Lúkas 1

1Tiofil, woómóomo u ɔɔcɔ ! O ŋoó menyi anyía baacɔ beéŋí ŋa bɔ́ bɛ́kánáka ɔwɔɔ́ŋɔ tufule a bɛsana a bɛ́ ŋaá bɛ́kɛ́láka aasɔ́ ɛ ɛkatɛ́katɛ́. 2Bé ŋe bú biíbi ɔɔ́ŋɔ́kɔ háyɛ baacɔ e bé ŋe bú biíbi lɛcáka e nyitúme ŋa bɔ́ basɔ́ láákɛ́na; beébe eébé bá ŋa bɔ́ bá behúli Ambányɛ yɛ́ Ɛsɔ́ma. 3Aámbáya, yaŋɔ́ tɔ́na ɛ ŋa mɛ́ bátaka, míɔ waambaka bɔmbányɛ bɔmbányɛ anyía yémi menyí anyána bɛsana eébí bikime ŋaa bɛ́kɛ́láka o otúme e nyitúme. Búo mi bílénékíne buéŋí anyía yémi o tóŋgínyi anyána bɛ́ ŋaá bɛ́kɛ́láka. 4Yaátɛ́ asana o kóó menyi taaká cɛ́ bɛsana ecí bé ŋo yóo weékúnyíki. 5Ɔ mɔɔ́sɛ́ emé Elóot ŋaá bá otéŋí ú iisí ci Besuif, mululi nyiínjie a mumɔtɛ́, nyiínyi anyía Sakali. U ŋaá bá ɔɔcɔ u ɔlɔŋɔ ú beluli nyiínjie ú Abiya; oónyí ŋaá bá itónyi cɛ Aálɔn, nyiínyi ɛ́cɛ Ɛlɛ́sabɛt. 6Bá ŋa bɔ́ bá bekime béfendí bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́, bá látákɛ́na bɔmbányɛ bɔmbányɛ ne bikotí bikime ne esúŋe ekime cá Bandɔ́mɛsɛ́. 7Ta híáná, bɔ́ tɛ ɔ́mɔ bɔ́ bá na ɔɔ́nɔ́, anyía Ɛlɛ́sabɛt ŋaá bá ahúátá, beébe bekime béfendí belúnénú. 8Búmɔtɛ́ buɔ́sɛ́ Sakali ŋaá bá wɔ nyíɔkɔ búáyɛ́ buólí eé Ciíbe cɛ Bandɔ́mɛsɛ́, anyía nyihiite nyí buólí nyí uúbú ɔlɔŋɔ ú beluli nyiínjie nyɛ́ ŋaá bá. 9Ɔɔsɔ yí buólí yí beluli nyiínjie ŋaá bá anyía bá táfa mululi nyiínjie a mumɔtɛ́ a mú á nyɛmána mu oluliki bɔɔlɔ. Aáná bá ŋaá táfá Sakali anyía wé oofine eé Ciíbe ci Otéŋí a Waáŋá o okoluli bɔɔlɔ. 10Ekúlú ayɛ́ bá náŋa bé lúliki bɔɔlɔ, nyɛkɔca nyɛ́ baacɔ nyikime bɛ́cɔ́kɔ́lɔ́kɛ́na Bandɔ́mɛsɛ́ a nɔháatɛ́. 11Ekúlú eéyé Sakali ŋaá lɛ́ca elilé yɛ́ bɔsɔ́ma yí Otéŋí a Waáŋá atálɛ́mánánɔ́ a aháŋá yɛ́ ɔɔbɔ́ ú manɔ́mɛ ú haála ahá bá náŋa bé lúliki bɔɔlɔ. 12Ɛ́makɛ́la Sakali é yiíyi lɛ́ca, u ŋa bálátána, bulíkílíki ŋé wuúci tímbíé. 