ROMAƑUƆ 9

1Lɛla lɛni na ndubo-mii bɔsu mɛni ni, ɔɔɔdi ɔkɔ na mɔɔnyi, ɔsika ndi Kristo ɔdi. Mina kayi kani lɛlɔ na Katɔti Kɔyu kɔɔdi mɔɔtina-mi geen ka naaanyi ɔkɔ. 2Mɔɔyá na bɛti ka kayi kaakpulu-mi na muunú ɔlɛ geen na mina lɛlɔ kemo. 3Ɔsika mɔɔyɔ́ ka libunku mina kadi bekyuli. Si banii nka Katɔti ɔtuna na ɔmami-mi Kristo lɛlɔ na ɔvumana mina bɔƒɔ ute mina kadi bekyuli ni, nka ndubunu kalɔ na ɔyila-mi udu. 4Ɔsika badi bekyuli bani na Katɔti ɔ́ƒuna. Na úti-ma ɔ́bla nwuna bebi. Na údie nwuna lɛga bɔdi bukeye ɔ́tina-ma. Na ɔ́tina-ma lɛla lɛni na únyimi. Na úti nwuna ɔda bubo úte-ma. Ama na Katɔti ɔ́tina kalɛ na ɔdi ka bakpa-nwu. Na ama na úse kenye. 5Ama mbo Israel ɔtɔ eƒi benengu bani na Katɔti ɔ́ƒuna. Na bana akɔ na Kristo ɔni nébo aani ukyuli ɔyawine ɔ́lɛ ɔ́si. Bɛya na bumwi Katɔti ɔni mɔɔdi ala ƒui lɛlɔ ɔ́si ɔƒɛni úsela ƒui. Ɔsia lɛni. 6Ɔɔɔdi bɔsu na nda nnii Katɔti kenye kani na úse ni, útadi-ka lɛlɔ. Ɔsika ɔɔɔdi Yudaƒuɔ ƒui ndi bekyuli bani na Katɔti ɔ́ƒuna aani nwuna badi. 7Na ulátina ka ni, Abraham kaba ƒui ndi Katɔti bebi. Katɔti ɔ́su Abraham ɔnini, “Isak lɛlɔ na ndubɔsia na akɛ bawɔ bammɔ.” 8Na ɔmɛni ɔɔtina ka ni, ɔɔɔdi Abraham bebi bani ƒui na ɔ́wɔ ndi Katɔti bebi. Mmomu Katɔti bebi ndi bani mɔɔƒɔ́-nwu linyese lɛmmɔ taadi. Na ama na ɔɔnu aani Abraham bebi geen. 9Na etemila ani na Katɔti ɔ́su na nwuna linyese kemo ndi ɔnii, “Ndubunwini libo na uwi ɔni námanku lɛlɔ. Na Sara ɔdubɔwɔ ɔnanabi.” 10Na ɔɔɔdi ɔmɛni lɛti. Nsu Rebeka ɔ́wɔ nta na badi bananabi ɔ́siku ɔti unwi pɛ kudɔ ɔni ndi bula Nana Isak. 11- 12Nsu ni, Katɔti ubo ulu ɔni na ɔsia taaƒuna bekyuli. Na kalɛ na ubo-nwu kemo lɛni ɔsu ni, Katɔti ɔ́su lɛla lɛdi úse asa na badubɔwɔ nta bamɛni iye asa na nta bammɔ bati lɛbuni ku likpidi. Na ulu ɔni lɛlɔ na ɔɔsia mmɔ ɔɔɔkɛnku bana kabla kadi lɛlɔ. Mmomu ɔ́su Rebeka ɔnini, “Ubi unengudi ɔdubunwini ɔnamudi kabla ɔblane.” 13Use aani kalɛ na Katɔti ɔ́su na Bunweni Kedee Ɔku kemo ɔnini, “Yakob na lɛ́ƒuna, na líni Esau.” 14Ɔmɛni ɔsu ni, bi na ɔdi ka bɔsu ɔƒɛni? Bɔsu na bɔsu bɔnii Katɔti ulábla ala ulu lɛlɔ? Kudii! Ɔɔɔdi lɛni na use. 15Nsu ɔ́su Mose ɔnini, “Ukyuli ɔni mɔɔyɔ́ ka lɛnu kɔnyana ni, ndubɔnu-nwu kɔnyana. Na ukyuli ɔni mɔɔyɔ́ ka nwuna lɛlɔ lɛkywi-mi kaƒɔ ni, nwuna lɛlɔ lɛdubɔkywi-mi kaƒɔ.” 16Anwuɔsu kalɛ na Katɔti ɔɔnu ukyuli kɔnyana ni, ɔɔɔkɛnku ukyuli ɔmmɔ kabla bɔbla iye tabla lɛlɔ. Mmomu ni, ɔkɛnku kalɛ na Katɔti ɔlati ɔɔnu kɔnyana lɛlɔ. 17Na Bunweni Kedee Ɔku kemo ni, Katɔti ɔ́su Ɔga Ƒarao ɔnini, “Ɔmɛni ɔsu geen líse-ɔ lɛga kalɛ na lidie mina ɔyikun lɛtina bekyuli ɔkɛnku ƒula lɛlɔ, na bebo-mi lɛnyi kudu bete kayawi bekyuli ƒui.” 18Anwuɔsu ni, Katɔti ɔɔnu ukyuli ɔni na ɔɔyɔ́ kɔnyana. Na uudie ɔbambadi lɛnɔ atu na ɔɔbla atuɔkplu. 