1 KORINTOA 11

1Emi si emi 'yetasi male, ekile mani ma sile 'yetasi Kristolerile. 2Te ma inzi emi emini ma egale e'yo driasirisi, azini emini imbata ta mbale ekile mani yi fele emi dririle-risi. 3Te ma le emi ma ni ra kini 'ba dria alᴜ alᴜ ma drirᴜ Kristo'i, okᴜ ma drirᴜ agupi'i, Kristo ma drirᴜ Mungu'i. 4'Ba dria alᴜ alᴜ Mungu zipi kani e'yo olᴜpi dri a'bᴜzarᴜ beri eri drinza fe dri ini dri ra, 5te okᴜ dria alᴜ alᴜ Mungu zipi kani e'yo olᴜpi dri a'bᴜ kokorᴜri eri drinza fe dri ini dri—te eri dri tro tro ekile eri fazarᴜrile. 6A'disikᴜ okᴜ azini ka i dri a'bᴜ kᴜ, ma li i dribi va; te dribi lizᴜ va kani fazᴜ fari ka ovᴜ drinzarᴜ okᴜ vᴜ, ma a'bᴜ i ma dri ci. 7Te agupi ma a'bᴜ i dri kᴜ ada, erini ovᴜle wura azini diza Mungunirisi; te okᴜ ovᴜ diza agupini. 8(Te agupi engani okᴜ vᴜ kᴜ, te okᴜ enga agupi vᴜ. 9'Ba-ni vini agupi okᴜ ma e'yosi kᴜ, te 'ba okᴜ agupi ma e'yosi.) 10E'yo 'disi okᴜ ma ovᴜ eceta okpo eri ma driliari ma e'yo ecezᴜri be i ma dria, malaika ma e'yosi. 11(Te e'yo yo, okᴜ soni pa agupi kokorᴜ kᴜ, azini vini agupi soni pa okᴜ kokorᴜ kᴜ, Opi ma alia; 12te okᴜni engale agupi vᴜrile, 'dinile agupi indi yi di efᴜ okᴜ ma alia. Te afa dria enga Mungu vᴜ.) 13Emi ma ama e'yoni emi ngᴜlᴜpisi ceni; eri onyirᴜ okᴜ ma zi Mungu tia dri be a'bᴜ kokorᴜ ya? 14Adriza 'bani imbani emi ceni kᴜ, agupi ma dribi ka du izᴜrᴜ, 'diri ovᴜ drinzarᴜ eri dri, 'dini kᴜ ya? 15Te okᴜ ma dribi ka du izᴜrᴜ, 'diri diza eriniri'i; fe dribi eri dri bongo 'beza ma paria. 16Te 'ba azini ka le agata ga e'yonisi, ama ovᴜni adriza 'dinileri be kᴜ, azini kanisa Munguni yi adrini 'ye 'dinile kᴜ indi. 17Te mani e'yo 'diri aziria emi tia, ma inzini emi kᴜ, a'disikᴜ emi adri emi okᴜ tualᴜ emini zozᴜ onyisi kᴜ, te onzisi. 18E'yo okori 'di, ma eri kini emini emi okᴜria kanisa ma alia, esele eoza emi eselia indi; te ekile ma a'i e'yo 'diyi rale. 19Te imbata inzorᴜ ma ovᴜ emi eselia indi, 'ba o'bile 'bo 'ba adarᴜ 'diyi ma nga yi e'da ani emi eselia beni. 20E'yo 'dirisi emini emi okᴜria tualᴜ, emi okᴜni emi nyaka Opini nyazᴜ'i kᴜ. 21A'disikᴜ emini nya-ria 'ba dria alᴜ alᴜ nga ji nyaka i vileri nya so oko, 'dini 'ba azini ovᴜ abiri be, aziniri ati afa mvuzasi. 22Hai! Jo emini nyaka nyazᴜ azini afa mvᴜza mvuzᴜni yo ya? Kani emi kanisa Munguni ede afa tokole, emi vini drinza fe 'ba afa kokorᴜ 'diyi dri ya? Ma nga emi tia a'di e'yo 'yo ya? Ma nga emi inzi ra ya? Te ma inzini emi e'yo 'dirisi kᴜ. 23Te e'yo mani fele emi driri, ma a'i ndra Opi vᴜ, kini, Opi Yesu 'du mikate ini yini eri ma o'di nyazᴜ 'darisi; 24te eri ka awa'difo fe 'bo, eri anyo aleni ra, 'yo ra kini, 'Diri rᴜa mani, mani fele emisiri'i. Emi 'ye e'yo 'diri e'yo mani egazᴜ. 25Nyaka ma vᴜtia eri 'du okele 'dinile indi, kini, Okele 'diri eri aziza o'dirᴜ ari mani ma aliari'i. Emi 'ye e'yo 'diri paleko dria emini mvuria, e'yo mani egazᴜ. 26Te paleko dria emini mikate 'diri nyaria, azini okele 'diri mvuria, emi drata Opini ece, de nga eri ecani kᴜ. 27E'yo 'disi 'ba azini ka mikate nde nya, kani ka okele Opini mvᴜ, de adriza erini funi dri kᴜ, e'yo erini rua Opini pi ezazᴜ arini beri nga ovᴜ eri ma dria. 28Te 'ba ma o'bi e'yo i vileri oko, 'dinile ma nya mikate nde ma azi, ma mvu okele nde ma alia ndo. 29Te 'ba ka nya ra, ka mvᴜ ra, rua ma e'yo vakokorᴜ, eri e'yo liza nya azini mvu i ngᴜlᴜpi ma ruaa ceni. 30E'yo 'dirisi 'ba kakaᴜ emi eselia ovᴜ okpo kokorᴜ, azini adaza-rᴜ, azini vini 'ba fudri ci ko o'du 'bo. 31Te ama ka e'yo amaniri va ra, yi ngani te e'yo amani li kᴜ. 32Te ka e'yo amani li ra de Opini ama co imbatarᴜni, kazᴜ e'yo amani lizᴜ onzi wudrikuru be kᴜ. 33E'yo 'disi, adripi mani, emini emi okᴜria tualᴜ nyaka nyazᴜ, emi te emi azini. 34'Ba azini ka ovᴜ abiri be, eri ma nya i vile joa; emi kazᴜ emi okᴜzᴜ e'yo liza isuzᴜ'i kᴜ. Te ma nga e'yo acepi 'diyi ede mani ngaria ecaria.

will be added

X\