ROMAƑUƆ 8

1Ɔmɛni ɔsu ni, kɔtɔ bɔdu bɔdi buuubo buuute bani nábla unwi ku Kristo Yesu na bana ngba bulie kemo. 2Ɔsika ɔkɛnku Kristo Yesu lɛlɔ ni, ɔda bubo bɔni nkɛnku Katɔti Kɔyu kɔni muute bekyuli ngba bɔ́ya na lɛ́lɛ ɔda bubo bɔni ndanku likpidi bɔbla ku kukpi kalɔ. 3Na lɛla lɛni na Katɔti ɔda bubo bɔni na úti úte Mose bútakana bɔbla ka bekyuli bátakana-mu lɛlɔ bɔdi ɔsu ni, Katɔti ɔ́bla-ni. Ɔ́tala Ubidi aani ukyuli ɔni mbo ɔlɔna ɔni na likpidi liikpóku. Úbo úbabla bekyuli ekpidi lili buvele akpala, na ɔ́du likpidi kɔtɔ na ɔ́yila likpidi ɔyikun ɔni mɔɔdi-bu lɛlɔ. 4Katɔti ɔ́bla ɔmɛni úte abu bani nli aani kalɛ na Katɔti Kɔyu kɔɔyɔ́, na ɔɔɔdi kalɛ na ɔlɔna udu ɔkukudi ɔɔyɔ́. Ɔ́bla ala amɛni ƒui na ulu siin lɛlɔ aani kalɛ na nwuna ɔda bubo bɔɔtina. 5Bekyuli bani nli na bana ɔlɔna udu ɔkukudi bɔyɔ kenye ni, bana kasusu kaasia ala ani na bana ɔlɔna ɔɔyɔ́ lɛlɔ. Nsu bani nli ɔkɛnku Katɔti Kɔyu lɛlɔ ni, bana kasusu kaasia lɛla lɛni na Katɔti Kɔyu kɔɔyɔ́ lɛlɔ. 6Ukyuli ɔni kasusu mɔɔsia ɔlɔna ala lɛlɔ ni, ɔɔkɛ́ kukpi. Nsu ukyuli ɔni kasusu mɔɔsia Katɔti Kɔyu lɛlɔ ni, ɔɔkɛ́ ngba ku keyi buɛɛ. 7Na ukyuli ɔni kasusu nsia ɔlɔna ala kani lɛlɔ ni, ɔdi ukisine ute Katɔti, ɔsika uládi Katɔti ɔda bubo lɛlɔ. Na sɔsɔ geen ni, ulakana-mu lɛlɔ bɔdi lɛnɔ kudii. 8Bani náya na bana ɔlɔna ɔɔdi-ma lɛlɔ ni, balakana Katɔti lɛyɔla bɔbla. 9Si Katɔti Kɔyu kɔ́ƒɔ-mii lɛlɔ kemo ni, biiilie na bina ɔlɔna udu ɔkukudi bɔyɔ kenye, mmomu kalɛ na Katɔti Kɔyu kɔɔyɔ́. Na si Kristo Kɔyu kútaƒɔ ukyuli ɔdi lɛlɔ kemo ni, ɔɔɔdi Kristo ɔdi. 10Ina Kristo ɔkya-mii kemo ni, bina ɔlɔna ɔdubo bukpi na likpidi ɔsu. Nsu bina kɔyu kɔdubɔsɔ kɔkya ngba, ɔsika Katɔti ɔ́bla-mii siin. 11Na si Katɔti Kɔyu kɔni nágyila Yesu ɔ́lɛku bekpine akɔ kɔkya-mii kemo ni, anwu ɔni nágyila Kristo Yesu ɔ́lɛku bekpine akɔ mɛni ndubute bina ɔlɔna ɔni ndubukpi mɛni ngba ɔkɛnku nwuna Kɔyu kɔni nli-mii lɛlɔ kemo ɔsu. 12Anwuɔsu ni, banwa, ɔɔɔdi ɔlɔna ɔmɛni na bɔda kayu ka bulie ngba na nwuna ɔkwɛ adala kenye. 13Si bɛsiaku likyulikpi udu ala bɔbla kama ni, bɛdubo bukpi. Nsu si bɛkɛnku Katɔti Kɔyu lɛlɔ na bɛ́du bina ɔlɔna udu ukpidi ɔmmɔ ni, bɛdubɔkɛ ngba. 14Ɔsika bekyuli bani na Katɔti Kɔyu kɔtɔnku ni, ama ndi Katɔti bebi. 15Katɔti útete-mii kɔyu kɔni náya na binwini liƒu ala kabla bablane. Mmomu úte-mii Kɔyu kɔni náya na binwini nwuna bebi. Na ɔkɛnku Kɔyu kɔmmɔ lɛlɔ ɔsu na bɔɔkpali Katɔti bɔnii, “Abba” ɔni kalɔ ndi mina Ati. 16Katɔti Kɔyu ku bula ayu ƒui eedie ɔmɛni kenye taatina ka bɔdi Katɔti bebi. 17Na si bɔdi nwuna bebi ni, na bɔdi nwuna ala badine. Na abu ku Kristo bɔdubɔdi Katɔti ala bɔsala. Na bɔdubukeye lɛnɔ aani nwuna kalɛ si búbo abi aani kalɛ na Kristo úbo abi. 18Mɔɔnu taati geen ka abi ani na buubó ɔƒaani ni, aaadi lɛla lɛdi na kalɛ na Katɔti ɔdubɔya na bukeye kudɔ. 19Ala ani na Katɔti údie ƒui aanu ulu kpakplaa teete uwi ɔni na Katɔti ɔdubudie nwuna bebi ɔtina. 