19Bina akɔ ɔdi ɔdubo-mi buye ɔnini, “Si use lɛni ni, dɛ na ɔ́bla na Katɔti ɔ́sɔ uudie ukyuli bɔƒiɔ bɔdi? Ɔsika ukyuli ɔdi ulakana na wata wenye Katɔti lɛyɔla lɛlɔ.” 20Na awɔ ndi ɔma geen na eetemi asiaku Katɔti? Libwi liléye ukyuli ɔni návɔ-ni ɔnini, “Bi ɔsu na ávɔ-mi lɛni?” 21Ɔmɛni kama ni, ukyuli ɔni mɔɔvɔ́ ebwi ubo kuƒi na ɔbla lɛvɔti lɛmmɔ kalɛ biala na ɔɔyɔ́. Na ɔkana na ɔvɔ ebwi anyɔ ɔlɛku lɛvɔti linwi lɛmmɔ kemo, kalɛ na uti libwi linwi use ute limeyi bɔdi. Na uti libwi linyɔdi utaaƒuƒwɛ. 22Na lɛni kani na Katɔti lɛnɔ ɔ́bla. Ɔɔyɔ́ ka udie nwuna kɔnyi keyi na banu nwuna ɔyikun bati. Nsu ɔ́kɛ kayi geen úte bani mɔɔkya-nwu kɔnyi ina ka ɔ́ɔlɛ-ma ugyii úse ka ɔyila-ma udu. 23Na lɛni kani na ɔ́yɔ ka údie ala abuni ani nkya nwuna bukeye bonwu kemo keyi ɔtina bani na wanu kɔnyana. Na abu ndi bekyuli bani na ɔ́klibi úse ka bɔdubo bukeye. 24Anwuɔsu na ɔ́ƒuna abu lɛnɔ, na ɔɔɔdi Yudaƒuɔ lɛti. Mmomu ku bani naaadi Yudaƒuɔ lɛnɔ. 25Na lɛni na Katɔti ɔ́su na Kenye Udiene Hosea ɔku kemo ɔnini, “Bekyuli bani na nka baaadi mina badi ni, ndubɔlɔ-ma mina bekyuli. Na bekyuli bani na nka baaadi mina bayɔne ni, ndubɔlɔ-ma mina bayɔne. 26Na kesii kani geen na lɛ́su nnii, 'Bɛɛɛdi mina bekyuli' ni, mmɔ na bekyuli badubɔlɔ-ma Katɔti Ɔni Nli Uwi Ƒui bebi.” 27Katɔti Kenye Udiene Yesaia úbo kudu úte Yudaƒuɔ ɔnini, “Si ina Yudaƒuɔ bemomo aani ɛpu kɔnwinimi muedi ni, bana akɔ ɛlɛɛ badi kani ndubo bubu na bakɛ bɔƒɔ. 28Ɔsika Blɔti ɔdubɔtɛku bayawine ƒui litemi kɔnakunwi na ɔsa.” 29Na ɔdubɔlɛ aani kalɛ na Yesaia ɔ́su dii ɔnini, “Si Blɔti Ɔyikune Ƒui útebu bula bawɔ badi útese kama ni, bɔdubo udu bɔyii aani kalɛ na Sodom ku Gomora lɛma lɛ́yii udu!” 30Ɔmɛni ɔsu ni, bi na ɔdi ka bɔsu? Bekyuli bani naaadi Yudaƒuɔ na bátasiaku lɛlɔ bɔbla siin kama ni, bénwini bekyuli bani nse siin ɔƒɛni na Katɔti anumi ka báƒɔ-nwu bádi ɔsu. 31Nsu Yudaƒuɔ bani násiaku ɔda bubo lɛlɔ bɔdi kama kpakplaa kalɛ na babla lɛlɔ siin na Katɔti anumi ni, bátakana mmɔ budu. 32Na bi ɔsu na bétedu? Ɔsika bátasia bɔƒɔtaadi lɛlɔ na babla siin, mmomu básia ama alati kabla kama. 33Ɔmmɔ ɔsu na bétulo Kristo ɔni nse aani lɛtabi lɛni náda-ma ulu aani kalɛ na ɔkya Bunweni Kedee Ɔku kemo banini, “Binu! Lɛ́ƒuna lɛtabi lɛdi na Sion lɛni ndubɔya na bekyuli betulo. Na ani kani ndubɔya na begyiile bebuli. Nsu ukyuli biala ɔni maƒɔ-nwu madi ni, kɔƒa kulékpoku-nwu kudii.”

will be added

X\