BUDIE TAATINA 8

1Lebo lɛni na Koƒonu Ubi ɔmmɔ ɔ́mami kɔma likpo maatɛdi ni, katɔ mmɔ ƒui kábla diin, na ɔdubɔbla aani ɔdɔ bubo kakɛ kemo. 2Amu na lɛ́nu Katɔti batu maatɛ bani muunye Katɔti anumi, na úte-ma kɔkpɛɛ maatɛ. 3Na Katɔti ɔtu ɔbambadi ɔ́da ɔ́lɛ ɔni nda sika ugyiedi libwi lɛni kemo na baakyula oloƒui, na úbenye lɛkpabi lɛmmɔ kudɔ. Béte-nwu oloƒui pii kalɛ na ɔkyula-nwu na sika ugyiedi lɛkpabi lɛni nnye lɛgaboku lɛmmɔ anumi lɛlɔ. Na oloƒui ɔmmɔ ku Katɔti bekyuli ƒui katɔ bɔkpali bɔbla akpala enwi. 4Oloƒui ɔni mɔɔkywí mmɔ uyɔ ku Katɔti bekyuli bammɔ katɔ bɔkpali ƒui bɔ́kɔ búsie Katɔti kudɔ ɔ́si Katɔti ɔtu ɔmmɔ enu kemo. 5Ɔmɛni kama ni, Katɔti ɔtu ɔmmɔ úti oloƒui libwi lɛmmɔ na úyile-ni ku ogya ɔni na údie na lɛbi lɛmmɔ lɛlɔ, na úbo éwi kalɔ lɛlɔ na kayawi. Mmɔ ni, línu ɔnantu budu kudu ku kɔku bonwu, na kayaa kaabwɛ ogya, na kalɔ kaakunku. 6Amu na batu maatɛ bani nda kɔkpɛɛ maatɛ kɔmmɔ báklibi lɛlɔ kalɛ na bavwii bana kɔkpɛɛ. 7Katɔti ɔtu udeedi ɔ́vwii nwuna kakpɛɛ. Mmɔ kani ni, etubanke ku ogya ɔni násalaku ubugya ɔ́bwɛ úbewi kalɔ lɛlɔ na kalɔ kemodi ku egyii lɛkpa lɛtɛdi lɛ́kywi. Nsu livo ƒui lɛ́kywi. 8Ɔmɛni kama ni, Katɔti ɔtu unyɔdi lɛnɔ ɔ́vwii nwuna kakpɛɛ. Amu na úbo lɛla lɛni nálɛ aani kɔbi kɔni mɔɔda ku ogya útákya ɛpu kemo. Na ɛpu lɛkpa lɛtɛdi ƒui línwini ubugya. 9Na ketu kemo bebweyi lɛkpa lɛtɛdi ƒui békpi. Na lɛkɔlɔ linengudi ƒui lɛkpa lɛtɛdi lɛ́kywi. 10Katɔti ɔtu ɔtɛdi ɔ́vwii nwuna kakpɛɛ. Amu na lɛyabi bonwu lɛdi lɛni mɔɔda aani ogya lɛ́lɛ líbo lɛ́si kayaa na lɛ́yu ntukpa ƒui lɛkpa lɛtɛdi ku abiɔ ƒui lɛlɔ. 11Lɛyabi lɛmmɔ lɛnyi ndi Ɔdu Kati Kati. Ntu lɛkpa lɛtɛdi lɛmmɔ ƒui lɛ́yu ɔdu, na bekyuli pii badi békpi na ntu bɔmmɔ ɔdu ɔsu. 12Amu na ɔtu unedi ɔ́vwii nwuna kakpɛɛ. Na lɛla lɛdi lɛ́yila ɔƒɛ ku kɔbuli ku ayabi lɛkpa lɛtɛdi bukeye. Anwuɔsu usien ku ɔƒɛ limeyi lɛkpa lɛtɛdi lɛ́sɔ lítanu bukeye. 13Amu ka nnye mɔɔnu budie bɔtina bɔmɛni ni, lɛ́nu kɔdigbo aasɛ ɔdi ɔni néveyi ɔkɛ kayaa kakaaka, na ɔ́su ku lɛdi momoomo ɔnini, “Si uwi ɔni na Katɔti batu ɛtɛ bani nébu mɛni bávwii bana kɔkpɛɛ ni, muute bekyuli bani ƒui nli kalɔ lɛlɔ bɔbwɛ, bɔbwɛ, bɔbwɛ kɔtɛ!”

will be added

X\