ROMAƑUƆ 2

1Anwuɔsu ni, si awɔ ɔdi aatɛku ukyuli litemi na aadú-ma kɔtɔ ni, eeebo kenye kadi na eedie. Na ulu biala lɛlɔ na ádu ƒula bakpana kɔtɔ ni, ƒula lɛlɔ na aadú kɔtɔ. Ɔsika ala ani na bábla ni, ana udu kani na awɔ lɛnɔ aabla. 2Bula ƒui bɔgyi ka Katɔti lɛti pɛ mbo kuƒi kɔni na ɔtɛku bekyuli bani mɔɔbla ala amɛni udu litemi. 3Na si awɔ aani ukyuli ɔyawine kani aabla ala amɛni udu na aadú bekyuli bamba kɔtɔ ni, aakali anii adubukeli Katɔti litemi bɔtɛ? 4Munuu bɛɛbu bɛnii keeke na Katɔti ɔɔbla-bu kaƒɔbuni na ɔɔkɛ́ kayi na uuwiku-bu lɛlɔ? Bɛti geen ka ni, Katɔti ɔɔbla-bu lɛƒɔndia lɛmɛni ɔsika ɔɔwia ka ubunku-bu na bunwini kayi. 5Na ka bina atu ebo ɔkplu na bítenwini kayi ɔsu ni, Katɔti ɔdubo-mii kɔtu bɔni geen na limeyi lɛni na údie úse lɛlɔ ka ɔdubɔtɛku bayawine ƒui litemi na nwuna ulu siin lɛlɔ. 6Na Katɔti ɔdubɔƒɔ ukyuli biala kayu na nwuna kabla kani na ɔ́bla kenye. 7Bekyuli bani mɔɔkya lɛbuni bɔbla ɔkplu na basiaku bukeye ku bumwi ku ngba bɔnii nsɔ naaadubo bɔsa kudii kama ni, Katɔti ɔdubɔya na bakɛ ngba ƒui bɔmmɔ. 8Nsu bekyuli bani mɔɔwia ama lɛti lɛkɛ na beení litemi geen lɛmmɔ na basiaku alaekpidi bɔbla kama ni, Katɔti ɔdubo kɔnyi bɔkɛ na bana lɛlɔ na ɔni-ma kɔtu geen. 9Bekyuli bani ƒui mɔɔbla ekpidi ni, badubo abi bubo na balákɛ bɔnwuna bɔdi. Yudaƒuɔ ndi bedeedi na kɔtu bɔni bɔmɛni kemo, na bani naaadi Yudaƒuɔ basia. 10Nsu ama bani mɔɔbla ala abuni ni, Katɔti ɔdubute-ma bukeye ku ɔbu ku keyi buɛɛ. Yudaƒuɔ ndi bedeedi bani ndubɔkɛ ala amɛni, na bani naaadi Yudaƒuɔ basia. 11Ɔsika Katɔti ulánu anumi lɛlɔ taatɛ litemi. 12Bekyuli bani ƒui nábla ekpidi na baaagyi Mose ɔda bubo ni, badubo bukpi bɔyii. Nsu Katɔti ulatɛku-ma litemi na ɔda bubo bɔmmɔ lɛlɔ. Na bani na bakya Mose ɔda bubo bɔmɛni kalɔ na bábla ekpidi ni, ɔkɛnku ɔda bubo bɔmɛni lɛlɔ na Katɔti ɔdubɔtɛku-ma litemi. 13Ɔsika ɔɔɔdi bekyuli bani na bunu kani na beenú ɔda bubo bɔmɛni ndubɔbla siin na Katɔti anumi. Mmomu bekyuli bani mɔɔbla taasiaku lɛla lɛni nkya ɔda bubo bɔmmɔ kemo ndubɔbla siin. 14Sɔsɔ ni, bekyuli bani naaadi Yudaƒuɔ ni, baaagyi Mose ɔda bubo bɔmɛni. Nsu si ɔkɛnku bana kayi bɔlɛ kemo na bábla ala ani na Mose ɔda bubo bɔɔtina ni, bana ablala aatina ka bebo ɔda bubo bete lɛlɔ ina ka bétenu Mose ɔda bubo bɔmɛni lɛlɔ litemi dii. 15Na ɔɔtina