1 KORINTOA 10

1Te ma leni emini ovᴜzᴜ nita kokorᴜ kᴜ, ma adripi, kini ama a'bipi dria ovᴜ ndra iriti nderi ma etia, te yi dria zo miri ma aliarisi, 2yi dria a'i ndra baputizi Musa vᴜ iriti pi ma alia miri be, 3yi dria nya ndra nyaka alᴜ orindiniri, 4te yi dria mvu ndra afa mvuza alᴜ orindiniri. A'disikᴜ yi mvu yi efᴜpi Oni orindini yi vᴜti bipiri ma aliasiri ra, te Oni nderi Kristo'i. 5Te Mungu ovᴜni ayikosi 'ba azini karakaraᴜ yi eselia 'diyi ma e'yosi kᴜ; te ja yi dri angᴜ roko driaria. 6E'yo 'diyi yi ovᴜ ecetarᴜ ama dri, ama kazᴜ li 'bazᴜ e'yo onzisi yini ndra li 'balerile kᴜ. 7Emi ma ovᴜ 'ba wura toko inzipi 'diyirᴜ, 'ba azini yi eselia 'diyile kᴜ; erini ovᴜle sizarᴜrile kini, 'Ba ri va nyaka nyazᴜ, afa mvuza mvuzᴜ, nga enga vini avita avizᴜ ndo. 8Te ama ma 'ba ali, 'ba azini yi ma eselia 'diyini o'balerile kᴜ; yi odra ani o'du alᴜ ma alia 'ba alifᴜ kali iri drini na. 9Te ama ma o'bi vini Opini, 'ba azini yi eselia 'diyini o'bilerile kᴜ ; yi ja dri urini yi ogalerisi. 10Emi ma ono vini ekile 'ba azini yi eselia 'diyi-ni onolerile kᴜ; yi ja dri ani 'Ba 'ba dri Japiri dri. 11E'yo 'diyi 'ye yi yi vᴜ ecetarᴜ, si yi ama dri ama'i 'ba ecapi o'du ewu driani dri fuzᴜri ma tia 'diyi imbazᴜ. 12E'yo 'disi 'ba osupi kini i pa so ciri ma ovᴜ mile be i kazᴜ 'dezᴜ va kᴜ. 13Obeta azini isuni nga emi alᴜni kᴜ, pe lᴜ adripi 'ba dria obepiri'i. Te Munguni adarᴜ, eri ngani kᴜ obeta emi okpo agapi rarini emi obezᴜ kᴜ, te obeta nde be tualᴜ eri nga geri emini fᴜzᴜri ede, eco emini eri agazarᴜ asi tezasi ani. 14Ka'dini 'ba mani lele 'diyi, emi ma apa inzita wura toko inzizᴜrisi. 15Ma 'yo ekile 'ba ondᴜarᴜ ma tiarile ; emi ma ama e'yo mani 'yoleri emi'i. 16Okele nde asi ndrizani amani asi ndriza fele driniari ovᴜni ti ecita ari Kristoni beri'i kᴜ ya? Mikate nde amani nyoleri ovᴜni ti ecita rua Kristoni beri'i kᴜ ya? 17Te mikatini ovᴜle alᴜrisi, ama'i ovᴜpi kakaᴜ ama rua alᴜ, ama driani mikate alᴜ nde ma esele 'dule nyale-risi. 18Emi lu 'ba lsraelini e'yo ruanisi; 'ba edeta ma afa nyapi 'diyi yi ecini ti pari edeta edezᴜria kᴜ ya? 19Ka'dini ma e'yo ngonini 'yo ra? Kini afa fele wura inzile inziri driri ovᴜ afa adarᴜ ya, kani wura nderi ovᴜ afa adarᴜ ya? 20'Dini yo, te kini afa 'ba juruni fele edetarᴜ 'diyi yi fe orindi onzi 'diyi dri, feni Mungu dri kᴜ. Te ma leni emini ti ecizᴜ orindi onzi be kᴜ. 21Econi emini okele Opini mvuzarᴜ okele orindi onzini be kᴜ. Econi emini afa nyazarᴜ mesa Opini pi ma tia mesa orindi onzini be kᴜ. 22Ama nga fe Opi ma asini dra ma'yala 'bazᴜni ya? Okpo amani aga eriniri ra ya? 23Azita a'i e'yo dria ra, te e'yo dria funi dri onyirᴜ kᴜ. Azita a'i e'yo dria ra 'bo, te e'yo dria feni 'bani zozᴜni kᴜ. 24'Ba alᴜni ma ndru e'yo i ngᴜlᴜpi ma aza kozᴜri kᴜ, te e'yo 'ba azini ma aza kozᴜri'i. 25Emi nya afa dria 'bani ozile pari za lizᴜria 'diyi, e'yo ziza ozizᴜ e'yo niza emini ma e'yosi kᴜ ; 26nyaku pi afa alenia 'diyi be dria yini ovᴜle Opi ma afarisi. 27'Ba a'ipi kᴜ 'diyi ma azi alᴜ ka emi omve omu nyazᴜ, te emi le mu ra, emi nya afa dria erini 'bale emi drilia 'diyi, e'yo ziza ozizᴜ e'yo niza emini ma e'yosi kᴜ. 28(Te 'ba azini ka 'yo emi tia kini, Za 'dori ovᴜ fezarᴜ edetarᴜ 'bo; emi ma nya kᴜ 'ba e'yo ecepi nderi ma e'yosi, e'yo nizasi indi 29ma 'yoni e'yo niza miniri kᴜ, te agu 'darini.) Te e'yo trᴜza mani ovᴜ lizarᴜ 'ba azini ma e'yo nizasi a'disi ya? 30Ma ka nya awa'difo be, yi ma aji di afa mani awa'difo fele driniari ma e'yosi a'disi ya? 31Awa'dini, emi ka nya ra, ka mvu ra, kani afa ngoni 'ye ti, emi 'ye afa dria diza fezᴜ Mungu dri. 32Emi ma 'ba kᴜmᴜ 'ba Yahudini piyi dri, 'ba Yunanini pie, kanisa Munguni pie dria kᴜ, 33ekile ma'i indi, mani o'bile ayiko fele 'ba dria dri e'yo driasirile, ma ndani e'yo ma ngᴜlᴜpi ma aza kozᴜri kᴜ te 'ba kakaᴜ ma aza kozᴜ, 'dini yi ma isu ani pata beni.

will be added

X\