ROMAƑUƆ 12

1Anwuɔsu ni, mina banwa, ka Katɔti ɔ́bla-bu kaƒɔ buni geen ɔsu ni, muuvele-mii geen nnii biti bina lɛlɔ bite Katɔti aani akpala ani nse kedee na aayɔ́-nwu kaƒɔ lɛnɔ bɛda na bina ngba bulie kemo mɛni. Ɔmmɔ ndi bina kɔyu kemo akpala kabla. 2Bɛsɔ bitabla unwi ku kayawi kamɛni lɛlɔ ala bɔbla. Mmomu bɛya na Katɔti ɔvumana-mii kasusu ƒui na binwini bekyuli bawɔdi. Ɔmmɔ ndubɔya na bɛnu lɛla lɛni na Katɔti ɔɔyɔ́ bɛti, na bɛbla lɛla lɛni ndia na lɛɛyɔ́-nwu kaƒɔ na lise sɛɛn lɛ́wɔlɔ. 3Na ɔkɛnku kabla kani na úte-mi na nwuna lɛƒɔndia ɔsu ni, mɔɔsu bina ƒui nnii bitatalaku lɛlɔ katɔ bitetuloku kalɛ na bise. Mmomu ni, bina kasusu katina ka bíboku lɛlɔ kalɔ na ɔdi biala utaakɔku lɛlɔ taanu na nwuna bɔƒɔtaadi bɔni na ubo kenye. 4Kalɛ na bula ƒui bubo lɛlɔ ugyii unwi ɔni mbo ɔlɔna ekpo pii ani naaabla kabla kenwi ni, 5lɛni kani na bɔdi bekyuli pii na Kristo kemo nsu bɔ́sala bɔ́bla unwi aani lɛlɔ ugyii unwi ɔni ndanku lɛlɔ ekpo pii. 6Anwuɔsu ni, bɛya na buti kɔyu kemo etela lidu lidu ani na Katɔti ɔkɛnku nwuna lɛƒɔndia kemo na úte-bu bɔbla kabla. Si ukyuli ɔdi litela lɛdi Katɔti kenye budie ni, ɔdi ka udie-ni kenye ku bɔƒɔtaadi bɔni na ubo. 7Si ukyuli ɔdi litela lɛdi bekyuli kabla bɔbla ni, ɔdi ka utaabla kabla lɛni kani. Si ɔdi ala bɔtina ni, ɔdi ka ɔtina ala ammɔ lɛni kani. 8Si ɔdi bekyuli ɔkplu bɔkya ni, ɔdi ka ɔkya bekyuli ɔkplu. Si bekyuli na ɔdi ka ute ala ni, na ute ku kaƒɔ ƒaa. Na si bekyuli bɔtɔnku lɛnɔ na ɔdi ni, ɔdi ka uti nwuna anu ƒui ɔsia kabla kammɔ lɛlɔ na ɔtɔnku-ma. Si kɔnyana bɔnu na ɔdi ni, na ɔnu kɔnyana ku kayi ƒui. 9Bɛya na bina bekyuli bɔyɔ bɔbla bɔyɔ geen. Bikisi likpidi na biƒie lɛla lɛbuni bɛda. 10Biti bɔyɔ bite lɛlɔ ku kayi ƒaa aani banwa baƒɔtaadine. Na bɛbu bina bakpana bitulo lɛlɔ. 11Bitabla kɔkɔsɔ, mmomu bɛya na Katɔti Kɔyu kɔƒɔ-mii lɛlɔ kemo ƒui na bitaabla Blɔti kabla. 12Lɛlɔ litaayɔ-mii na bina lɛnunsia kemo. Na binye kpakplaa na lɛbibo biala kemo. Na bitaakpali katɔ na ulu lɛlɔ. 13Bile bina lɛlɔ ala bite Katɔti bekyuli bani neeebo lɛla lɛdi. Na bɛgyingya enu na bɛƒɔ baƒɔ. 14Bekyuli bani muukpóku-mii ni, bite-ma kusɛ kusɛ. Bite-ma kusɛ kusɛ na bitewida-ma. 15Bɛkɛ lɛlɔyɔ ku bani na lɛlɔ lɛɛyɔ́. Na biwuloku bani muuwulo. 16Bɛbla unwi ku bina bakpana na bina ngba bulie kemo. Bitatalaku lɛlɔ katɔ, mmomu bɛtuna na bɛsala ku bani neeebo kenyekɔ kadi na bekyuli anumi. Na bitanu lɛlɔ bitetulo bakladi. 17Biteti likpidi bitaƒɔ likpidi kayu. Bɛnu kaduɛ na bitaabla ala ani na ukyuli biala ɔɔnu ka adia. 18Bɛsia ulu biala lɛlɔ na bɛya na keyi buɛɛ kakya amii ku bekyuli ƒui ntɛ. 19Banwa, bitedie ukyuli likpidi kasi kudii, mmomu bite Katɔti kuƒi na ɔbla nwuna kɔnyi kabla na ukyuli ɔmmɔ lɛlɔ. Ɔsika ni, Katɔti ɔ́su na Bunweni Kedee Ɔku kemo ɔnini, “Ami Unwoti muudie kasi, na ami ndubɔƒɔ kayu.” 20Mmomu na Bunweni Kedee Ɔku kemo ni, básu-bu banii, “Si kɔka kɔɔda ƒula ukisine ni, te-nwu adila na ɔdi. Si utukwɛ mɔɔda-nwu ni, te-nwu ntu na ɔni. Ɔsika si ábla lɛni ni, édie ogya ku agyabi éwi-nwu lili.” 21Bitaya na likpidi lɛdi-mii lɛlɔ, mmomu biti lɛbuni bɛdi likpidi lɛlɔ.

will be added

X\