ROMAƑUƆ 7

1Geen ni, banwa, binu lɛla lɛni na ndubo bɔsu mɛni kalɔ, ɔsika bina ƒui bɛgyi ɔda bubo bɔmmɔ. Ɔda bubo bɔmmɔ bɔɔdi ukyuli lɛlɔ uwi ɔni kemo na ulie ngba kani. 2Muuti ɔmɛni lɛtina-mii. Uleku ɔni nli kɔgya ni, ɔgya ku ule ɔda bubo búnyimi-nwu bɔ́mana ɔgyani lɛlɔ uwi ɔni na ɔnana ɔmmɔ uli ngba. Nsu si ɔnana ɔmmɔ úkpi ni, uleku ɔmmɔ ɔ́lɛ ɔda bubo bɔmmɔ kalɔ. 3Anwuɔsu si uleku ɔmɛni úsie útélieku ɔnana ɔbambadi uwi ɔni na ɔgyani ɔmua ulie ngba ni, bekyuli badubɔlɔ-nwu banii ɔsɔnɔdine. Nsu si ɔgyani ɔmɛni úkpi ni, ɔ́lɛ ɔda bubo bɔmmɔ kalɔ. Na ubo kuƒi ka ulie kɔgya kɔbambadi ɔni na ɔɔɔdi ɔsɔnɔdine. 4Mina banwa, lɛni kani na use ute amii lɛnɔ. Ɔsika na ɔda bubo bɔmmɔ kenye ni, ɔɔtina aani si bíkpi uwi ɔni na Kristo úkpi. Na bɛkana bilieku ukyuli bamba. Anwuɔsu bínwini ukyuli ɔni na Katɔti ɔ́gyila ɔ́lɛku bekpine akɔ mmɔ kalɛ na bula kelie kalɛku ala abuni keyi ete Katɔti. 5Uwi ɔni kemo na ɔda bubo búdie bula ukyuli udu ɔkukudi kelie kani ndanku likpidi bɔbla bɔ́tina-bu ni, ablala ammɔ ákɔ katɔ ébu. Na ala ani na bɔ́lɛku keyi na kelie kammɔ kemo adanku kukpi. 6Nsu ɔƒɛni ni, ka búkpi na bɔ́lɛ ala ani nényimi-bu mmɔ kalɔ ɔsu ni, ɔda bubo bɔmmɔ bɔsɔ buládi-bu lɛlɔ. Ɔmmɔ ɔsu bɔsɔ bulábla lɛla lɛdi na ulu ɔkukudi lɛlɔ. Mmomu ulu ɔwɔdi ɔni nkɛnku Katɔti Kɔyu lɛlɔ na bɔɔbla kabla. 7Na ɔmɛni ɔsu ni, bi na ɔdi ka bɔsu? Bɔsu na bɔsu bɔnii Katɔti ɔda bubo bɔdi likpidi? Kudii! Geen ni, ɔkɛnku ɔda bubo bɔmɛni lɛlɔ na bɔɔtí lɛla lɛni ndi likpidi. Si ɔda bubo bɔmɛni bútasu bɔnii, “Taya na anumi egyie-ɔ na ukyuli ɔdi ala lɛlɔ” ni, na nka lɛɛɛgyi lɛla lɛni ndi lɛnungyie likpidi. 8Nsu ni, likpidi bɔbla bɔ́kɛ kuƒi ɔkɛnku ɔda bubo lɛlɔ na bɔ́ya na lɛnungyie lidu lidu lɛ́kɔ katɔ na mina lɛlɔ kemo. Na si ɔda bubo bɔdi buuubo ni, likpidi bɔbla lɛnɔ búkpi. 9Ami ɔlati líilie ngba bɔmɛni udu dii, ɔni na lɛɛɛgyi ɔda bubo bɔmmɔ. Nsu uwi ɔni na líbo ḿbanu ɔda bubo bɔmmɔ lɛ́ti ka buléte-mi kuƒi ka lɛbla ala pii ni, likpidi bɔbla lɛnɔ bɔ́ta búnye-mi anumi na lɛ́nu lɛ́ti ka ndubo bukpi. 10Na ɔda bubo bɔni na nka bɔya na lɛkɛ ngba ni, amu néboku-mi kukpi mmomu. 