ROMAƑUƆ 1

1Ami Paulo, ɔni ndi Yesu Kristo kabla ɔblane na ndi ɔtalane ɔni na Katɔti ɔ́ƒuna ka lɛkɔ-nwu litemi buni lɛsa ni, ami muunweni ɔku ɔmɛni. 2Na Katɔti litemi buni lɛni na ɔ́su nwuna kenye bediene úse ka ɔdubudie keyi ni, bénweni-ni bákya Bunweni Kedee Ɔku kemo. 3Linyese lɛmɛni lɛkɛnku Katɔti Ubidi ɔni ndi Blɔti Yesu Kristo lɛlɔ. Báwɔ-nwu aani ɔyawine kalɛ na ɔdi Dawid kaba kemo ubi. 4Na ɔkɛnku Katɔti Kɔyu lɛlɔ ni, Katɔti údie-nwu ɔ́tina bekyuli ku ɔyikun bonwu ka ɔdi ubidi ɔni na ɔ́gyila ɔ́lɛku bekpine akɔ. 5Na ɔkɛnku Kristo lɛlɔ ni, Katɔti ɔ́nu-bu kɔnyana na úti-bu ɔ́bla batalane úte Kristo kalɛ na bɔya na kadi ƒui bekyuli baƒɔ badi na babla nwuna lɛyɔla. 6Na amii lɛnɔ ni, Katɔti ɔ́lɔ-mii ɔnii bibebunku Yesu Kristo badi bammɔ. 7Ɔmɛni ɔsu na muunweni ɔku ɔmɛni lite amii bani ƒui nkya Roma na Katɔti ɔɔyɔ́-mii, na ɔ́lɔ-mii ka bɛbla nwuna badi. Katɔti ku Blɔti Yesu Kristo lɛƒɔndia ku keyi buɛɛ kasiaku-mii. 8Kudeedi ni, nkɛnku Yesu Kristo lɛlɔ mɔɔgyá mina Katɔti enu na bina ƒui lili, ɔsika kayawi bekyuli ƒui beenú kalɛ na bɛ́ƒɔ Kristo bɛ́di. 9Katɔti ɔni kabla na mɔɔbla ku mina kayi ƒui na litemi buni lɛni lɛsa mɔɔkɔ́ ɔkɛnku ubidi lɛlɔ ni, ani ndubudie-mi kenye ɔ́si kalɛ na naaayiƒla-mii uwi biala kemo si mɔɔkpali katɔ. 10Na uwi biala na mɔɔkpali Katɔti ni, muuvele Katɔti nnii si ɔdi-nwu lɛƒɔyɔ ni, na lɛkɛ kuƒi na libo mbanu-mii uwi ɔmɛni kemo. 11Anumi égyie-mi geen ka libo mbanu-mii na libunku-mii na kɔyu kemo ɔkɛnku Katɔti kɔnyana bɔnu ɔsu na bɛkɛ ɔkplu. 12Lɛla lɛni mɔɔsu mɛni ndi ka bɔdubɔkya lɛlɔ ogya na uwi ɔmɛni kemo. Ɔsika bina bɔƒɔtaadi bɔdubo-mi ogya bɔkya, na ami bɔdi lɛnɔ bɔkya-mii ogya. 13Banwa, bɛti ka lɛ́bla kasusu uwi pii kemo ka libo-mii kudɔ nka, nsu lɛla lɛdi lítile-mi kuƒi. Mɔɔyɔ́ ka lɛya na bekyuli baƒɔ Kristo badi na bina akɔ aani kalɛ na lɛ́bla na bekyuli bani naaadi Yudaƒuɔ akɔ. 14Kabla kamɛni ndi kayu kani nda bekyuli ƒui, Grikiƒuɔ ku bani naaadi Grikiƒuɔ ku bekyuli bani náda anu ku bani nádɔlɔ. 15Ɔmɛni ɔsu na anumi égyie-mi geen ka lɛsu amii bani nkya Roma lɛnɔ litemi buni lɛmɛni. 16Litemi buni lɛmmɔ lilekpo-mi kɔƒa, ɔsika lɛdi Katɔti ɔyikun ɔni mɔɔyá na ukyuli biala ɔni mɔɔƒɔ́ taadi ɔɔkɛ́ ngba bɔƒɔ. Na Yudaƒuɔ ndi bedeedi bani ndubunu asa na bani naaadi Yudaƒuɔ basia. 17Na litemi buni lɛmɛni muudie ulu siin ɔni mɔɔyɔ́ Katɔti kaƒɔ taatina. Na ulu siin ɔmɛni ɔkɛnku bɔƒɔtaadi lɛlɔ ɔ́si kalɔ kesekɔ útédu kawɔlɔkɔ. Na lɛni na bénweni na Bunweni Kedee Ɔku kemo banini, “Bɔƒɔtaadi lɛlɔ na bekyuli baasia taabla siin, na Katɔti uute-ma ngba.” 18Katɔti uudie nwuna kɔnyi keyi taasiku katɔ na ala ani mɔɔta teenye-nwu lɛlɔ ku likyulikpi ala bɔbla bɔni muutile bekyuli kuƒi ka bati Katɔti litemi geen lɛmmɔ. 