ROMAƑUƆ 10

1Mina banwa, ɔdi mina bɔyɔ bɔni nási-mi kayi kemo ku mina katɔ bɔkpali kemo ka Yudaƒuɔ bakɛ bɔƒɔ. 2Nnye-ma kama na mɔɔsu ka ni, anumi eegyie-ma geen na Katɔti bɔsiaku lɛlɔ. Nsu lɛnungyie lɛmmɔ lɛɛɛkɛnku lɛlati lɛlɔ. 3Ɔsika baaagyi ulu ɔni lɛlɔ na Katɔti ɔɔyɔ́ ka ukyuli ɔsia na ɔbla siin na nwuna anumi. Mmomu ama alati báwia ulu bamba béte lɛlɔ. Ɔmɛni ɔsu béteboku lɛlɔ kalɔ bétete Katɔti kalɛ na ɔtina-ma ulu ɔni lɛlɔ na basia na ɔbla-ma siin. 4Ɔsika Kristo ndi Mose ɔda bubo bɔmmɔ ƒui kawɔlɔkɔ. Na ukyuli biala ɔni maƒɔ Kristo madi ni, ɔ́bla siin na Katɔti anumi. 5Mose únweni ɔ́siku kalɛ na ukyuli ɔɔbla siin ɔkɛnku ɔda bubo lɛlɔ ɔnini, “Ukyuli biala ɔni mɔɔdi ɔda bubo bɔmmɔ lɛlɔ ni, ɔda bubo ulu ɔmmɔ ɔdubute-nwu ngba.” 6Nsu Bunweni Kedee Ɔku ɔ́su ɔ́siku kalɛ na ukyuli ɔɔbla siin na Katɔti anumi ɔkɛnku bɔƒɔtaadi lɛlɔ ɔnini, “Teye lɛlɔ anii, 'Ɔma ndubusie katɔ?' ” Nwuna kalɔ ndi, ɔma makɔ katɔ matákpanku Kristo meboku? 7“Na teye lɛlɔ anii, 'Ɔma ndubuduo usie kalɔ kemo ƒui?' ” Nwuna kalɔ ndi, ɔma mesie kekpine matákpanku Kristo meboku? 8Mmomu lɛla lɛni na ɔɔtina ndi ka, “Katɔti litemi lɛmmɔ lɛ́ɛni líde-ɔ, na lɛkya-a kenye ku ƒula kayi kemo.” Na ani ndi bɔƒɔtaadi litemi lɛni lɛsa na bɔɔkɔ́. 9Na si ébimi kenye na ásu anii Yesu ndi Blɔti, na áƒɔ ádi na ƒula kayi kemo ka Katɔti nágyila-nwu ɔ́lɛku kekpine ni, Katɔti ɔdubɔƒɔ-ɔ ngba. 10Ɔsika ƒula kayi kemo na aaƒɔ́ taadi na aabla siin na Katɔti anumi. Na ƒula kenye kani na éti eedie ɔmɛni taatina, na aakɛ́ bɔƒɔ. 11Ɔsika lɛni na Bunweni Kedee Ɔku ɔ́su ɔnii, “Ukyuli biala ɔni maƒɔ-nwu madi ni, kɔƒa kulékpo-nwu kudii.” 12Ɔmɛni ɔɔtina ka ni, kavumana kadi keeebo Yudaƒuɔ ku bani naaadi Yudaƒuɔ ntɛ. Na Blɔti ɔdi bula ƒui Ɔti, na uute bekyuli bani ƒui mɔɔkpali-nwu ala abuni. 13Lɛni na ɔkya Bunweni Kedee Ɔku kemo ɔnii, “Ukyuli biala ɔni mɔɔkpali Blɔti lɛnyi ni, ɔdubɔkɛ bɔƒɔ.” 14Nsu ukyuli biala ɔni na útaƒɔ útadi ni, dɛ na ɔdubɔkana na ɔkpali-nwu uvele lɛla lɛdi? Na ukyuli ɔni lɛlɔ lɛsa na bátakɔ bétete-ma kudii ni, dɛ na badubɔkana na baƒɔ-nwu badi? Na si ɔdi útatákɔ lɛsa lɛmmɔ útete-ma dii ni, dɛ na badubunu-ni? 15Na si bátatala bekyuli nɔɔ? Dɛ na ɔdubɔbla na bakɔ lɛsa lɛmmɔ? Anwuɔsu na bénweni banii, “Binu bekyuli bani ndubo babakɔ litemi buni lɛmmɔ lɛsa kalɛ na bana bubo kɔku kɔɔda kubiti!” 16Nsu ni, ɔɔɔdi Yudaƒuɔ ƒui náƒɔ litemi buni lɛmmɔ. Ɔsika Yesaia ɔ́su ɔnini, “Blɔti, ɔma náƒɔ bula litemi ɔ́di?” 17Anwuɔsu ni, bɔƒɔtaadi bunye litemi lɛmmɔ bunu lɛlɔ. Na litemi lɛmmɔ bunu lɛkɛnku Kristo litemi lɛlɔ. 18Nsu lɛla lɛni muuye ɔƒɛni ndi ka ni, bunu na Yudaƒuɔ bétenu Katɔti litemi lɛmmɔ? Oowo! Bénu-ni aani kalɛ na Bunweni Kedee Ɔku ɔ́su ɔnini, “Bénu-ma kɔku na kayawi ekpo ƒui, na bana etemila égyingya ésie kayawi kawɔkɔ ƒui.” 19Na nsɔ muuye nnii na bunu na bétenu-ni kalɔ? Mose ɔlati ndi ukyuli udeedi ɔni náka kenye budie na ɔ́su ka Katɔti ɔ́su ɔnini, “Ndubɔya na anumi egyie-mii na bekyuli bani naaadi Yudaƒuɔ lɛlɔ. Na ndubuti bekyuli bani anumi nétebimi lɛkya-mii kɔnyi.” 20Na Yesaia úse kayi na ɔ́su-ma nwaa ka Katɔti ɔ́su ɔnini, “Bekyuli bani na nka baláwia-mi ni, ɔƒɛni bánu-mi. Na lídie lɛlɔ lɛ́tina bekyuli bani néteye-mi lɛlɔ.” 21Nsu na Yudaƒuɔ lɛlɔ ni, Katɔti ɔ́su ɔnini, “Lígyingya enu líse limeyi limodi ka lɛƒɔ-ma. Nsu bátakpete-mi, ɔsika badi bekyuli bani naaabu lɛla lɛdi na báta bénye-mi lɛlɔ.”

will be added

X\