1 KORINTOA 12

1Afa feza Orindini fele 'diyi ma e'yosi, ma adripi, ma leni emi ma ovᴜ e'yo niza kokorᴜ kᴜ. 2Emi ni ra, emi ka ovᴜ ndra jururᴜ, yi ce ndra emi dri wura inzile inzi ecopi e'yo 'yopi kᴜ 'diyi ma vᴜti bizᴜ, yini emi dri cele saarᴜrile. 3E'yo 'disi ma fe emi ma ni kini, 'ba azini e'yo 'yopi Orindi Munguni ma aliari 'yoni kini, Yesu ovᴜ trizarᴜ, 'dini kᴜ, azini vini 'ba azini 'yoni kini, Yesu eri Opi'i, 'dini kᴜ, pe lᴜ Orindi Alatararᴜrisi a'dule. 4Te afa feza ma suruti yi ndᴜ ndᴜ, te Orindi eri alᴜ 'da'i ; 5te azi 'ba aza kozᴜ 'diyi ma sururi ndᴜ ndᴜ, te Opi eri alᴜ 'da'i; 6te okpo azi ngazᴜ 'diyi ma suruti yi ndᴜ ndᴜ indi, te Mungu afa dria 'yepi okposi e'yo dria ma aliari alᴜ 'da'i. 7Te fe e'daza Orindini i e'dazᴜri 'ba dria alᴜ alᴜ dri, 'ba aza kozᴜ ani beni. 8'Ba alᴜri dri fe e'yo 'yoza ondᴜaniri Orindi ndesi, 'ba aziniri dri fe e'yo 'yoza nitaniri Orindi nde vᴜsi, 9'ba aziniri dri a'itani Orindi nderi ma alia, 'ba aziniri dri feta 'ba ma rua atizᴜ 'diyi Orindi nde alᴜri ma alia, 10'ba aziniri dri okpo tali 'yezᴜ 'diyi, 'ba aziniri dri e'yo olᴜzᴜ'i, 'ba aziniri dri e'yo orindi 'diyini amazᴜ-ri'i, 'ba aziniri dri e'yo 'yozᴜ ti ndᴜ ndᴜrᴜsiri'i, 'ba aziniri dri e'yo 'yole ti ndᴜ ndᴜsiri ojazᴜri'i. 11Te 'ye e'yo 'diyi dria Orindi nde alᴜ 'dari ma okposi, erini e'yo ndᴜ ndᴜ awaria 'ba dria alᴜ alᴜ dri ekile erini lelerile. 12Ekile ruani ovᴜle alᴜ, te esele be kakaᴜrile, azini esele ruani dria ovᴜpi kakaᴜ 'diyini yi ecile rᴜa alᴜrᴜrile, Kristo ovᴜ 'dinile indi. 13A'disikᴜ Orindi alᴜ ma alia ama dria a'i baputizi amani fizᴜ rua alᴜ ma alia, kani 'ba Yahudini kani 'ba Girikini, kani ati'barᴜ kani kari-anzirᴜ, fe ama driani Orindi alᴜ mvᴜzᴜ'i. 14A'disikᴜ rᴜa ovᴜni lᴜ esele alᴜ kᴜ, te kakaᴜ. 15Pa ka 'yo ra kini, Mani ovᴜle gi'i kᴜrisi, ma ovᴜni rua ma eselerᴜ kᴜ; te e'yo 'disi ovᴜni kini eri ovᴜni rᴜa ma eselerᴜ kᴜ, 'dini kᴜ. 16Te bi ka 'yo ra kini, Mani ovᴜle mile'i kᴜrisi ma ovᴜni rᴜa ma eselerᴜ kᴜ; te e'yo 'disi ovᴜni kini eri ovᴜni rᴜa ma eselerᴜ kᴜ, 'dini kᴜ. 17Rua dria ka ovᴜ mile efi'i, e'yo erizᴜri ngoa ya? Rua dria ka ovᴜ e'yo erizᴜri'i, afa aji nguzᴜri ngoa ya? 18Te di Mungu 'ba rua ma esele 'diyi dria alᴜ alᴜ rua ma alia ekile erini lelerile. 19Te esele dria ka ovᴜ esele alᴜ, rua nde ma pirᴜri ngoa ya? 20'Dini esele ovᴜ kakaᴜ, te ruani alᴜ. 21Te econi mileni e'yo 'yozarᴜ gi tia kini, E'yo mani lele 'yele misini yo, 'dini kᴜ; dri econi vini 'yozarᴜ pa tia kini, E'yo mani lele 'yele emisini yo, 'dini kᴜ. 22Te rua ma esele amani egale yi okpo be were 'diyi ma e'yo ovᴜ amborᴜ tᴜ aga ra, 23te rᴜa ma esele amani egale kini inzita yini were 'diyi, ama yi osu inzitasi aga ra, te rua amani ma esele e'dapi onyirᴜ kᴜ 'diyi ovᴜ rᴜa ma onyi be aga ra, 24te rᴜa amani ma esele e'dapi onyirᴜ 'diyi leni onyi azini drinia kᴜ. Te Mungu eci rᴜa nde dria tualᴜ, inzita agapiri fezᴜ esele inzita kokorᴜri dri, 25esele coza ma ovᴜ ani rua ma alia kᴜ beni, te rua ma esele dria ma 'ba yi asi yi aza kozᴜ yi eselia dria tro tro. 26'Dini esele alᴜ ka ovᴜ candi be, esele dria ovᴜ candirᴜ eri be ; kani esele alᴜ ka ovᴜ inzizarᴜ, esele dria ovᴜ ayikosi eri be. 27Te emi ovᴜ rua Kristoni, emi alᴜ alᴜ ovᴜ rua nde ma eseleni. 28Te Mungu ope 'ba azini kanisa alia 'dini, okorisi 'ba ti opele 'diyi, iririsi 'ba e'yo nabirᴜ olᴜpi 'diyi, narisi 'ba 'ba imbapi 'diyi, vᴜtinia 'ba tali 'yepi 'diyi pi, vᴜtinia 'ba afa feza 'ba rua atizᴜri be 'diyi pie, 'ba 'ba aza kopi 'diyi pie, 'ba 'ba dri cepi 'diyi pie, 'ba e'yo 'yopi ti ndᴜ ndᴜsi 'diyi pie dria. 29'Ba dria yi 'ba ti opele 'diyirᴜ ya? 'Ba dria yi 'ba e'yo nabirᴜ olᴜpi 'diyirᴜ ya? 'Ba dria yi 'ba 'ba imbapi 'diyirᴜ ya? 'Ba dria yi 'ba tali 'yepi 'diyirᴜ ya? 30'Ba dria yi afa feza 'ba atizᴜri be ya? 'Ba dria yi e'yo 'yo ti ndᴜ ndᴜsi ya? 'Ba dria yi ti oja ra ya? 31Te emi ma le ovᴜzᴜ afa feza agapi ra 'diyi be avasi. Te ma ece emi dri geri onyirᴜ tᴜ agapi rari 'di.

will be added

X\