BUDIE TAATINA 3

1Ɔ́sɔ ɔ́su-mi ɔnini, “Nweni te Sardi baƒɔtaadine lɛkpa ɔtu anii Lɛni na ukyuli ɔni mɔɔdi ayu maatɛ ani mɔɔbla Katɔti kabla na nwuna lɛga boku anumi lɛlɔ na ɔda ayabi maatɛ ammɔ na nwuna kɔdianu ɔɔsu. 2Ngyi kalɛ na bɛɛbla bina kabla, na ngyi lɛnɔ ka bekyuli baanu-mii ka bili ngba, nsu bíkpi na kɔyu kemo! Anwuɔsu bɛgyinya na bɛkya lɛla lɛni nébu lise-mii ogya kalɛ na bilekpi ƒui! Ɔsika lɛ́nu ka lɛla lɛni na bɛɛbla ni, lítedu tɔ lítawɔlɔ na Katɔti anumi. 3Ɔmɛni ɔsu ni, binyimo lɛla lɛni na bátina-mii na bínu lɛnɔ, na bɛda-ni kaduɛ na bina ekpidi eduo-mii na binwini kama bɛkya-nya. Nsu si bítagyinya ni, ndubo-mii kudɔ aani uyune kalɛ na biláti uwi ɔni kemo na meti mada malɛ-ɔ lɛlɔ. 4Nsu bibo nkyuli ɛlɛɛ badi na Sardi mmɔ bani nétebile bana adala. Na ami ku-ma bɔdubɔda ala aƒualadi na bɔkɛ butaavi, ɔsika bámanku ka babla lɛni. 5Ukyuli ɔni madi ekpidi lɛlɔ ni, ɔdubɔda ala aƒuala aani bana kalɛ. Na lɛɛɛdubo-ma anyi bɔda budie ngba ɔku kemo. Na ndubudie-ma kenye na mina Ɔti ku Katɔti batu ƒui anumi ka badi ami badi. 6Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.” 7Ɔmmɔ kama ni, ɔ́su-mi ɔnini, “Nweni te Ƒiladelƒia baƒɔtaadine lɛkpa ɔtu anii Lɛni na anwu ɔni nse kedee na nwuna litemi lɛdi litemi geen ɔɔsu. Anwu nda Ɔga Dawid ɔyikun ɔni na si ɔ́lɛmi kayakun kadi ni, ɔdi ɔsɔ ulakana-ka bɔkalɛ. Na si ɔ́kalɛ-ka ni, ɔdi ulakana-ka bɔlɛmi. 8Ngyi kalɛ na bɛɛbla bina kabla na ngyi ka bibo ɔyikun blii ɔdi. Bɛ́siaku mina ala bɔtina kama na bɛ́di mina etemila lɛnɔ lɛlɔ ulu lɛlɔ. Lɛ́lɛmi kayakun kadi líte-mii na bina anumi na ukyuli biala ulakana-ka bɔkalɛ. 9Bɛnu! Ɔkɔ banyine bani násala bewi Satan ku nwuna badi kasalakɔ ngye na baalɔ-ma Yudaƒuɔ nsu baaadi Yudaƒuɔ ni, ndubɔya na balɛ akɔnkɔ na ƒula lɛgba akɔ. Na bana ƒui badubɔsu banii mɔɔyɔ́-ɔ. 10Na ka bɛ́di mina ɔda ɔni na líbo-mii lɛlɔ na bínye kpakplaa na bɛ́siaku ala ani ƒui muukpóku-mii ɔsu ni, ndubɔda-mii lidie lɛbibo lɛni mebo kayawi ƒui lɛlɔ na lɛkɔku bekyuli bani ƒui nlie kalɔ lɛlɔ lɛnu kemo. 11Ndubo uwi klukui kemo. Anwuɔsu bɛda lɛla lɛni nse-mii kaduɛ kalɛ na ukyuli ɔdi uláƒɔ bina lɛyuƒɔla ulásiku-mii enu kemo. 12Ndubo ukyuli ɔni madi lɛlɔ bɔbla aani lɛkpa na mina Katɔti kakpakɔ ɔni na lɛsɔ lilágyu mmɔ kudii. Ndubo mina Katɔti lɛnyi ku nwuna ɔma kedee ɔmmɔ lɛnyi bunweni bɔsia-nwu lɛlɔ. Na ɔdi Yerusalem ɔwɔdi ɔni mayu masi katɔ na Katɔti kudɔ. Na ndubo ami ɔlati lɛnyi lɛwɔdi lɛnɔ bunweni bɔsia-nwu lɛlɔ. 13Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.” 14Na ɔ́sɔ ɔ́su-mi ɔnini, “Nweni te Laodikea baƒɔtaadine ɔtu anii Lɛni na anwu ɔni mɔɔyá na lɛla biala lɛɛsia lɛni ɔɔsu. Na ɔdi Katɔti kenye udiene geen ɔni mɔɔbla ala ulu lɛlɔ, na anwu mɔɔdi Katɔti ala ani ƒui na údie lɛlɔ. 15Ngyi lɛla lɛni na bɛ́bla na ngyi ka bítaba na bítaƒɔ ogya lɛnɔ. Nsu nka mɔɔyɔ́ si bɛ́ƒuna linwi. 16Nsu ka buse kani na bise guguugu na bítaba iye bítaƒɔ ogya lɛnɔ ɔsu ni, ndubo-mii butuo bɔlɛku mina kenye kemo! 17Bɛɛsu bɛnii, 'Mbo ala na ɔdianku-mi, na mbo ala ani ƒui na mɔɔwia.' Nsu bɛɛɛgyi bɛnii biisé lɛlɔ na bina lɛlɔ libo kɔnyana, na biiibo lɛla lɛdi, na anumi ábwɛ-mii, na bɛkɛ kasɔngya. 18Anwuɔsu mɔɔlɛ-mii kpakplaa nnii bibo na bibeye sika ugyiedi ɔni bábla kede kede na ogya kemo na mina kudɔ na binwini balakɛne. Na bibeye adiƒuala ani na binyimi na bekyuli basɔ balanu bina kasɔngya ku kɔƒa. Na biye kuvo bɛkya anumi na bitaanu kaduɛ. 19Bekyuli bani na mɔɔyɔ́ ni, ama na mɔɔdɔnku na mɔɔní-ma kɔtu. Anwuɔsu bɛsia lɛlɔ anu kpakplaa na binwini kama bɛkya bina ekpidi. 20Binu! Nnye kayakun muubó kɔnu. Na si ukyuli ɔdi únu-mi lɛdi na ɔ́lɛmi úte-mi ni, ndubuduo-nwu kudɔ na ami ku-nwu bɔsala bɔdi. 21Anwu ɔni madi ekpidi lɛlɔ ni, ndubute-nwu kuƒi na ulie-mi kudɔ na lɛgaboku lɛlɔ aani kalɛ na lɛ́di lɛlɔ na nli mina Ɔti kudɔ na lɛgaboku lɛlɔ. 22Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.”

will be added

X\