13Mbá elilé yɛ́ bɔsɔ́ma yɛ́sɛ: «Eti líkíméke, Sakali, Bandɔ́mɛsɛ́ maá lɔ́kɔ́ma uúwe ɔbɛ́cɔ́kɔ́lɛ́na, uúwe oónyí Ɛlɛ́sabɛt kéé bíéne ɔɔ́nɔ́ ɔnɔ́mɔcɔ́, wó wuúci lɔá nyiínyi anyía Sáaŋ. 14O kóó bílénéke buéŋí, baacɔ bé etémbí beéŋí ké bú bílénéke tɔ́na a asana na nyíáyɛ́ nyibíbíéne. 15Yááŋa anyía u káá bá akɛ́ndánɔ́ yɛ́ ɔɔcɔ a nyɛlɛca nyí Otéŋí a Waáŋá. U ti ké búle á múána meluku mekime e mé ŋe hiíténe. U káá bá onyíóyónó ne Efúúménénú yí Elilé o otúme a tɔɔna tú iinyí. 16U káá kɛla anyía baacɔ beéŋí bé Islayɛ́l á ka hálɔ́mɔ́na, mbá bá cɔ́baka ná ciabɔ́ Síkíne Bandɔ́mɛsɛ́. 17U káá cáŋa a faaya né Otéŋí a Waáŋá. U káá bá onyíóyónó ne Elilé yɛ́ Bandɔ́mɛsɛ́ na makɛ́nda bɔkɔ búmɔtɛ́ háyɛ muhémúnyi bɛsana Éli, anyía wɔ́ kɔ́ŋɔ́náka ɛtɛ́má cí síkíne o oléne báábɔ́ baáná, yó lébéke ba-tɛ-lɔ́kɔ́mɛ́na Bandɔ́mɛsɛ́ anyía bá bámɔ́kɔ́na ne injiŋé, bɔ́ bɛ́cáŋáka bɛtálɛ́mánánɔ́ bɛ́ baacɔ. U káá bándáka bunɔŋɔ bɔ́ baacɔ a bɔ́ káá bá bɔbɛ́tábɔ́nákánɔ́ o onyemi Otéŋí a Waáŋá.» 18Mbá Sakali ɔsɛ: «Aátɛ́ yí kéé mi tóŋínyi anyía asana eéyé áŋa taaká e? Yaŋɔ́ ooci elunyí yɛ́ ɔɔcɔ, uumi oónyí na tuɔŋɔ tuéŋí.» 19Mbá elilé yɛ́ bɔsɔ́ma yɛ́sɛ: «Ya mɛ́ŋa Kabiliyɛl, ɛ náŋa yámɛ tálɛ́mákɛ́na eé buúse bɔ́ Bandɔ́mɛsɛ́ o o wuúci kɛlɛna masɔ́ma; wuúci wá mɛ tɔ́ma nɔ́ɔ́wɔ anyía yámɛ ɔ laána ambányɛ yɛ́ ɛsɔ́ma eéyé. 20Mbá kuɔŋɔ́ te olumitinine maamɛ mehúnyi, meéme eémé ma káá bɛ́kɛ́láka e ekúlú ayɛ́ á yɛnyɛmánánɔ́; yaátɛ́ asana o kóó limine múkúmúku, a tɛ táŋa, ɔ ɔkɔɔ́háma buɔ́sɛ́ abɔ́ bɛsana eébí ká bɛ́kɛ́láka.» 21Ekúlú eéyé, nyɛkɔca nyɛ́ baacɔ a nyɛ́ ŋaá bá nyɛ́ á tátáka Sakali ŋeé kéké, anyía u ŋeé líhéke buéŋí eé Ciíbe cɛ Bandɔ́mɛsɛ́. 