ka Katɔti úti ala ani nkya Mose ɔda bubo bɔmmɔ bɔɔtina ɔ́kya-ma kayi kemo. Na bana kayi lɛnɔ kaatina-ma geen ka ɔmɛni use lɛni. Na uwi ɔdi ni, bana kasusu kaadú-ma kɔtɔ iye keete-ma ubo. 16Na litemi buni lɛni lɛsa na mɔɔkɔ́ ni, lɛɛtina ka Katɔti ɔdubɔya na Yesu Kristo ɔtɛku bekyuli litemi ɔ́siku ala ani nábɛ akya-ma kasusu kemo ƒui lɛlɔ. 17Na amii bani mɔɔsu bɛnii bɛdi Yudaƒuɔ ni, bíti lɛlɔ bíkpo Mose ɔda bubo lɛlɔ, na bɛɛkun lɛmɛnɛ ka bibo kɔna ku Katɔti. 18Bɛɛsu lɛnɔ bɛnii bɛgyi lɛla lɛni mɔɔyɔ́ Katɔti kaƒɔ, na bɛ́tɛya ala abuni ani na ɔdi ka bɛƒuna na ɔda bubo bɔmmɔ kemo. 19Na bɛ́ƒɔ lɛlɔ bɛ́di ka bɛdi lɛnumi bite banumbwɛne, na bɛdi bukeye bite bekyuli bani nkya lɛdisa kemo. 20Na bɛɛsu ka amii mɔɔlɛ badɔlɔdi, na bɛɛtina banamu bakɔdi ala. Na bɛ́ƒɔ bɛ́di geen ka ɔda bubo bɔmmɔ bunye bute lɛlati ku litemi geen ƒui. 21Nsu amii bani mɔɔtina bekyuli bamba ala ni, bɛɛtina bina lɛlɔ ala ammɔ? Bɛɛkɔ́ Katɔti litemi buni lɛsa teete bekyuli bɛnii beteyu, nsu amii alati nɔɔ? Bileyu? 22Bɛɛsu bekyuli bɛnii batadi kɔsɔnɔ, nsu amii alati nɔɔ? Biladi kɔsɔnɔ? Bɛɛta teenye baƒiɔ lɛlɔ kpakplaa, nsu bileyu bana kakpakɔ kammɔ ala? 23Bɛda Katɔti ɔda bubo bɛɛkun lɛmɛnɛ, nsu bɛɛɛgyi ka kɔƒa kuukpó Katɔti ka biládi ɔda bubo bɔmmɔ lɛlɔ ɔsu? 24Na Bunweni Kedee Ɔku kemo ni, básu banii, “Amii Yudaƒuɔ udunkpi náya na bani naaadi Yudaƒuɔ baalɔ Katɔti lɛnyikpi.” 25Na si bɛɛdi ɔda bubo bɔmɛni lɛlɔ ni, bina lego bukulo bɔdi lɛla lɛni na libo kɔsia. Nsu si biládi ɔda bubo bɔmmɔ lɛlɔ ni, na lego bukulo ɔdi ɔni na bɛ́bla ɔdi lɛla keeke. 26Na si ukyuli ɔni naaadi Yudani na útekulo lego ɔɔdi ɔda bubo bɔmɛni lɛlɔ ni, Katɔti ɔɔnu-nwu aani ukyuli ɔni nékulo lego. 27Ukyuli ɔni mɔɔdi ɔda bubo bɔmmɔ lɛlɔ nsu útekulo lego ni, ɔdubɔdu-mii kɔtɔ ina ka amii na béte ɔda bubo bɔmmɔ na bíkulo ago lɛnɔ nsu biládi-mu lɛlɔ. 28Ɔɔɔdi ɔlɔna lɛlɔ na bɔɔnu Yudani geen taati. Na lego bukulo geen bɔmmɔ ni, buuunye buuute ɔlɔna lɛlɔ kabla kani na bekyuli baanu taati na ukyuli lɛlɔ kani. 29Mmomu ukyuli ɔni ndi Yudani geen ndi ukyuli ɔni mɔɔtina na nwuna ablala kemo ka úti nwuna kayi úte Katɔti. Na ɔɔɔkɛnku ɔlɔna ɔni na békulo na ɔda bubo ɔdi kenye lɛlɔ. Mmomu ɔkɛnku Katɔti Kɔyu lɛlɔ. Na ɔɔɔdi ukyuli ɔyawine mɔɔkɔliku ukyuli ɔmmɔ lɛnyi katɔ, mmomu Katɔti.

will be added

X\