19Uuti kɔnyi ɔsika bekyuli baanu Katɔti ala ani na ɔ́bla ƒui nwaa. Na Katɔti ɔlati nédie-nya nwaa ɔ́tina-ma. 20Ɔsika ɔ́si uwi ɔni na Katɔti údie kayawi ni, ala ani ƒui na ɔ́bla ɔ́kya kayawi lɛlɔ muudie Katɔti ɔni na bulánu ku bula anumi ɔyikun ku nwuna udu keyi. Anwuɔsu ukyuli biala ɔsɔ ulakana bɔsu ɔnii útaƒɔ Katɔti útadi. 21Ɔsika ina ka bekyuli bagyi Katɔti ni, beléte-nwu ɔbu ɔni námanku-nwu aani Katɔti kalɛ. Na balagya-nwu enu lɛnɔ. Mmomu bana kasusu kéƒu na baabla adɔlɔla. Na lɛdisa lɛ́ƒɔ-ma. 22Na baanu lɛlɔ aani bekyuli bani na báda anu, nsu bénwini badɔlɔdi. 23Na báda Katɔti ɔni nli ngba uwi ƒui bɔkpa báya, na beemwi ala abambadi ani muukpi mmomu. Bábla ala amɛni aani ukyuli iye baasɛ iye bebuo iye bebuo bani mɔɔkpɛ́ kalɔ aani balakpi udu. Na bése-ma béte lɛlɔ aani baƒiɔ. 24Anwuɔsu ni, Katɔti ɔ́nyonu-ma, na baabla lɛyalɛ ala ani mɔɔyá na beesé lɛlɔ. Na baabla kɔƒa ala na bana akɔ. 25Na bávumana Katɔti litemi geen lɛmmɔ ku ɔkɔ bɔnyi. Na baakpá ala ani na Katɔti údie. Nsu ɔlɛka bakpa Katɔti ɔlati ɔni námanku bumwi uwi ƒui. Ɔsia lɛni. 26Ala amɛni bɔbla ɔsu na Katɔti ɔ́nyonu bekyuli, na baabla ala ani mɔɔda bana ɔlɔna ɔkwɛ ani muukpó kɔƒa. Na beleku muedi báda banana bése na baaƒuƒwɛ lɛlɔ na aƒiankpi kemo. 27Na lɛni kani na banana lɛnɔ báda beleku bése na baabla kɔƒa ala, na beesié lɛlɔ kudɔ aani ɔnana ku uleku kalɛ. Na ɔmɛni ɔsu ni, Katɔti ɔ́ni-ma kɔtu kɔni námanku-ma ɔ́si bana udu ukpidi ɔni na bábla ɔsu. 28Na ka bése béni banii balatɛya lɛla lɛni na ɔdi ka bati ɔsu ni, Katɔti ɔ́nyonu-ma, na likyulikpi lɛ́ƒɔ-ma kasusu kemo. Na baabla ala ani na utalɛka babla. 29Na likyulikpi ala bɔbla bɔ́ƒɔ-ma lɛlɔ kemo ƒui. Na anya ndi alaekpidi bɔbla ku ɔdivo ku kalala. Na lɛnungyie na bekyuli bamba ala lɛlɔ ku ukyuli bɔdu ku kekpo ku ɔkɔ bɔnyi ku lɛlɔ bule ati ati bɔ́ƒɔ-ma lɛlɔ kemo. Na beeti lɛlɔ kasusu kekpidi. Na beekeyi atɛ. 30Na beetemi enyekpi na bana bakpana lɛlɔ. Badi bekyuli bani muukisi Katɔti. Beedumi lɛlɔ, na baatina lɛlɔ, na baakun lɛmɛnɛ. Na baawia likpidi lilu lɛbambadi pii. Na balábu bana bawɔne. 31Badi bekyuli bani naaagyi lɛbuni ku likpidi kavumana. Na baládi bana ala ani na básu lɛlɔ. Na lɛla lɛdi lilakywi-ma kaƒɔ. Na balánu ukyuli kɔnyana. 32Bagyi ka Katɔti úbo-bu ɔda siin ka bekyuli bani nlie ngba bɔmɛni udu ni, Katɔti ɔdubɔdu-ma kukpi kɔtɔ. Nsu ni, benye momoomo na baabla alaekpidi amɛni. Na ɔɔɔdi ɔmɛni lɛti, mmomu beeti ɔbu teete bekyuli bani lɛnɔ mɔɔbla ala amɛni.

will be added

X\