11Na bɔkɛnku ɔda bubo lɛlɔ ni, likpidi bɔbla bɔ́kɛ ulu na bɔ́tɔlɔ-mii na bɔ́du-mi. 12Ɔmɛni ɔsu ni, ɔda bubo bɔmmɔ buse kedee, na ala ani na bɔɔtina lɛnɔ ese kedee, na asia ulu siin lɛlɔ, na adia. 13Anwuɔsu bɔtina na ɔmɛni ɔda ɔnii lɛla lɛni ndia néboku-mi kukpi? Kudii! Mmomu kalɛ na bɔnu likpidi bɔbla bɔti ka bɔdi likpidi ɔsu ni, likpidi bɔbla bɔkɛnku lɛla lɛni ndia lɛlɔ na búti kukpi búboku-mi. Na ɔkɛnku ɔda bubo bɔmɛni lɛlɔ ɔsu ni, likpidi bɔbla buudie muna udu geen keyi. 14Bula ƒui bɔgyi ka ɔda bubo bɔdanku kɔyu kemo ala. Nsu ami nli ngba aani ɔyawine, na likpidi bɔbla bɔɔdi-mi lɛlɔ. 15Neeenu ala ani na mɔɔbla kalɔ. Ɔsika si lɛla lɛni na lɛ́kali ka mɔɔyɔ́ lɛbla ni, ɔɔɔdi ani na mɔɔbla. Mmomu ala ani geen na nkisi ni, anya na mɔɔbla. 16Na si ala ani na naaayɔ ka lɛbla na mɔɔbla ni, na ɔɔtina ka lɛ́tuna ka ɔda bubo bɔmmɔ bɔdia. 17Ɔmmɔ ɔsu ni, ɔɔtina ka ɔɔɔdi ami ɔlati mɔɔbla lɛla lɛmɛni, mmomu likpidi lɛni nkya-mi kemo mɔɔbla lɛla lɛmmɔ. 18Na ngyi ka na mina lɛlɔ kemo ni, lɛla lɛbuni lɛdi biala liiibo. Na mɔɔsu ɔmɛni taasiku mina ɔlɔna udu ɔkukudi ɔmmɔ lɛlɔ. Ɔsika mɔɔyɔ́ geen ka nka lɛbla lɛbuni, nsu naaakana-ni bɔbla. 19Ɔsika lɛbuni lɛni na lɛ́yɔ ka lɛbla ni, ɔɔɔdi ani na mɔɔbla. Na likpidi lɛni mmomu na naaayɔ ka lɛbla ni, ani na mɔɔbla. 20Anwuɔsu si mɔɔbla ala ani na naaayɔ ka lɛbla ni, ɔɔɔdi ami ɔlati mɔɔbla-nya. Mmomu ni, likpidi lɛni nkya-mi kemo mɔɔbla-nya. 21Na ɔmɛni ɔsu ni, mɔɔnu lɛla lɛni mɔɔlɛ́ na mina lɛlɔ kemo taati. Si mɔɔwia ka lɛbla lɛbuni ni, likpidi lɛsiaku-mi kpakplaa. 22Nka na mina kayi kemo geen ni, Katɔti ɔda bubo bɔɔda-mi ebiti geen. 23Nsu mɔɔnu ka ala bamba ani mɔɔlɛ́-mi lɛlɔ kemo eekpóku lɛla lɛni na mina kasusu kaatina-mi ka lɛdia. Na áya na likpidi bɔbla búnyimi-mi na bɔ́bala-mi aani ɔtɔntɛne. 24Mina lɛlɔ libo kɔnyana geen. Na ɔma ndubo-mi budie bɔlɛku ɔlɔna udunkpi ɔkukudi ɔni néti-mi úsela kukpi kemo mɛni? 25Mɔɔgyá Katɔti enu, ɔsika ɔkɛnku Blɔti Yesu Kristo lɛlɔ ni, ndubɔkɛ bɔƒɔ! Na ɔƒɛni ni, na mina kasusu kemo ni, ndi Katɔti ɔda bubo kabla ɔblane. Nsu mina ukyuli udu ɔɔbla likpidi kabla.

will be added

X\