BUDIE TAATINA 7

1Na ɔmɛni kama ni, lɛ́nu Katɔti batu ine badi ka benye kayawi ekpo ene ammɔ. Na bada ɔƒɛƒɛɛ ɔni muukpó taasi ekpo ene ammɔ ƒui kenye, kalɛ na ɔƒɛƒɛɛ biala ulékpo na kalɔ lɛlɔ iye ɛpu anumi iye na egyii akɔ. 2Katɔti úte-ma ɔyikun ka babla kalɔ ku ɛpu kalala na beti bani bekyuli kɔtu. Nsu lɛ́nu Katɔti ɔtu ɔbambadi ɔdi ka ɔ́si ɔƒɛ katukɔ ɔdubo na ɔda lɛla lɛni na Katɔti ɔni nli ngba ɔdubuti use bekyuli likpo. Na ɔtu ɔmmɔ ɔ́kpali batu ine ku lɛdi momoomo, 3na ɔ́su-ma ɔnini, “Bitabla kalɔ iye ɛpu iye egyii adi kalala weti wetédu lebo lɛni na búse Katɔti kabla bablane likpo ku likposela lɛmɛni na bana atɛntɛ.” 4Na básu-mi ka bekyuli bani na béti Katɔti likposela lɛmmɔ bése-ma likpo na bana atɛntɛ bumomo bɔdubɔbla aani bekyuli mpimu eti anyɔ ku aavlene-ine. Na bekyuli bammɔ bási Israel kaba leevu-inyɔ kammɔ kemo. 5Nkyuli mpimu leevu inyɔ bási Yuda kaba kemo. Na mpimu leevu-inyɔ bási Ruben kaba kemo. Na mpimu leevu-inyɔ bási Gad kaba kemo. 6Na mpimu leevu-inyɔ bási Aser kaba kemo. Na mpimu leevu-inyɔ bási Naƒtali kaba kemo. Na mpimu leevu-inyɔ bási Manase kaba kemo. 7Na mpimu leevu-inyɔ bási Simeon kaba kemo. Na mpimu leevu-inyɔ bási Lewi kaba kemo. Na mpimu leevu-inyɔ bási Isakar kaba kemo. 8Na mpimu leevu-inyɔ bási Sebulon kaba kemo. Na mpimu leevu-inyɔ bási Yoseƒ kaba kemo. Na nkyuli mpimu leevu-inyɔ na bése likpo na Benyamin kaba lɛnɔ kemo. 9Na ɔmɛni kama ni, lɛ́nu ka bekyuli pii badi benye mmɔ bani na ukyuli ɔdi ulakana bɔka! Bekyuli bamɛni bási kalɔ biala kemo ku kadi biala akɔ ku bekyuli lidu lidu ƒui akɔ ku adi lidu biala kemo ka bénye lɛgaboku lɛmmɔ ku Koƒonu Ubi ɔmmɔ anumi, na bákya lɛwu lɛƒualadi na bada like. 10Na básu ku lɛdi momoomo banini, “Ngba bɔƒɔ bɔɔsí bula Katɔti ɔni nlie lɛgaboku lɛlɔ ku Koƒonu Ubi ɔmmɔ kudɔ.” 11Batu ƒui benye báka bámana lɛgaboku ku benengu ku ngba batu ine bani nnye mmɔ. 12Na báyu bébi kalɔ na lɛgaboku lɛmmɔ anumi na beemwi Katɔti, na baasu banini, “Ɔsia lɛni! Bula Katɔti uukeye, na ubo lɛnunda ku ɔbu ku kenyekɔ ku ɔyikun, na ɔ́manku bumwi ku linugya ɔ́si ɔƒɛni úsela ƒui! Ɔsia lɛni.” 13Amu na benengu bammɔ akɔ unwi úye-mi ɔnini, “Ɔma bene ndi bekyuli bani nkya lɛwu lɛƒualadi mɛni lɛni? Na wɛ na bási?” 14Amu na lɛ́su-nwu nnini, “Ati, lɛɛɛgyi-ma. Awɔ ngyi bekyuli bamɛni.” Amu na ɔ́su-mi ɔnini, “Bekyuli bamɛni ndi bani nénye lɛbibo bonwu lɛmmɔ kenye, na bálɛ-nwu kemo. Bábla sɛɛn na Koƒonu Ubi ɔmmɔ ubugya ɔsu, aani kalɛ na baaƒɔ lɛwu na lɛɛƒuala. 15Anwuɔsu na “benye Katɔti lɛgaboku lɛmmɔ anumi na baabla-nwu kabla usien ku ɔƒɛ na nwuna kakpakɔ. Ka anwu ɔni nlie lɛgaboku lɛmmɔ lɛlɔ ɔkya-ma akɔ ɔsu ni, ɔdubo-ma bɔgyumana. 16Na kɔka iye utukwɛ ɔsɔ uladu-ma kudii. Na ɔƒɛ iye liwulu lɛdi lɛsɔ lileƒi-ma. 17Ɔsika Koƒonu Ubi ɔni nlie lɛgaboku lɛlɔ na mmɔ ni, anwu ndubɔda-ma aani baƒonu ɔdane buni. Na ɔdubo-ma bɔtɔnku busienku abiɔ ani kemo na ntu bɔni muute ngba buwi uwi biala. Na Katɔti lɛnɔ ɔdubo-ma imii buni.”

will be added

X\