22Mbá ayɛ́ ú ŋa háma a nɔháatɛ́, u tɛ háná táŋa ne beébe; aáná bé ŋe bú menyí anyía wáŋa ɔlɛcánɔ́ ekéki yɛ́ bɔkɔ eé Ciíbe. U ŋaá bá wá táŋáka ne beébe hú na aabá, u ŋé limíne múkúmúku. 23Yɛ́ ŋaá bá anyía ekúlú ayɛ́ Sakali ŋaa máná mááyɛ́ mɔɔ́sɛ́ me buólí eé Ciíbe cɛ Bandɔ́mɛsɛ́, u ŋá hálɔ́mɔ́na e úúyé ooki. 24E elime cɛ bɛsana eébí, Ɛlɛ́sabɛt uuyé oónyí ŋé híite nyifume; u ŋé limíne e úúyé ooki iílí ɛ́táánɔ, u tɛ háma, u kɔɔnaka ɔsɛ: 25«Otéŋí a Waáŋá meé mi kétunyi aámbáya, anyía ú maá mɛ aáŋíá aatɔ́ ɔlama eé buúse bɔ́ baacɔ.» 26I iílí ítíndétú e elime cɛ bɛsana eébí, Bandɔ́mɛsɛ́ ŋaá tɔ́ma elilé yɛ́ bɔsɔ́ma Kabiliyɛl a bunɔŋɔ a búmɔtɛ́ bɔ́ Kalilé, nyiínyi ɛ́cɛ Násalɛt, 27o ooki ú ɔbɔ́la ewú ú ti ŋéé ményí banɔ́mɔcɔ́, nyiínyi ɛ́cɛ Malíi; u ŋaá bá ɔkɔŋɛna yɛ́ ɔɔcɔ u hɛnyɛ́nɔ́ hɛ́ Táfit, nyiínyi ɛ́cɛ Yɔ́sɛb. 28Elilé yɛ́ bɔsɔ́ma ŋá cɔ́ba nááyá mbá yɛ́sɛ: «I ŋe mí o téŋíti ! Otéŋí a Waáŋá mó yóo boosiki, wáŋa na kuɔŋɔ́.» 29Aáná injiŋé cí Malíi ŋeé nyíme e mehúnyi eémé; u bɛ́bátáka ɔsɛ mbá nyɛnamá nyí mutéŋínyi nyɛ́ yaátɛ́ eenyi e? 30Mbá elilé yɛ́ bɔsɔ́ma yɛ́ Bandɔ́mɛsɛ́ yɛ́sɛ: «Eti líkíméke, Malíi, anyía Bandɔ́mɛsɛ́ ŋɔ́ yɔ́ɔ kɛla bɔmbányɛ. 31O kóó hiíte nyifume, wó bíéne ɔɔ́nɔ́ ɔnɔ́mɔcɔ́ awɔ́ ɔ kɔ́ɔ́ lɔá nyiínyi anyía Yésus. 32U káá bá ɔɔcɔ a waáŋá, bé wuúci lɔ́ŋɔ́kɔ anyía Ɔɔ́nɔ́ u Bandɔ́mɛsɛ́ a wáŋa fáátɛ ɔ Ɔmuaná. Otéŋí a Waáŋá Bandɔ́mɛsɛ́ kéé wuúci limisinyi a nɔkɔná nɔ́ cíáyɛ́ sɔ́kɔ́nɔ́ Táfit. 33U kéé téŋgínyi baacɔ bé Islayɛ́l e bikúlú bikime; búáyɛ́ Butéŋí tɛ káá mana ta buɔ́sɛ́.» 34Mbá Malíi ɔsɛ né elilé yɛ́ bɔsɔ́ma: «Anyána ya mɛ́ŋa wu obíéne, yaŋɔ́ tɛ́ka ne omenyi banɔ́mɔcɔ́ e?» 35Elilé yɛ́sɛ: «Efúúménénú yí Elilé káá fáaya nɔ́ɔ́wɔ, wó hiite nyifume. Yaátɛ́ asana ɔɔ́nɔ́ ewú u kéé bíbíéne káá bá ofúúménénú, wuúci Ɔɔ́nɔ́ u Bandɔ́mɛsɛ́. 