1 KORINTOA 15

1Te ma adripi, ma fe emi ma ni e'yo barᴜ mani ndra olᴜle emi tia, emini ndra a'ile, emini pa sozᴜ eri alia, 2emini ovᴜzᴜ pazarᴜ erisiri'i, emi ka e'yo 'yoza mani olᴜle emi tiari bi kirikiri—emi ka ndra awi eri a'i oye kᴜrisi. 3Te ma idri emi dri okorisi e'yo fele ma driri, kini Kristo dra azi onzi amanisi, ekile e'yo sizani 'yolerile, 4sa eri ra, eri enga o'du nasi ra ekile e'yo sizani 'yolerile, 5eri e'da i Kefa vᴜ, vilerisi 'ba mᴜdri drini iri 'diyi vᴜ indi. 6Vᴜtinia e'da i vini adripi vᴜ tualᴜ pari alᴜa, yi ma kalafe aga tᴜrᴜ towi ra, te yi ma eselia 'ba kakaᴜ ovᴜ indi troa curu'do, te yi ma azi 'diyi, o'du o'be yi 'bo. 7Vᴜrinia e'da i vini Yakobo vᴜ, vᴜtinia 'ba ti opele 'diyi vᴜdria. 8'Ba dria ma vᴜtia eri e'da i ma vᴜ indi, ekile mva osipi mba alipi agaarile. 9Te ma ovᴜ 'ba werearᴜ tᴜ 'ba ti opele 'diyi ma eseliari'i, ma funi dri 'bani ma omvezᴜ 'ba ti pelerirᴜ kᴜ, mani kanisa Munguni inzalerisi. 10Te 'yeta anzutiri Mungunisi ma ovᴜ ekile mani ovᴜlerile, te 'yeta anzutiri erini ovᴜpi fezarᴜ ma driri ovᴜni tokorᴜ kᴜ. Te ma nga azi okposi aga yi dria ra, te ma'i yo, te 'yeta anzutiri Munguni ovᴜpi ma beri nga azi nderini. 11'Dini kani ma'i, kani yi'i yani, ama olᴜ 'dinile ra, emi a'i 'dinile indi. 12Te e'yo olᴜza ka 'yo kini Kristo enga 'ba draza eselia 'bo, 'ba azini emi eselia 'diyi 'yo kini, Engata 'ba draza ma eseliari yo, 'dini ngoni ngoni ya? 13Te engata 'ba draza eseliari ka ovᴜ yo, Kristo engani de ndra vini kᴜ indi; 14te Kristo ka enga kᴜ, olᴜta amani ovᴜ di toko, a'ita emini ovᴜ vini toko indi. 15Azini vini isu ama ovᴜ 'ba e'yo Munguni ma eti nzepi inzorᴜ 'diyi, amani e'yo eti nzele Mungusi kini eri enga Kristoni 'bo, 'dinirisi, te de engani eri kᴜ, ka ovᴜ adarᴜ kini 'ba draza engani kᴜ. 16A'disikᴜ 'ba draza ka enga kᴜ, Kristo engani de ndra kᴜ indi. 17Te Kristo ka ndra enga kᴜ, a'ita emini ovᴜ toko, emi ovᴜ nga azi onzi emini ma alia 'dani. 18Azini vini 'ba o'duni o'bele Kristo ma alia 'diyi ja dri 'bo indi. 19Ama ka ovᴜ asi teza be Kristo ma alia kiri ewu amani ovᴜzᴜ idrirᴜ 'dorisi a'dule, e'yo amani ovᴜ candirᴜ tᴜ aga 'ba azini 'diyi dria ra. 20Te curu'do Kristo enga 'ba draza eselia 'bo, eri anyadri kapi oko 'ba o'du kopi 'diyi ma eseliari'i. 21Te drani ecale ndra 'basirisi, engata 'ba draza eseliari eca 'basi indi. 22A'disikᴜ ekile Adamu ma alia 'ba driani odralerile, 'dinile indi Kristo ma alia 'ba dria nga ovᴜ 'bazarᴜ idrirᴜ. 23Te 'ba dria alᴜ alᴜ yi paria 'yeke : anyadri kapi okori Kristo'i, vilerisi 'ba Kristoni 'diyi erini emviria. 24'vᴜtinia asizani, erini ngazᴜ suru nyaza fezᴜ Mungu Ata dri, erini opi nyaza dria pi ojazᴜ tokorᴜ dri ceza opini dria pie, okpo be dria 'boria. 25Te eri ma ovᴜ opirᴜ 'dani, de nga eri 'bani juru ini dria i ma pa agelea kᴜ. 26Juru erini ngale ojale tokorᴜ vile asizᴜri eri drani. 27A'disikᴜ kini, 'Ba afa dria eri pa agelea, eri ma e'yo erizᴜ. Te eri ka ‘yora, 'Ba afa dria e'yo erini erizᴜ 'bo, mi nga ni ra eri kilili kini 'ba afa dria 'bapi e'yo erini erizᴜri ace lᴜ 'bakokorᴜni. 28Te afa dria ka nga ovᴜ 'bazarᴜ e'yo erini erizᴜ 'bo, o'du 'dasi Mvini nga 'ba afa dria 'bapi e'yo erini erizᴜri ma e'yo eri indi, 'dini Mungu ma ovᴜ dria, afa dria ma alia. 29Ka 'dini kᴜ, 'ba baputizi bipi 'ba draza ma e'yosi 'diyi nga a'di 'ye ya? 