1 KORINTOA 13

1Ma ka e'yo 'yo andre 'banisi, kani malaikanisi ra ti, te ka ovᴜ leta avasiri be kᴜ, ma eca ovᴜzᴜ mola wᴜpi wᴜrile, kani emve cole corile. 2Te ma ka e'yo olᴜ nabile, ka e'yo zizarᴜ 'diyi va dria, nita dria be, ma ka ovᴜ a'ita be dria 'dini mani ecozᴜ ani oni amborᴜ 'diyi onzezᴜ yi pariasi ra ti, te ma ka ovᴜ leta avasiri be kᴜ ma ovᴜ toko. 3Te ma ka afa mani fe dria nyaka awazᴜ 'ba aliorᴜ 'diyi dri, ma ka ma rᴜa fe evezᴜ acisi ti, te ma ka ovᴜ leta avasiri be kᴜ, orodrini ma dri yo. 4Leta avasiri eri asi teza be, eri asi ndriza be; leta avasiri ovᴜni ma'yalasi kᴜ; leta avasiri 'yoni e'yo afᴜsi kᴜ, ipini i afᴜsi kᴜ indi, 5eri 'yeni e'yo dri fupi 'ba milia kᴜri kᴜ, ndruni e'yo i vileri kᴜ, omvini e'yo aokosi kᴜ, egani e'yo onzi kᴜ; 6ovᴜni ayikosi e'yo onzisi kᴜ, te ovᴜ ayikosi e'yo adarᴜrisi; 7eri candi a'i dria asi tezasi, eri e'yo dria a'i a'itasi, eri asi 'baza be e'yo dria tezᴜ, eri ovᴜ asi e'yere be e'yo dria ma alia andekokorᴜ. 8Leta avasiri deni i kᴜ; te e'yo olᴜza nabirᴜ 'diyi nga yi de ra; e'yo 'yoza ti ndᴜ ndᴜsi 'diyi nga asi ra; nitani nga i de ra. 9Te ama kiri e'yo ma esele ni'i a'dule, azini ama kiri e'yo nabirᴜri ma esele olᴜ'i; 10te e'yo ecapi i paria tre 'bori ka eca ra, e'yo eselerᴜri nga i de ra. 11Mani ndra ovᴜria mvarᴜ ma adri ndra e'yo 'yo mvale, ma adri ndra e'yo ega mvale, ma adri ndra asisile dro mvale; te mani zoria agupirᴜ 'boria ma kᴜ e'yo mvaniri ja. 12Awa'dini, curu’do ama wura amani ndre mandara ma alia ndi ndi kᴜ, te o'du 'dasi ama nga ama ndre milia milia. Curu'do ma ni kiri e'yo ma eseleni'i a'dule ; te o'du 'dasi ma nga e'yo ni ekile yini ma nile 'borile. 13Te di e'yo na 'diyi indi, yi adri 'dani : a'itani, e'yo tezani, leta avasiri ; te agapi yi ma eselia ambori eri leta avasiri'i.

will be added

X\