BUDIE TAATINA 6

1Amu na lɛ́nu ka Koƒonu Ubi ɔmmɔ ɔ́mami kɔma kɔni nda kakunkɛ kani mɔɔtina ala ani ndubo abalɛ mmɔ ekpo maatɛ ammɔ akɔ unwi. Na línu ka ngba batu bammɔ akɔ unwi ɔ́su ku lɛdi momoomo lɛni náku aani ɔnantu budu ɔnini, “Bo!” 2Na lɛ́nu ɔpɔnkɔ ɔƒualadi ɔdi ka unye. Ukyuli ɔni nlie ɔpɔnkɔ ɔmmɔ lɛlɔ ɔ́da kantaminta na béti kagabwa kadi béte-nwu. Ukyuli ɔmɛni ulie ɔpɔnkɔ ɔmmɔ lɛlɔ aani ukpone lɛlɔ ɔdine ɔni nésela utádi lɛlɔ. 3Na ɔmmɔ kama ni, Koƒonu Ubi ɔmmɔ ɔ́mami kɔma likpo linyɔdi na línu ka ngba batu bammɔ akɔ unyɔdi ɔ́su ɔnini, “Bo!” 4Mmɔ na ɔpɔnkɔ ɔbambadi ɔni négyie aani ogya kalɛ ɔ́da ɔ́lɛ. Na Katɔti úti ɔyikun úte ukyuli ɔni nlie ɔpɔnkɔ ɔmɛni lɛlɔ ɔnii uti kekpo uboku kalɔ lɛlɔ ƒui kalɛ na bekyuli badu lɛlɔ. Na úte-nwu kewii bonwu kadi. 5Ɔmɛni kama ni, Koƒonu Ubi ɔmmɔ ɔ́mami kɔma likpo lɛtɛdi. Mmɔ ni, línu ka ngba batu bammɔ akɔ ɔtɛdi ɔ́su ɔnini, “Bo!” Na ka mɔɔnu ni, lɛ́nu ɔpɔnkɔ totonto ɔdi ka unye. Na ukyuli ɔni nlie ɔpɔnkɔ ɔmmɔ lɛlɔ ɔda kakpagyuɛ kani na baakɔ́ku ala unu taanu. 6Línu ka kɔku kɔdi kɔ́si ngba batu ine bammɔ kudɔ aani ukyuli butemi, na lɛdi lɛmmɔ lɛ́su lɛnini, “Ya na kamu kalaku kenwi kuye kɔkɔ kutédu limeyi lɛyuƒɔla, na antabi kɔlaku ɛtɛ kuye lɛnɔ kɔkɔ kutédu limeyi lɛyuƒɔla. Nsu tavumana inɔ iye ntɛ bɔmmɔ kuye!” 7Amu na Koƒonu Ubi ɔmmɔ ɔ́mami kɔma likpo linedi. Na línu ka ngba batu bammɔ akɔ unedi ɔ́su ɔnini, “Bo!” 8Na mmɔ ni, lɛ́nu ka ɔpɔnkɔ ƒuƒuu ɔdi unye aani ɔlɛne. Na básia ukyuli ɔni nlie-nwu lɛlɔ lɛnyi banii Kukpi. Na ukyuli bamba ɔkpɛ-nwu kama ɔni baalɔ Kekpine. Béte-ma ɔyikun ka badu kalɔ lɛkpa linedi bekyuli ƒui. Na kekpo ku kɔka ku ɔlɛ ku beƒiebuo ndubɔdu-ma. 9Amu na Koƒonu Ubi ɔmmɔ ɔ́mami likpo lɛlɔndi. Na lɛ́nu ayu adi na katɔ ka enye lɛbi lɛni lɛlɔ na baakpá mmɔ kalɔ. Badi bekyuli bani ƒui na bádu ayu ka básu Katɔti litemi buni ɔsu. Ama ndi bani nédie ala ammɔ kenye na ulu lɛlɔ. 10Ayu amɛni áva ku lɛdi momoomo anini, “Blɔti, ala ƒui lɛlɔ ɔdine, awɔ nse kedee na ƒula etemila lɛnɔ adi litemi geen. Uwi ɛlɛ sɔɔn na adubunye etédu asa na bekyuli bani nádu-bu na kalɔ kamɛni lɛlɔ ni, atɛku-ma litemi na ani-ma kɔtu?” 11Mmɔ na úte bekyuli bamɛni ɔdi biala awu ɔƒualadi, na ɔ́su-ma ɔnii bakɛ kayi betédu uwi ɔni na kayawi bekyuli bádu bana kabla bablane bakpana bammɔ aani kalɛ na bádu ama lɛnɔ. Ɔsika bana bumomo bútedu bútawɔlɔ tɔ. 12Ɔmɛni kama ni, lɛ́nu ka Koƒonu Ubi ɔmmɔ ɔ́mami kɔma likpo lɛkundi. Na kayawi kemodi kákunku kpakplaa, na ɔƒɛ ɔ́da bukeye ɔ́ya, na ala ƒui ábla suu. Na kɔbuli kumodi kɔmmɔ kɔ́vumana kɔ́bla aani ubugya. 13Ayabi ánu ébo kalɔ aani kalɛ na kugyii ebi aanú na ɔƒɛƒɛɛ kpakplaa kemo. 14Kayaa káyii aani kalɛ na baaƒɛ ebuo ɔku. Na bágyu abi ku ntuntɛ kalɔ ƒui na ana kenyekɔ. 15Amu na kalɔ lɛlɔ baga ƒui ku bekyuli bani mbo kenyekɔ ku bekpone batɔnkune ku balakɛne ku bayikune ku bekyuli bamba lidu ƒui bani mɔɔbla bekyuli bamba kabla ku bani mɔɔbla ama alati kabla ƒui bábala lɛlɔ na libu ku atakpɛ kalɔ na abi lɛlɔ. 16Bákpali abi ku atakpɛ ammɔ banii, “Bibo na bibebi-bu lɛlɔ na bɛbala-bu kalɛ na anwu ɔni nlie lɛgaboku lɛmmɔ lɛlɔ ulanu-bu, na Koƒonu Ubi ɔmmɔ uláni-bu kɔtu! 17Ɔsika Katɔti ku Koƒonu Ubi ɔmmɔ kɔnyi kpakplaa limeyi lídu! Na ɔma makana kɔnyi kɔmmɔ kenye bunye?”

will be added

X\