ROMAƑUƆ 16

1Muudie bula ɔnwani uleku Ƒoibe lɛtina-mii. Ɔdi ubunkune na Kenkrea baƒɔtaadine akɔ. 2Na muuvele-mii nnii bigyingya enu na bɛƒɔ-nwu na Blɔti lɛnyi kemo na ulu ɔni námanku Katɔti bekyuli lɛlɔ. Bite-nwu kebunku biala na wawia wasiku-mii kudɔ, ɔsika úte bekyuli pii kebunku ku ami lɛnɔ. 3Bigyele Priska ku Akwila bani ndi mina kabla bablane bakpana na Kristo Yesu kemo. 4Bénye kagyumana ka bekpi na mina lili muedi. Na ɔɔɔdi ami lɛti mɔɔgyá-ma enu, mmomu ku bekyuli bani naaadi Yudaƒuɔ baƒɔtaadine akpa ammɔ ƒui. 5Na bigyele baƒɔtaadine bani mɔɔsa na bana kaduli mmɔ lɛnɔ. Bigyele mina ɔkpana Epaineto ɔni náka kayi bunwini ɔ́ƒɔ Kristo na Asia kalɛkɛ lɛlɔ mmɔ. 6Na bigyele Maria ɔni nábla kabla kpakplaa úte bina lɛkpa lɛmmɔ. 7Bigyele Androniko ku Yunia bani ndi mina kadi bekyuli bani na ami ku-ma na bákya aban ɔtɔ mmɔ. Bekyuli bagyi-ma geen na batalane bammɔ akɔ. Na ama báka-mi Kristo ɔmmɔ bɔƒɔ. 8Bigyele Amplia ɔni na mɔɔyɔ́ geen na Blɔti lɛnyi kemo bite-mi. 9Na bigyele Urbana ɔni ndi bula kabla ɔblane ɔkpana na Kristo kemo. Na bigyele mina ɔkpana ɔyɔne Staki. 10Bigyele Apele ɔni na bɔ́kɔku-nwu bɔ́nu na bɔ́nu ka ɔdia na Kristo kemo mmɔ. Na bigyele Aristobulo kaduli bekyuli ƒui. 11Bigyele Herodion mina kadi ukyuli bite-mi. Na bigyele Narkiso kaduli bekyuli bani néti lɛlɔ béte Blɔti mmɔ. 12Bigyele beleku bani ndi Triƒaina ku Triƒosa bani nábla kabla na Blɔti kemo. Na bigyele mina ɔkpana ɔyɔne Persi ɔni ndi uleku ɔbambadi ɔni lɛnɔ nábla kabla kpakplaa na Blɔti kemo. 13Bigyele Ruƒo ɔni náƒɔ lɛnyi na Blɔti kemo ku uni ɔni náda ami lɛnɔ aani mina uni kalɛ. 14Bigyele Asinkrito ku Ƒlegon ku Herme ku Patroba ku Herme ku bana banwa baƒɔtaadine bani nkya-ma kudɔ. 15Bigyele Ƒilologo ku Yulia ku Nereo ku ɔnwani uleku ku Olimpa ku Katɔti bekyuli bani nkya-ma kudɔ. 16Bigyele lɛlɔ na bɛkya lɛlɔ kɔgbu na lɛlɔ bɔbla kedee kemo. Kristo baƒɔtaadine akpa ammɔ ƒui na Kreta banii beegyele-mii o-o. 17Banwa, mɔɔlɛ-mii kpakplaa nnii binye kagyumana na bekyuli bani muuti bule taakya bekyuli ntɛ lɛlɔ. Na beeti ala bamba ani náta énye bula ala ani na bɔɔtina lɛlɔ teetile-mii kuƒi. Bɛda lɛlɔ bɛmami-ma lɛlɔ. 18Ɔsika bekyuli bammɔ udu ni, balábla Blɔti Yesu Kristo kabla. Mmomu ama alati bana ayɔla na baabla. Na bada kenye emini atɛ ku katɔlɔ beeƒú bekyuli bani naaagyi lɛla lɛdi kasusu. 19Ukyuli biala únu kalɛ na bɛɛdi litemi buni lɛmmɔ lɛlɔ, anwuɔsu lɛlɔ lɛɛyɔ́-mi geen na bina lɛlɔ. Nsu mɔɔwia ka bɛda anu na lɛla lɛni ndi lɛbuni lɛlɔ. Na binwini bekyuli bani naaagyi lɛla lɛdi na likpidi ani kudɔ. 20Katɔti ɔni muute keyi buɛɛ ɔdubususu ukisine ɔmmɔ kpɛtɛ kpɛtɛ na ɔya na bɛdi-nwu lɛlɔ na uwi klukui kemo. Blɔti Yesu Kristo lɛƒɔndia lɛsiaku-mii. 21Timoteo ɔni ndi mina kabla ɔblane ɔkpana uugyele-mii. Na lɛni kani na Lukio lɛnɔ ku Yason ku Sosipatro bani ndi mina kadi bekyuli beegyele-mii. 22Ami Tertio ɔni nénweni ɔku ɔmɛni líse lɛnɔ muugyele-mii na Blɔti lɛnyi kemo. 23Gaio ɔni négyingya enu ɔ́ƒɔ ami ku baƒɔtaadine lɛkpa lɛni mɔɔsa mɛni ƒui uugyele-mii. Na Erasto ɔni ndi ɔma ɔmɛni egulabi lɛlɔ ɔnune ku bula ɔnwani Kwarto banii beegyele-mii. 24Blɔti Yesu Kristo lɛƒɔndia lɛsiaku bina ƒui. Ɔsia lɛni. 25Na ɔƒaani ni, bɛya bumwi Katɔti. Anwu ndubɔkana na ɔda-mii na binye kpakplaa aani kalɛ na mɔɔsu na litemi buni lɛni kudu na muubó kemo ɔkɛnku Yesu Kristo lɛlɔ. Litemi buni lɛmɛni nkɛnku ala abɛdi ani na Katɔti údie keyi na ábɛ-bu na akwa pii ani návi kemo. 26Nsu ɔƒɛni ni, bédie ala ammɔ keyi béte kalɔ ƒui bekyuli aani kalɛ na nwuna kenye bediene bénweni bése. Katɔti ɔni nli ngba úsela ƒui lɛƒɔyɔ ndi ka ɔlɛka bakɔ litemi buni lɛmɛni lɛsa na kadi ƒui baƒɔ-nwu badi na badi nwuna litemi lɛlɔ. 27Katɔti ɔni lɛti ndi ɔnundane ni, anwu na ɔlɛka bumwi ka ɔ́si ɔƒɛni úsela uwi ƒui na Yesu Kristo lɛnyi kemo! Ɔsia lɛni.

will be added

X\