BUDIE TAATINA 4

1Ɔmɛni kama ni, Katɔti údie kɔyu kemo ala adi ɔ́tina-mi. Na lɛ́nu kayakun kadi ka bálɛmi-ka na katɔ. Amu na lɛdi lɛni na lɛ́ka bunu aani kakpɛɛ ni, línu ka lɛsɔ lɛɛtɛmiku-mi lɛnini, “Bo katɔ kakɛ mɛni na lɛtina-a lɛla lɛni ndubo bɔlɛ na ɔmɛni kama.” 2Kɔnakunwi ni, Kɔyu kɔmmɔ kúti-mi kɔ́kɔliku katɔ. Ka mɔɔnu ni, lɛgaboku lɛdi lise na Katɔti ulie liboku lɛmmɔ lɛlɔ. 3Na uukeye kede kede! Na bukeye bɔmmɔ buse aani aseebi egyiedi ku aƒualadi ani náƒɔ kuye. Na bukeye bonwu bɔdi bɔ́ka bɔ́mana lɛgaboku lɛmmɔ ƒui aani evete awɔdi bukeye. 4Na agaboku aavlanyɔ-ene áka ámana lɛgaboku lɛmɛni. Na benengu aavlanyɔ-ine lɛnɔ belie-nya lɛlɔ. Na bebi adiƒuala lɛlɔ, na sika ugyiedi kɔgabwa kubi-ma eli. 5Na ogya ɔɔbwɛ ku bukeye geen taasi lɛgaboku lɛmmɔ kudɔ! Na muunú adi adi ku ɔnantu budu kɔku na mmɔ. Na lɛgaboku lɛmmɔ anumi ni, lɛsogya maatɛ lɛɛda. Na ani ndi Katɔti Kɔyu kɔni mbo ɔyikun maatɛ ɔni nnye Katɔti lɛgaboku anumi. 6Na kesii kani na lɛgaboku lɛmmɔ lɛlɛ anumi ni, ɔdi kalɔ kani nwi aani ɛpu na use kede kede aani kanu. Na lɛgaboku lɛmɛni amadɔ ni, ngba batu ine badi udu benye lɛƒɛnyi lɛna ƒui. Na anumi áka ámana-ma lɛlɔ lɛtɔtɔ ku kama ƒui. 7Ngba ɔtu udeedi ɔ́lɛ gyata. Na unyɔdi ɔ́lɛ akɔ. Na ɔtɛdi ɔ́lɛ ukyuli. Na unedi ɔ́lɛ kɔdigbo aasɛ ɔni muuveyi. 8Na ngba batu ine bamɛni ƒui bebo avwi aku aku, na anumi akya avwi amɛni kemo ku kama. Usien ku ɔƒɛ ni, baláda bɔsu taaya banini, “Kedee, kedee, kedee ndi Blɔti ɔni mbo ɔyikun ƒui, ɔni nélie, na uli, na ɔdubo bulie.” 9Ngba batu bammɔ beeti bumwi ku ɔbu ku linugya teete anwu ɔni nlie lɛgaboku lɛmmɔ lɛlɔ na uli ngba úsela ƒui. Na uwi biala na baabla lɛni ni, 10benengu aavlanyɔ-ine bammɔ beebimi bana kɔgabwa taava-nwu anumi, na baayu teebi kalɔ. Na beemwi anwu ɔni nli ngba úsela ƒui, na baasu banini, 11“Blɔti ku bula Katɔti! Awɔ námanku éte bumwi ku ɔbu ku ɔyikun. Ɔsika awɔ nédie ala ani ƒui, na áya na ana ƒui eli ngba na ƒula lɛƒɔyɔ kenye.”

will be added

X\