36Lɛcá ! Ɛlɛ́sabɛt awɔ́ nua nɔ́ŋa eé yiíbe ne wuúci ŋeé hííte nyifume hɛ́nánɔ iílí ítíndétú. Ta yɛ́ cáŋa á bá anyía u ŋaá bá ú me lune, u kéé bíéne ɔɔ́nɔ́ ɔnɔ́mɔcɔ́, wuúci awɔ́ bá ŋaá lɔ́á nyiínyi anyía ahúátá yí oónjú. 37Menyi anyía Bandɔ́mɛsɛ́ áŋa wu ɔkɛlaka bɔkɔ bukime.» 38Malíi ɔsɛ: «Ya mɛ́ŋa munyiɔnɔ mu Otéŋí a Waáŋá, yá bɛ́kɛ́láka híáná náámɛ háyɛ ɔ́ mɔɔ́ kɔɔna.» Elilé yɛ́ bɔsɔ́ma yɛ́ Bandɔ́mɛsɛ́ nyisúéte eényí. 39E elime eécí, Malíi ŋa hátɔ́na, yó tényí cɔba a tɔkɔndɔ a bunɔŋɔ a bɔ́mɔtɛ́ bú Yuté. 40Ɛ́makɛ́la ú kaáhámá, u ŋó oofíne o ooki ú Sakali, u ŋé téŋíti Ɛlɛ́sabɛt. 41Hú ayɛ́ u ŋeé wuúci téŋíti, ɔɔ́nɔ́ ŋé bínyíétínyi a tɔɔna tɔ́ Ɛlɛ́sabɛt. U ŋó nyíóyo ne Efúúménénú yí Elilé, 42u ŋé túme ɔtáŋa buáŋá ɔsɛ: «Bandɔ́mɛsɛ́ mɔ́ yɔ́ɔ sáyabɛna ɔ ɔhɔla beénjú bekime. Bíáyɛ́ bɛsaya áŋa ná ɔɔ́nɔ́ ewú o kóó bíéne ! 43Ya mɛ́ŋa nyɛnamá nyi oónjú nyɛ́ yaátɛ́ enyí iinyí ci uumi Otéŋí áŋa wu ɔfaaya náámɛ e? 44Ɛ ŋa mɛ́ ɔ laana anyía hí ekúlú eyí óo mi téŋíti, ɔɔ́nɔ́ ŋé bínyíétínyi ne obíléne aámɛ a tɔɔna. 45Ɔ ɔ́ŋa ɔmbányɛ anyía ó moó lumitinine anyía bɛsana ebí elilé yɛ́ bɔsɔ́ma yɛ́ Bandɔ́mɛsɛ́ ŋɔ yɔ́ɔ laakɛna e nyiínyi nyɛ́ Bandɔ́mɛsɛ́ káá bɛ́kɛ́láka.» 46Malíi ɔsɛ: «Úúmi ɔtɛ́má ŋe nyémi buáŋá bú Otéŋí a Waáŋá. 47Aáná yáámɛ́ elilé ŋe bíléníne buéŋí Bandɔ́mɛsɛ́, muamɛ Munohi, 48anyía u ŋáa mɛ bɛ́táá, yaŋɔ́ muayɛ́ munyiɔnɔ e muénjú eémi e nyilimíné e nyitíkítíki; o otúme aámbáya, tɔɔya tɔ́ baacɔ tukime ké búle aá mɛ lɔ́ŋɔ anyía oónjú u ɛbɔla, 49anyía Bandɔ́mɛsɛ́ Alámakɛ́nda áŋa ɔ mɛ kɛlákánɔ́ bɛmbányɛ bɛ́ bɛsana. nyíáyɛ́ nyiínyi áŋa nyifúúménénú. 50Yááyɛ́ ambányɛ yɛ́ ɔtɛ́má áŋa a tɔɔya tɔ́ baacɔ tukime e tú ŋé wuúci kéke. 51Wáŋa na makɛ́nda ma ɔkɛlaka bɛandándá bɛ́ bɛsana; u ŋa sása baacɔ a bá bɔ́ŋa na bumálá a bɛsana abɛ́ bá ŋa bɔ́ bɛ́táá e cííbú ɛtɛ́má. 52U ŋa yááŋía baacɔ bá makɛ́nda a túábɔ́ tɔkɔná, yó béétíki eebe e bé ŋe bú bílóosi. 