20Na ala ediedi amɛni ƒui ni, éduo lɛbibo kemo. Nsu ɔɔɔdi ala ammɔ alati mɔɔyɔ́ lɛni, mmomu Katɔti ɔlati néte kuƒi lɛni. Na ɔ́ya na ebo lɛnunsia ka 21ɔdubudie ala ammɔ ƒui ɔlɛku kukpi enu kemo na anwuna, na ɔya na ekeye aani nwuna bebi kalɛ. 22Na bɔgyi ka úti úbedu uwi ɔmɛni kemo ni, ala ani na Katɔti údie ƒui eedumo geen aani uleku ɔni ntɛ kɔwɔ. 23Na ɔɔɔdi ala ammɔ lɛti, mmomu ku abu bani na Katɔti ɔ́ka nwuna Kɔyu buti bute lɛnɔ buudumo na bula lɛlɔ kemo, na bɔsia anu kpakplaa ka Katɔti ɔdubɔƒɔ-bu ekpidi lili kayu na bɔnwuna aani nwuna bebi. 24Na ka bubo lɛnunsia lɛmɛni ɔsu ni, bɔ́kɛ bɔƒɔ. Nsu lɛnunsia lɛla lɛni na bɔɔnu ku bula anumi ni, lɛsɔ lɛɛɛdi lɛnunsia. Ɔsika ukyuli ɔdi ɔsɔ ulasia ala ani na ɔɔnu anu. 25Nsu si bula anumi asia ala ani na bula anumi alanu lɛlɔ ni, na bɔɔkɛ́ kayi buɛɛ taanu-nya ulu. 26Na ulu ɔmɛni lɛlɔ na Katɔti Kɔyu kuute-bu kebunku, ɔsika buse kpɛtɛ kpɛtɛ, na bɔɔɔgyi kalɛ bɔkpali Katɔti bɔvinku. Nsu nwuna Kɔyu ɔlati kuuvele na kuudumo teete-bu kalɛ ɔnwa na abu bulaka budie bɔtina. 27Katɔti ɔni ngyi bekyuli kayi kemo ni, ɔgyi lɛla lɛni nkya nwuna Kɔyu kasusu kemo lɛnɔ. Ɔsika Kɔyu kɔmmɔ kuuvele Katɔti na nwuna badi lili kalɛ na Katɔti ɔmmɔ ɔɔyɔ́. 28Bɔgyi ka lɛla biala na Katɔti ɔɔbla ni, lɛdi lɛbuni lite bekyuli bani mɔɔyɔ́-nwu na ɔ́lɔ-ma ka babla nwuna kabla. 29Na bekyuli bani na Katɔti ɔgyi use ni, úse-ma likpo na ɔ́ya bálɛ Ubidi kalɛ na Ubidi ɔbla udeedi na nwuna banwa pii bammɔ akɔ. 30Anwuɔsu bani na Katɔti úse-ma likpo ni, ama na ɔ́lɔ. Na bani na ɔ́lɔ ni, ɔ́bla-ma siin. Na bani na ɔ́bla siin mmɔ ni, ɔ́ɔkɔliku-ma lɛnyi katɔ. 31Ɔmɛni ɔsu ni, bi na ɔdi ka bɔsu? Si Katɔti unye-bu kama ni, ɔma ndubɔkana na ukpoku-bu? 32Na si Katɔti útenye útada Ubidi mmomu úti-nwu ɔkpa na bula lili ni, bi ɔsu na ulete-bu ala ƒui ku kaƒɔ ƒaa ɔkɛnku Ubidi ɔmmɔ lɛlɔ? 33Na ɔma ndubɔwia Katɔti bekyuli baƒunadi litemi? Katɔti ɔlati uudie-ma kenye ka bɔƒiɔ bɔdi buuubo-ma lɛlɔ. 34Na ɔma ndubɔkana na ɔdu-ma kɔtɔ? Kristo Yesu ndi ukyuli ɔni nékpi, na ɔni nsɔ nsia ndi ka Katɔti ɔ́gyila-nwu ɔ́lɛku bekpine akɔ na ɔ́sɔ úbo uli ngba na ulie Katɔti kɔdianu na uuvele-nwu teete-bu. 35Na ɔma ndubɔkana na ukulo abu ku Kristo bɔyɔ bɔni nkya-bu ntɛ kemo? Lɛbibo, munuu ɔlɛ bunu, munuu bukpoku, munuu kɔka, munuu kasɔngya, munuu ɔgbankpi, munuu kukpi na kewii kenye? 36Ɔkya Bunweni Kedee kemo ka ni, “Na awɔ ɔsu ni, bɔkya kukpi ɔgbankpi kemo limeyi ndi limeyi. Na baabla-bu aani kalɛ na baabla baƒonu bani na béti-ma bésela batádu.” 37Na ɔmɛni ƒui kemo ni, butulo lɛlɔ badine ɔkɛnku Kristo ɔni mɔɔyɔ́-bu ɔsu. 38- 39Na use-mi nwaa ka bɔyɔ bɔni nkya abu ku Katɔti ntɛ ɔkɛnku Kristo Yesu ɔni ndi Blɔti lɛlɔ ni, lɛla lɛdi biala lilakana-mu bukulo. Ina kukpi iye ngba iye katɔ batu badi iye ayu ekpidi iye uwi ɔmɛni iye ɔni mebo iye ɔyikun ɔdi iye bɔkuku iye bɔgyu iye lɛla biala na bédie lilakana!

will be added

X\