ROMAƑUƆ 3

1Na si use lɛni ni, kɔsia kɔmani na Yudani ɔni na békulo lego ubo utulo bani naaadi Yudaƒuɔ? 2Na lilu pii lɛlɔ ni, ɔdanku ala abuni. Kudeedi ni, Yudaƒuɔ enu kemo na Katɔti úti nwuna Bunweni Kedee ɔ́kya. 3Nsu si úbo úte ka badi bátaƒɔ bátadi nɔɔ? Aaƒɔ́ taadi ka Katɔti uladi nwuna etemila lɛlɔ? 4Kudii! Ina ukyuli biala ɔdi ɔkɔ ɔnyine muedi ni, bɛya bɔti ka Katɔti ɔɔdi nwuna litemi lɛlɔ. Lɛni na bénweni na Bunweni Kedee Ɔku kemo banini, “Lɛla biala lɛɛtina ka ƒula kenye etemila adi litemi geen. Na aatɛku bekyuli ƒui litemi ulu siin lɛlɔ.” 5Bɔsu na bɔdubɔsu bɔnii bula ekpidi ani na bɔɔbla mɔɔyá na bekyuli baanu Katɔti lɛbuni lɛni na ɔɔbla taati? Na ɔmmɔ ɔsu ni, bɔdubɔsu bɔnii Katɔti ulábla kaduɛ si ɔɔní-bu kɔtu? Kudii! Nsu lɛni na badi baakali! 6Na si buse na use aani kalɛ na baakali ni, bi lɛlɔ na Katɔti ɔdubunye ɔtɛku bayawine ƒui litemi? 7Ukyuli ɔdi ɔkana na uye ɔnini, “Nsu si mina ala ani na naaabla ulu lɛlɔ mɔɔyá na Katɔti litemi geen lɛmmɔ liigyingya na beemwi-nwu ni, bi ɔsu na bɛɛdú-mi kɔtɔ ka ukyuli ukpidi na ndi?” 8Si búti-nwu lɛni ni, bɔkana bɔsu bɔnii, “Bɛya na butaabla likpidi kalɛ na lɛla lɛbuni lɛlɛ lɛsiku-nwu kemo.” Bekyuli bani meti-nwu lɛni ni, bámanku ka Katɔti ɔdu-ma kɔtɔ. Nsu lɛni na bekyuli badi beedumi-bu, na baasu taatina ka abu násu lɛni. 9Na ɔƒɛni ni, bi na bɔkana bɔsu na abu Yudaƒuɔ lɛlɔ? Bubo kenyekɔ kabuni butulo bani naaadi Yudaƒuɔ? Kudii! Ɔsika lɛ́ɛtina ḿbavi ka likpidi lɛ́ƒɔ Yudaƒuɔ ku bani naaadi Yudaƒuɔ ƒui lɛnɔ lɛlɔ kemo. 10Ɔsika lɛni na bénweni na Bunweni Kedee Ɔku kemo banii, “Ukyuli ɔdi uuubo na use siin na Katɔti anumi. Ina unwi pɛ muedi! 11Ukyuli ɔdi biala uuubo ɔni mɔɔnu lɛbuni taati. Na ɔdi lɛnɔ uláwia Katɔti kama ulu. 12Bekyuli ƒui bénwini kama bákya Katɔti, na bana ƒui báƒiɔ. Na ukyuli ɔdi uuubo ɔni mɔɔbla lɛbuni. Ina unwi pɛ muedi! 13Bana inye buse aani kɔƒiɔtɔ kɔni nálɛmi kuwi. Na bana linyemi lɛɛta na ɔkɔ bɔnyi lɛlɔ. Na bana inye bɔɔdú bekyuli aani kɔlakpi bɔdu kalɛ. 14Na ewida ku ɔdu úyi-ma kenye kemo tɛ. 15Lɛgba lɛɛta-ma pla pla na bekyuli bɔdu lɛlɔ. 16Bana ngba búbie na beebó abi geen. 17Na baaagyi lɛla lɛdi na keyi buɛɛ ngba bulie lɛlɔ. 18Na bana ɔbladu ulátina ka baayia Katɔti.” 