ geri mani muzᴜ ngoa yaniria beni. 7Te ma leni emi ndrezᴜ curu'do mani agaria geria kᴜ; a'disikᴜ ma 'ba ma asi tezᴜ emi be ewu fudri ci, Opi ka fe raria. 8Te ma nga ovᴜ Efesoa kpere o'du Pentekositonisi, 9a'disikᴜ zi jotile amborᴜ ma dri 'bo, mani ani e'yo 'yezᴜ tᴜ, te 'ba ma geri ogapi 'diyi yi kakaᴜ. 10Te Timoteo ka emu ra, emi ndre onyirᴜ eri ma ovᴜ emi eselia uri kokorᴜ, a'disikᴜ eri azi Opini nga mani ngalerile. 11'Ba alᴜni ma ede eri kᴜ. Te emi ma ji eri kᴜ geria asi anzurᴜsi, eri ma emu ani ma vᴜ; mani eri ma mile gale adripi 'diyi berisi. 12Te adripi Apolo ma e'yo 'dini, ma 'ba matᴜ eri vᴜ tᴜ eri ma mu emi vᴜ adripi 'diyi be, te eri leni muzᴜ curu'do alᴜni kᴜ. Te eri nga mu etu ecopirini ecaria ra. 13Emi ovᴜ mile be, emi so pa a'ita ma alia ci, emi ovᴜ asi be agu-pirᴜ, emi ovᴜ okpo be. 14Emi 'ye e'yo dria leta avasirisi fo! 15Te ma adripi, emi ni 'ba Setefana vile akua 'diyi, yi ovᴜ anyadri kapi oko Akaya ma aliari'i, azini yi ede yi 'ba alatararᴜ ma aza kozᴜ 'bo; 16ma matᴜ 'ba emi vᴜ, emi ma eri 'ba 'dinile 'diyi pi ma e'yo, 'ba dria azi ngapi ama be tualᴜ 'diyi pie, 'ba yi ecandipi azisi 'diyi be. 17Ma ovᴜ ayikosi Setefana pini ecale, Foritunato pie, Akaiko pierisi, te afa emini ecepi 'yele kᴜri yi 'ye ra, 18te yi 'ba ma orindi, azini emi orindi ma enga ekile o'dirᴜle. Emi ma ni ani 'ba 'dinile 'diyi ra. 19Kanisa Asiaa 'diyi yi zi emi ci ci. Akula pi Pirisika be yi zi emi ci ci tᴜ Opi ma alia, kanisa ovᴜpi yi vile joari be. 20Adripi dria yi zi emi ci ci. Emi zi emi emi eselia o'deza ava alatararᴜnisi. 21Zita mani sile ma ngᴜlᴜpi ma drisiri 'di, ma'i Paulo. 22'Ba ka Opini le kᴜ, eri ma ovᴜ trizarᴜ. Opi amani emu ra! 23'Yeta anzutiri Opi Yesu Kristoni ma ovᴜ emi be. 24Leta mani avasiri ma ovᴜ emi be dria Kristo Yesu ma alia. Amena.

will be added

X\