53U ŋe yíínjie bɛnyɛ́ma bɛ́ ɔnyíá biéŋí ná baacɔ abá ɛcaná ŋá nuana, mbá u ŋɔ yɔ́ɔŋɛ́na ɛnɔ́mɛ cɛ́ baacɔ, cíɔ́ hálɔ́mɔ́kɔ́na aabá éfendí. 54Ú mɔ yɔ́ɔ́lɛ́ta Islayɛ́l, muayɛ́ munyiɔnɔ, anyía u tɛ ɔ́mɔ́ bɛ́hɔ́ya otóŋínyi yááyɛ́ ambányɛ yɛ́ ɔtɛ́má 55na ná Abɛ́laham ne né uuyé ɔɔ́nɔ́ bikúlú bikime háyɛ ú ŋaá bɛ́tánɛ́na cíísú sɔ́kɔ́nɔ́.» 56Aáná Malíi ŋe límékíne o ooki ú Ɛlɛ́sabɛt hoóhi iílí ɛ́tátɔ́, nyɛhálɔ́mɔ́na eényí a búáyɛ́ bunɔŋɔ. 57Ekúlú ayɛ́ Ɛlɛ́sabɛt ŋa nyɛ́mana wu obíéne ŋa kaáháma, u ŋé bíéne ɔɔ́nɔ́ ɔnɔ́mɔcɔ́. 58Aáná na baacɔ a bá ŋa bɔ́ bá hoóhi ne wuúci na baacɔ bá yááyɛ́ yiíbe ŋa bɔ́ lɔ́kɔ́máká bé bíkétiki anyía Otéŋí a Waáŋá ŋeé wuúci bɛ́cáma mahana buéŋí, bé ŋé túme obíléne ɔlɔŋɔ. 59Ɔ mɔɔ́sɛ́ manamanyɛ́, bá ŋa bɔ́ cɔ́bá o okoó wuúci aaca; bá ŋa sɛ́ bébú wuúci lɔá nyiínyi anyía Sakali, nyiínyi nyí síkíne. 60Mbá iinyí ɔsɛ: «Eéʼeé, nyíáyɛ́ nyiínyi káá bá anyía Sáaŋ.» 61Baacɔ báyɛ: «Ta ɔɔcɔ oówo eé ciíbe cɛ baacɔ tɛ á bá ne nyiínyi eényí.» 62Bá ŋá báta síkíne na aabá anyía anyána ú ŋa yáamba o búle lɔ́ŋɔ uuyé ɔɔ́nɔ́ e? 63Aáná Sakali ŋa báta anyía bé wuúci íínjíé táfɛ́lɛ, bé ŋé iínjíé; u ŋɔ́ ɔ́ɔ́ŋɔ́kɔ ɔsɛ: «Nyíáyɛ́ nyiínyi áŋa Sáaŋ.» Aáná bekime ŋe bú kéké. 64Hí e ekúlú eéyé Sakali ŋa háná é túmé ɔtáŋa, u nyemiki Bandɔ́mɛsɛ́ okelú ɔ ɔmuaná. 65Aáná baacɔ bekime bá hɔ́á ŋe bú líkíméke, bé bíkétiki bɛsana eébí bikime a tɔkɔndɔ tukime tú iisí ci Yuté. 66Baacɔ bekime a bá ŋa bɔ́ bá bábɔ́ lɔ́kɔ́máká bɛsana eébí ŋaá bá bébú biíbi hákɛ́na a bɛɛtɔ́, bá bɛ́bátáka báyɛ: «Aátɛ́ ɔɔ́nɔ́ ooci káá bɛ́cáŋa e?» Bá ŋa bɔ́ kɔ́ɔna aáná anyía makɛ́nda me Otéŋí a Waáŋá ŋaá bá taaká nááyá. 