'Ba draza ka enga alᴜni kᴜ, yi di baputizi bi yi ma e'yosi a'disi ya? 30Ama vini ama fe dra dri etu vᴜsi dria a'disi ya? 31Ma dra zuzu ada; ma 'yo 'dini, ma adripi, oyo sozᴜ asi afᴜ mani ma enyazᴜ e'yo eminisi Kristo Yesu Opi amani ma aliarisi! 32Ma ka ndra omba 'ba Efesoa nguru be, 'bani adrile 'yole-rile, ma nga a'di orodri isu ya? 'Ba draza ka enga kᴜ, ama ma nya, ama ma mvu, a'disikᴜ ama odra dru. 33'Ba ma ici emi kᴜ: Ti ecizᴜ 'ba onzi beri adriza onyirᴜri eza eza. 34Emi enga, onyi ma fu kani emini, emi ma 'ye e'yo onzi dika kᴜ. A'disikᴜ 'ba azini nini nga Mungu kᴜ. Ma 'yo e'yo 'diri drinza fezᴜ emi dri. 35Te 'ba azini nga 'yo ra kini, 'Ba draza enga ngoni ngoni ya? Azini, Yi emu rua ngonile be ya? 36Mi 'ba ondᴜa kokorᴜni! Afa mini sale mi'iri engani idrirᴜ kᴜ, ka dra kᴜria. 37Te afa mini saleri, mi sani ruani ngapi ovᴜpiri'i kᴜ, te oriefi a'dule, kani ondᴜ, kani ori ma sururi aziniri. 38Te Munguni rua fe eri dri ini lelerile, te ori dria alᴜ alᴜ dri eri rua yi vileri fe'i. 39Za dria ovᴜni trotro kᴜ, te 'ba ma za ndᴜ, anyapa za ndᴜ, aria za ndᴜ, e'bi za vini ndᴜ. 40Rua 'bua 'diyi yi indi, azini rua nyakua 'diyi vini indi ; te afa 'bua 'diyi ma diza eri ndᴜ, afa nyakua 'diyi ma diza eri ndᴜ indi. 41Diza etuni eri ndᴜ, diza mbaniri ndᴜ, diza 'bi'bioniri vini ndᴜ indi; te 'bi'bio alᴜ ma diza ovᴜ ndᴜ 'bi'bio aziniri ma diza be. 42Engaza 'ba draza ma eseliari eri 'dini indi. Sa eri mazarᴜ, enga eri makokorᴜ. 43Sa eri inzikokorᴜ, enga eri diza be. Sa eri okpo kokorᴜ, enga eri okpo be. 44Sa eri rua 'banirᴜ, enga eri rua orindinirᴜ. Rua 'bani ka ovᴜ indi, rua orindiniri alᴜ vini indi. 45Te eri ovᴜ ndra sizarᴜ 'dini kini, Agu oko Adamurᴜri ofᴜ ori idri berirᴜ; te Adamu vileri eri orindi idri fepiri'i. 46Te afa orindirᴜri ovᴜni okori'i kᴜ, te afa 'baniri'i; afa orindirᴜri nga efᴜ vilerisi ndo. 47'Ba okori ibi enga nyakua, eri irifᴜrani; 'ba iriri ibi enga 'bua. 48'Ba irifᴜrani 'diyi ovᴜ ekile 'ba irifᴜranirini ndra ovᴜlerile; 'ba 'bua 'diyi ovᴜ ekile 'ba 'buarini ovᴜlerile. 49Ekile amani 'ba irifᴜraniri ma wura ejilerile, 'dinile ama nga 'ba 'buari ma wura eji indi. 50Te ma 'yo 'dini, ma adripi, kini, rua ari beri econi suru Munguni nyazarᴜ i ma afarᴜ kᴜ, te afa mapi mari econi vini afa mapi kᴜri nyazarᴜ i ma afarᴜ kᴜ indi. 51Mi ndre! Ma emi dri e'yo zizarᴜri ece 'di. Ama dria ngani o'du ko kᴜ, te yi nga ama dria ma wura oja ndᴜrᴜ, 52coti mbelekocici, 'bani yi mile colerile, gᴜka asizᴜri ka nga wᴜ raria. Te gᴜkani nga wᴜ ra, 'ba draza yi nga enga makokorᴜ, azini yi nga ama wura oja ndᴜrᴜ. 53Rua ecopi mapi ra 'diri ma su rᴜa ecopi mapi kᴜri, azini rua ecopi drapi ra 'diri ma su rua ecopi drapi dika kᴜri. 54Te rua ecopi mapi ra 'diri ka nga rᴜa ecopi mapi dika kᴜri su 'bo, azini rᴜa ecopi drapi ra 'diri ka nga rua ecopi drapi dika kᴜri su 'bo, 'dini e'yo yini sile 'bori nga eca i paria 'yeke, kini: Ki dratani e'yo agaza ma alia 'bo. 55Dra la, e'yo agaza miniri ngoa ya? Dra la, iri mini 'ba dᴜzᴜri ngoa ya? 56Iri drani 'ba dᴜzᴜri eri e'yo onzini, azini okpo e'yo onzini eri azitani. 57Te awa'difo Mungu vᴜ, erini e'yo agaza fele ama dri Opi amani Yesu Kristosirisi. 58E'yo 'disi, adripi mani lele 'diyi, emi so pa kirikiri, yakokorᴜ, ovᴜzᴜ azi Opini be tre o'du dria, emini nile kini emi ecandini emi oye Opi ma alia kᴜrisi.

will be added

X\