ROMAƑUƆ 15

1Abu bani na bula bɔƒɔtaadi bɔ́ɔyu ɔkplu ni, ɔlɛka bɔkɛ kayi bute ala ani na bekyuli bani na bana bɔƒɔtaadi bútayu tɔ ɔkplu baabla na bubunku-ma. Na ɔɔɔdi ka bɔbla lɛla lɛni mayɔ-bu kaƒɔ lɛti. 2Ɔdi ka bula akɔ ɔdi biala ɔbla lɛla lɛni mayɔ nwuna ukyulikpana kaƒɔ kalɛ na ɔdia ute-nwu na ɔya na ɔlɛ lili na kɔyu kemo. 3Ɔsika Kristo muedi ni, ɔɔɔdi lɛla lɛni mayɔ-nwu kaƒɔ kani na ɔ́bla. Mmomu bénweni ka Kristo ɔmmɔ ɔ́su Katɔti ɔnini, “Edumi ani na bekyuli bédumi-ɔ ni, ana ƒui ébo ábasia-mi lɛlɔ.” 4Na ala ani ƒui na bénweni bése uwi ɔni návi kemo ni, bénweni-nya bése kalɛ na batina-bu ala, kalɛ na si búnye lɛbibo biala kenye kpakplaa ɔkɛnku Bunweni Kedee ogya ɔni na ɔɔkya-bu lɛlɔ ni, na bɔkɛ lɛnunsia. 5Muuvele Katɔti ɔni muubunku-bu na bɔɔkana lɛbibo biala kenye bunye kpakplaa na ɔɔkya-bu ogya nnii ɔya na unwi bɔbla bɔkya-mii akɔ uwi ɔni na bíti bɛsiaku Kristo Yesu mɛni. 6Na bina ƒui kayi kasala kabla kenwi ku bina etemila, na bimwi Katɔti ɔni ndi Blɔti Yesu Kristo Ɔti. 7Ɔmɛni ɔsu bigyingya enu na bɛƒɔ lɛlɔ aani kalɛ kani na Kristo úgyingya enu na ɔ́ƒɔ-mii. Ɔmɛni uuti ɔbu teete Katɔti. 8Ɔsika mɔɔsu-mii nwaa nnii Kristo únwini Yudaƒuɔ ubunkune kalɛ na udie ɔtina ka kenye kani na Katɔti ɔ́su Yudaƒuɔ ɔtɔ eƒi benengu úse ni, ɔ́di-ka lɛlɔ na kébo kete lɛni sɔsɔ. 9Na Katɔti kenye kammɔ kadubɔya na bekyuli bani naaadi Yudaƒuɔ lɛnɔ bemwi Katɔti na nwuna kɔnyana bɔnu ɔsu. Katɔti kenye udiene ɔdi ɔ́su Katɔti na Bunweni Kedee Ɔku kemo ɔnii, “Ɔmɛni ɔsu ndubumwi-ɔ na bekyuli bani naaadi Yudaƒuɔ akɔ. Na ndubudie bɔƒɔtaadi lɛnu limwi ƒula lɛnyi.” 10Na básɔ básu banii, “Amii bani naaadi Yudaƒuɔ bɛkɛku Katɔti bekyuli ebiti.” 11Básɔ básu lɛnɔ banii, “Amii bani naaadi Yudaƒuɔ ƒui bimwi Blɔti. Na amii kadi ƒui bekyuli bidie lɛnu bimwi-nwu.” 12Yesaia lɛnɔ ɔ́sɔ únweni ɔnini, “Yese kugyii ugyiitu ɔdubɔta. Na ɔdi ukyuli ɔni ndubɔta na ɔdi kadi ƒui bekyuli lɛlɔ. Na bekyuli bani naaadi Yudaƒuɔ ƒui badubɔkɛ lɛnunsia na nwuna lɛlɔ.” 13Muuvele nnii Katɔti ɔni ndi bula lɛnunsia ɔya na lɛlɔyɔ lɛƒɔ-mii lɛlɔ kemo ƒui, na bɛkɛ keyi buɛɛ aani kalɛ na bíti bina lɛlɔ bɛ́sia-nwu lɛlɔ kenye, kalɛ na Katɔti Kɔyu ɔyikun ɔya na bina lɛnunsia lɛƒɔ-mii lɛlɔ kemo ƒui. 14Banwa, ami ɔlati lɛ́ƒɔ lɛ́di geen ka ala abuni bɔbla bɔ́ƒɔ-mii lɛlɔ kemo ƒui. Na bɛgyi ala ƒui kalɛ na biti ala ammɔ bɛtina lɛlɔ. 15Líse kayi geen na línweni ɔku na ala adi bene lɛlɔ aani si bunyimene na nsɔ nda-mii ala ammɔ ɔkɛnku lɛƒɔndia lɛni na Katɔti úte-mi kenye. 