67Aáná Efúúménénú yí Elilé ŋeé nyióyó ɔ ɔtɛ́má ú Sakali, síkíne cɛ Sáaŋ, u hémúkúnyi bɛsana ɔsɛ: 68«Nuúmi a bámɔ́kɔ́nɛ́na né Otéŋí, Bandɔ́mɛsɛ́ ci Islayɛ́l, anyía ú ma fáaya ɔ ɔkɔháŋɔ́na bááyɛ́ baacɔ. 69Ú maá basɔ́ tɔ́mɛ́na ɔkɛndákɛ́nda ɔ ɔ basɔ́ nóhi, u ŋeé húle eé ciíbe cɛ baacɔ cɛ muayɛ́ munyiɔnɔ Táfit. 70Híáná u ŋaá bɛ́tánɛ́na feeké bááyɛ́ behémúnyi bɛsana e befúúménénú; 71ú meé wuúci tɔ́ma anyía wá basɔ́ nóhi a aabá na cá báásɔ́ beliŋine na cá baacɔ a bá ŋa bɔ́ áamba ɔ basɔ́ kɛ́la bɔɔbɛ́. 72U ŋaá bɛ́tánɛ́na cíísú sɔ́kɔ́nɔ́ anyía u keé beébe tóŋínyi yááyɛ́ ambányɛ yɛ́ ɔtɛ́má ɔ ɔbɛ́táá yááyɛ́ efúúménénú yɛ́ nyɛlata 73ayɛ́ ú ŋaá súátɛ́ná ɔkɛla eé buúse bɔ́ cíásɔ́ sɔ́kɔ́nɔ́ Abɛ́laham, 74anyía ekúlú ayɛ́ u káá basɔ́ kátɔ́náka a aabá cá báásɔ́ beliŋine, ɛ́ɛhɛ́ tu ké sú wuúci nyiɔkɛna buólí tɛ́ka ne bulíkílíki; 75túó límine bɛtálɛ́mánánɔ́ bɛ́ baacɔ e befúúménénú eé buúse bɔ́ Bandɔ́mɛsɛ́ mɔɔ́sɛ́ mekime me úúsú olíhe. 76Mbá kuɔŋɔ́, uumi ɔɔ́nɔ́, bé ké búle ɔ yɔ́ɔ lɔ́ŋɔ anyía muhémúnyi bɛsana mɔ Bandɔ́mɛsɛ́, ooci awɔ́ á hɔ́láka baacɔ bekime ɔ Ɔmuaná, anyía ɔ kɔ́ɔ́ cáŋa ɔfaaya ne Otéŋí a Waáŋá ɔ ɔkɔtábɔ́na úúyé ohónyí. 77Kuɔŋɔ́, o kóó weékúnyíki bááyɛ́ baacɔ anyía u kéé beébe nohiki ɛ́cɛ ú meé beébe nyɛ́anakɛnɛna maabɔ́ maabɛ́. 78Ciasɔ́ Bandɔ́mɛsɛ́ áŋa na ambányɛ yɛ́ ɔtɛ́má, u káá basɔ́ númisikinyi eese e yí ŋeé húle ɔ Ɔmuaná, yɛ́ hɔ́áka nyɛháma nyɛ́ ɔɔ́cɔ́. 79U kéé númisikinyi eese a baacɔ a bá bɔ́ŋa ne i ibíne noómi na a haála ehé owé áŋa; u kéé kéndiki cáásɔ́ akɔlɔ́ i ihényí cí bumbénú.» 80Aáná ɔɔ́nɔmbɔ́ ŋaá bá wɔ yɔ́ɔmbɔkɔ, ciayɛ́ injiŋé ɔɔ́nɔ́kɛ́na. U ŋeé limékíne i iisí cɛ ɔsɛ́bɛ́á ɔ ɔkɔɔ́háma buɔ́sɛ́ ebú ú ŋeé bítóŋínyi eé buúse bɔ́ baacɔ bé Islayɛ́l.

will be added

X\