19Ɔƒɛni ni, bɔgyi ka ala ani ƒui básu na Mose ɔda bubo ɔku kemo adanku bekyuli bani nkya ɔda bubo bɔmɛni kalɔ. Na ɔyawine ɔdi ulakana kenye kadi budie na Katɔti litemi bɔtɛ kemo. Ɔsika Katɔti ɔdubɔtɛku kayawi ƒui litemi. 20Anwuɔsu ni, ɔɔɔdi ɔda bubo bɔmmɔ kama bɔsiaku mɔɔyá na ukyuli ɔbla siin na Katɔti anumi. Mmomu ni, ɔda bubo bɔmɛni bɔɔyá na bekyuli baatí ka baabla likpidi. 21Nsu ulu ɔni lɛlɔ na Katɔti údie ɔ́tina ka bekyuli baasia taabla siin ni, ɔɔɔkɛnku ɔda bubo lɛlɔ. Na ɔda bubo bɔmmɔ ku kenye bediene bédie ɔmɛni bátina nwaa. 22Katɔti ɔɔyá na bekyuli baabla siin si báƒɔ Yesu Kristo bádi. Ɔɔbla ɔmɛni teete bekyuli bani ƒui náƒɔ Kristo bádi. Na ulákya kavumana kadi na bekyuli bammɔ ntɛ. 23Bekyuli ƒui bábla likpidi, na bátamanku ka bakɛ Katɔti lɛgadi bukeye. 24Nsu ni, Katɔti ɔkɛnku Kristo Yesu ɔni náƒɔ bula lili kayu lɛlɔ ɔ́ya na bɔɔbla siin na nwuna lɛƒɔndia ɔsu. 25Katɔti néti Yesu ɔ́kpa na bula ekpidi lili. Na ɔkɛnku nwuna ubugya ɔni na úwi kalɔ ɔsu ni, bekyuli baakɛ́ bana ekpidi buti taakyiɛ si báƒɔ Kristo bádi. Katɔti ɔ́bla ɔmɛni úti ɔ́tina-bu kalɛ na ɔɔbla ala ƒui ulu lɛlɔ. Ɔ́kɛku-bu kayi na uwi ɔni návi kemo, na útakpete bula ekpidi. 26Nsu uwi ɔmɛni kemo ni, ɔkɛnku akpala amɛni lɛlɔ na Katɔti ɔ́tina-bu kalɛ na anwu use siin. Na ɔɔbla bani náƒɔ Yesu bádi ƒui siin. 27Na bi lɛlɔ na bɔdubɔkana lɛmɛnɛ bɔkun ka ani na bɔ́bla asa na bɔ́kɛ bɔƒɔ? Ku lɛla! Ɔsika ukyuli ulábla siin ka ɔɔdi ɔda bubo bɔmmɔ lɛlɔ ɔsu. Mmomu ɔkɛnku bɔƒɔtaadi lɛlɔ kani na Katɔti ɔɔklibi abu ku-nwu ntɛ. 28Ɔsika bɔgyi nwaa ka ni, ɔkɛnku bɔƒɔtaadi lɛlɔ kani na ukyuli ɔɔbla siin na Katɔti anumi, na ɔɔɔdi nwuna ɔda bubo bɔmmɔ lɛlɔ bɔdi ɔsu. 29Munuu ni, Yudaƒuɔ lɛti pɛ ɔdi na Katɔti ɔdi? Na ɔɔɔdi bani naaadi Yudaƒuɔ ama ɔdi? Ɛɛn, ɔdi ama lɛnɔ ɔdi. 30Ɔsika Katɔti unwi pɛ kani nkya na anwu ndubɔbla na Yudaƒuɔ baabla siin ɔkɛnku bɔƒɔtaadi lɛlɔ. Lɛni kani na ɔdubɔbla bani naaadi Yudaƒuɔ lɛnɔ na babla siin ɔkɛnku bɔƒɔtaadi bɔmmɔ kani lɛlɔ. 31Anwuɔsu bi na ɔmɛni ɔɔtina? Ɔɔtina ka bɔ́da ɔda bubo bɔmmɔ buse ka bɔƒɔtaadi bɔ́ƒɔ-mu kenye ɔsu? Kudii! Mmomu lɛla lɛni na ɔda bubo bɔmmɔ bɔdanku geen na bɔɔkɔliku katɔ.

will be added

X\