BUDIE TAATINA 9

1Amu na Katɔti ɔtu ɔlɔndi ɔ́vwii nwuna kakpɛɛ. Na lɛ́nu ɔtu ɔdi ka ɔ́nu ɔ́si katɔ aani lɛyabi úbayu kalɔ. Na Katɔti úte-nwu ɔyikun ɔni mɔɔbala kasuudikɔ ubu bonwu ɔmmɔ kenye. 2Ɔtu ɔmɛni ɔ́lɛmi ubu bonwu ɔmɛni na uyɔ ɔ́lɛ ubu ɔmmɔ kemo aani uyɔ ɔni mɔɔlɛ́ taasi lɛgyavonku bonwu lɛdi kemo. Na ɔƒɛ bukeye ku kayaa kábla suu na uyɔ ɔmmɔ ɔsu. 3Baalɔlɔ bani muubile edula badi báyu bási uyɔ ɔmmɔ kemo bébo kalɔ, na Katɔti úte-ma ɔyikun aani ɔni na batamlukpa bebo kalɛ. 4Na ɔ́su baalɔlɔ bammɔ ka batabla livete iye livo iye kugyii kɔdi kalala ntu bekyuli bani na Katɔti útese likpo na bana atɛntɛ. 5Útete baalɔlɔ bammɔ ulu ka baya na ukyuli ɔdi ukpi, nsu babla-ma kalala na bebo abi na benu ɔlɛ abuli alɔ. Na ɔlɛ bunu ɔni nkya lɛbibo lɛmɛni kemo ni, buse aani kalɛ na katamlukpa kaata. 6Ɔƒɛni na abuli alɔ ammɔ kemo ni, badubo kukpi bɔwia, nsu balákɛ-ku. Badubɔwia banii beekpi, nsu kukpi kɔdubo-ma bukeli. 7Baalɔlɔ bammɔ bɔnu buse aani bapɔnkɔ bani nnye kagyumana bete kekpo. Na kɔbwa kɔni nálɛ sika ugyiedi kɔgabwa kubi-ma eli. Na bana anumi álɛ bekyuli anumi. 8Bana lili linwini lise gyɔlɔɔ, na bana kenye kemo anyi ese aani gyata anyi. 9Na béti ala ani nse aani abuala lɛwu lɛni mɔɔgyumana kayi bákya. Na kɔku kɔni na bana avwi aabla ni, aaku aani kɛɛkɛ pii ɔni bapɔnkɔ báni béselaku kekpokɔ. 10Baalɔlɔ bamɛni bebo lɛka ku akplɛ aani batamlukpa kalɛ na bana lɛka lɛmɛni kemo, na bebo ɔyikun ɔni na badubo buti bɔbla bekyuli kalala abuli alɔ. 11Bebo ɔga ɔni ndi ɔtu ɔni mɔɔnu kasuudikɔ ubu bonwu ɔmmɔ lɛlɔ. Ɔtu ɔmmɔ lɛnyi na Hebri lɛdi kemo ndi Abadon. Na Griki lɛdi kemo ni, nwuna lɛnyi ndi Apolion ɔni kalɔ ndi Ɔkyulane. 12Bɔbwɛ lɛla lideedi lɛ́vi. Na alakpa anyɔ ani ndanku bɔbwɛ inyɔ bɔni nébu ni, adubo bɔlɛ. 13Amu na Katɔti ɔtu ɔkundi ɔ́vwii nwuna kakpɛɛ. Na línu lɛdi lɛdi ka lɛ́si sika ugyiedi lɛbi lɛni nnye Katɔti anumi ekpo ene ammɔ lɛlɔ lɛdubo. 14Lɛdi lɛmmɔ lɛ́su Katɔti ɔtu ɔkundi ɔmmɔ ɔnini, “Táƒɛnimi batu ine bani na bényimi bése Euƒrate ketu bonwu kudɔ!” 15Amu na báƒɛnimi batu ine bamɛni bani na bényimi-ma bése mmɔ bete ka báƒɛnimi-ma na ɔdɔ ɔmɛni lɛlɔ na limeyi lɛmɛni kemo na kɔbuli kɔmɛni kemo na lɛkwa lɛmɛni tutuutu kemo kalɛ na badu bayawine ƒui lɛkpa lɛtɛdi. 16- 17Ɔƒɛni na lɛla lɛni bédie bátina-mi mɛni kemo ni, lɛ́nu bekpone pii bani nlie bapɔnkɔ lɛlɔ bésela kekpokɔ. Na básu-mi bana bumomo ɔni ndi bekyuli bɔka etili eti ene. Na abuala lɛwu lɛni mɔɔgyumana-ma kayi mmɔ égyie aani ogya, na eekeye aani ɛpu ku ogya atabi. Bapɔnkɔ bammɔ eli ese aani bagyata eli, na ogya ku uyɔ ku agyakpabi aalɛ́ taasi-ma inye kemo. 18Na alakpa atɛ ani ndanku kukpi na ási bapɔnkɔ bamɛni inye kemo ɔsu ni, bekyuli lɛkpa lɛtɛdi sɔɔn békpi. 19Ɔsika bapɔnkɔ bammɔ ɔyikun ɔkya bana inye ku lɛka kemo. Bana lɛka libo eli aani balakpi kalɛ, na beeti taadu bekyuli. 20Bekyuli bakladi bani ƒui nétekpi na alakpa atɛ ani ndanku kukpi mmɔ kemo ni, béténwini kama bátákya ala ani na ama alati béti bana enu bábla bése béte lɛlɔ ka bataakpa. Ala amɛni adanku ayu ekpidi ku bana baƒiɔ bani na béti sika ugyiedi ku ɔƒualadi bávɔ ku kalɔ kemo abuala ku atabi ku egyii ani na bánwi. Nsu ala amɛni ƒui ni, alánu na elenu na elesie muedi! 21Bétenwini kayi na bana bekyuli bɔdu ku evo ala bɔbla kudɔ iye kɔsɔnɔ ala bɔbla ku kuyu kudɔ.

will be added

X\