16Ɔsika ɔ́bla-mi ɔnii nnwini Kristo kabla ɔblane nte bekyuli bani naaadi Yudaƒuɔ. Na mɔɔbla ɔkpane kabla kani ndi ka lɛkɔ Katɔti litemi buni lɛmmɔ lɛsa lite bekyuli bani naaadi Yudaƒuɔ kalɛ na lɛkpanku-ma liboku Katɔti aani akpala ani Katɔti Kɔyu kɔ́bla kedee na adubɔƒɔ Katɔti anu. 17Ɔmɛni ɔsu na mɔɔkun lɛmɛnɛ na lɛla lɛni na Yesu Kristo ɔ́bla ɔkɛnku kabla kani na mɔɔbla teete Katɔti ɔsu. 18Lɛɛɛdubo bɔyii bɔsu lɛla lɛdi na lɛla bamba lɛdi lɛlɔ ntu lɛla lɛni na Kristo ɔ́bla ɔkɛnku-mi lɛlɔ kani. Ɔ́ya na lɛ́kpanku bekyuli bani naaadi Yudaƒuɔ, kalɛ bebo na badi Katɔti litemi lɛlɔ ɔkɛnku lɛla lɛni na lɛ́su-ma na lɛ́bla lɛnɔ ɔsu. 19Na badubɔbla lɛni ɔkɛnku ɔyikun ala ani na bánu ku akɔla budie taatina ani na Katɔti Kɔyu kɔ́ya na lɛ́bla ɔsu. Anwuɔsu ɔ́si Yerusalem ɔkɛ útávi Iliriko amadɔ ni, lɛ́kɔ Kristo litemi buni lɛmmɔ lɛsa. 20Ɔ́si kukuuku ƒui ni, ɔdi-mi lɛnungyie ka lɛkɔ litemi buni lɛmmɔ lɛsa na kesii kani na baaagyi Kristo. Na ɔɔɔdi banii ntátu lɛsia ɔdi kowodu kalɔ lɛtabi lɛni na ɔ́ɔkya úse lɛlɔ. 21Mmomu lɛla lɛni na bénweni bése na Bunweni Kedee Ɔku kemo líbo-nwu kemo lɛni banii, “Bekyuli bani na bátasu-ma nwuna lɛlɔ litemi dii ni, badubɔnu-nwu bati. Na bani lɛnɔ nétenu lɛla lɛdi dii ni, badubunu kalɔ.” 22Kabla kamɛni ndi lɛla lɛni neeete-mi kuƒi ɔsu na naaakana-mii kudɔ bubo. 23Nsu ɔƒɛni ka kabla kadi kasɔ keeebo-mi mɛni na kalɛkɛ kamɛni lɛlɔ ku ka lɛ́kya ńtaawia ulu akwa pii mɛni ka lɛnu-mii ɔsu ni, 24lɛ́bla kasusu ka lɛsia-mii kudɔ si lɛ́vi lísela Spania. Mɔɔwia ka lɛsia-mii kudɔ si mɔɔví na bibunku-mi na mina mmɔ busie kemo si lɛ́kya-mii kudɔ na bɔ́kya lɛlɔ ebiti uwi klukui ɔdi. 25Nsu kudeedi ni, lísela Yerusalem ntábla kabla kadi libunku Katɔti bekyuli bani nkya mmɔ. 26Ɔsika ɔ́yɔ baƒɔtaadine bani nkya Makedonia ku Akaia kaƒɔ ka beyi egulabi adi bete baƒɔtaadine bawabane bani nkya Yerusalem mmɔ. 27Ɔ́yɔ-ma kaƒɔ ka babla lɛni. Na badi-ma bayune sɔsɔ! Ɔsika si bekyuli bani naaadi Yudaƒuɔ bákɛ kadikɔ ku Yudaƒuɔ kɔyu kemo ala abuni ni, agyi anii ama lɛnɔ ɔlɛka bebunku Yudaƒuɔ ku bana akɛla. 28Anwuɔsu si lɛ́bla kabla kamɛni lɛ́wɔlɔ na bákɛ ala ani na béyi mmɔ ni, ndubusie Spania na ndubɔsia-mii kudɔ mmɔ si lísela. 29Ngyi ka ɔni na ndubo-mii kudɔ ni, ndanku Kristo kusɛ kusɛ ƒui nduboku-mii. 30Banwa, muuvele-mii kpakplaa na Blɔti Yesu Kristo lɛnyi kemo ku Katɔti Kɔyu bɔyɔ kemo nnii bibunku-mi na bukpo kekpo kani kenye na nnye na bina Katɔti bɔkpali teete-mi kemo. 31Bɛkpali katɔ bivele Katɔti na udie-mi na Yudea bekyuli bani nátaƒɔ bátadi enu kemo kalɛ na mina kabla na Yerusalem mmɔ kaƒɔ Katɔti bekyuli bammɔ anu. 32Na si Katɔti ɔ́tuna ni, ndububo mbeduo-mii kudɔ ku ebiti, na bula ƒui bɔkɛ bɔnwuna. 33Katɔti ɔni muute keyi buɛɛ ɔsiaku bina ƒui. Ɔsia lɛni.

will be added

X\