BUDIE TAATINA 22

1Ɔmmɔ kama ni, ɔ́tina-mi ketu kani ntu muute ngba. Ketu kammɔ kaagbá taasi Katɔti ku Koƒonu Ubi ɔmmɔ lɛgaboku kudɔ. Na buukeye aani kanu. 2Na ketu kammɔ kaagbá taavi ɔma ɔmmɔ ɔblɔnu ntɛ. Na kana lɛvi inyɔ bɔmmɔ lɛlɔ ni, kugyii kɔni muute ngba kunye ku kuna ebi lidu leevu-inyɔ bɔmmɔ, na kɔɔnwu ebi ammɔ kɔbuli biala. Na kugyii kɔmmɔ evete adi kuvo kɔni na beti babwi kalɔ ƒui bekyuli. 3Ewida eeebo mmɔ. Mmomu Katɔti ku Koƒonu Ubi ɔmmɔ lɛgaboku lɛdubuse mmɔ na nwuna kabla bablane badubo-nwu lɛnyi buteemwi. 4Badubɔnu-nwu anumi na nwuna lɛnyi lɛdubɔsia-ma atɛntɛ. 5Lɛdisa lɛsɔ lilakya mmɔ. Na baláwia bukeye bɔdi taasiku asogya iye ɔƒɛ kudɔ, ɔsika Unwoti Katɔti ɔlati ndi bana bukeye na badubɔdi lɛga usela uwi ƒui. 6Amu na Katɔti ɔtu ɔmmɔ ɔ́su-mi ɔnini, “Etemila amɛni adi ukyuli kama kekpokɔ na adi etemila geen. Na Unwoti Katɔti ɔni muuti nwuna Kɔyu teete nwuna kenye bediene ni, anwu nátala nwuna ɔtu ɔnii ubatina nwuna kabla ɔblane ala ani ndubo abalɛ na uwi klukui kemo.” 7“Bɛnu! Ami Yesu ndubo uwi klukui kemo! Na lɛlɔ lɛdubɔyɔ ukyuli ɔni mada linyese lɛmɛni etemila ani nkya ɔku ɔmɛni kemo.” 8Ami Yohane ni, ami ndi ukyuli ɔni nénu na lɛ́nu ala amɛni ƒui. Na uwi ɔni na línu na lɛ́nu-nya ni, lɛ́yu líbi kalɔ na Katɔti ɔtu ɔni nédie ala amɛni ɔ́tina-mi lɛgba akɔ na límwi-nwu aani Katɔti. 9Nsu ɔ́su-mi ɔnini, “Tabla lɛni! Ami lɛnɔ kabla ɔblane ɔkpana na ndi aani ƒula kalɛ ku ƒula banwa kenye bediene babambadi ku bakladi bani mɔɔda etemila ani nkya ɔku ɔmɛni kemo ƒui kaduɛ. Katɔti kani na ɔlɛka emwi lɛni!” 10Amu na ɔ́su-mi ɔnini, “Teti kenye kani na Katɔti údie na ɔku ɔmɛni kemo etemila tabɛla, ɔsika uwi ɔmmɔ úude. 11Ukyuli ɔni na likpidi na ɔɔyɔ́ ka utaabla ni, usie anumi utaabla likpidi. Na ukyuli ɔni mɔɔyɔ́ ka utaabla ala ani muusé lɛlɔ ni, usie anumi utaabla ala ani muusé lɛlɔ. Na ukyuli ɔni mɔɔbla ala siin ni, usie anumi utaabla ala ulu lɛlɔ. Na ukyuli ɔni nse kedee ni, usie anumi na ɔda lɛlɔ kedee.” 12“Bɛnu! Ami Yesu ndubo uwi klukui! Na ndanku lɛyuƒɔla lɛni námanku kabla biala nduboku, na mbaƒɔ ɔdi biala kayu na lɛla lɛni na ɔ́bla kenye. 13Ami ndi Alƒa ku Omega, Udeedi ku Ukplodi, Kalɔ Kesekɔ ku Kawɔlɔkɔ. 14“Lɛlɔ lɛdubɔyɔ bekyuli bani náklibi lɛlɔ bése aani kalɛ na baaƒɔ lɛwu sɛɛn. Ama ndubɔkɛ kuƒi ka badi kugyii kɔni muute ngba mmɔ ebi. Na badubɔsia kayakun mmɔ beduo Katɔ Ɔga Ɔma ɔmmɔ kemo. 15Na bani ndubunye ɔba kama aani bakpɛwe ni, ama ndi bekyuli bani mɔɔƒɛ evo ku bani mɔɔbla lɛyalɛ ala ku bani mɔɔdú bekyuli ku bani mɔɔkpá baƒiɔ ku bekyuli bani ƒui mɔɔyɔ́ ka batɔlɔ bekyuli na ɔkɔ bɔnyi bɔɔda-ma ɔkwɛ. 16“Ami Yesu nátala mina ɔtu lɛ́kya-a nnii ubedie ala amɛni kenye ute awɔ, Yohane, kalɛ na eti asu baƒɔtaadine akpa ammɔ ƒui. Ami ndi Kugyii Ugyiitu ɔmmɔ ɔni ndi Ɔga Dawid kaba kemo ubi. Ami ndi ɔtanta lɛyabi lɛni muukeye mmɔ.” 17Katɔti Kɔyu kɔmmɔ ku Yesu bayɔne banii, “Bo!” Na ɔlɛka ukyuli biala ɔni muunú ɔmɛni lɛnɔ ɔsu ɔnii, “Bo!” Na bani ƒui na utukwɛ ɔɔda ni, bebo. Na bani ƒui mɔɔyɔ́ ni, babani ngba ntu bɔmmɔ ƒaa. Kayu kadi taƒɔ taƒɔ. 18Mɔɔlɛ ukyuli biala ɔni muunú kenye kani na Katɔti údie na ɔku ɔmɛni kemo ka si úti lɛla lɛdi úbunku ala amɛni lɛlɔ ni, Katɔti ɔdubɔya na ɔgbankpi ɔni lɛlɔ kɔtɛ na bɔ́tɛmi na ɔku ɔmɛni kemo ubo-nwu lɛlɔ. 19Na si lɛla lɛdi na ɔ́da údie na kenye budie ɔku ɔmɛni kemo lɛnɔ ni, Katɔti ɔdubudie ukyuli ɔmmɔ kadikɔ na ngba kugyii kɔmmɔ ebi lɛlɔ. Na ɔdubutile-nwu kuƒi ka uduo ɔma kedee ɔmmɔ kemo na katɔ. 20Yesu ɔni muudie ala amɛni kenye ni, ɔ́su ɔnini, “Ɛɛn, ndubo na uwi klukui kemo!” Amu na ami lɛnɔ lɛ́tuna nnii, “Ɔsia lɛni. O Blɔti Yesu, bo!” 21Muuvele nnii lɛƒɔndia lɛni nási Blɔti Yesu kudɔ lɛsiaku Katɔti bekyuli. Ɔsia lɛni.

will be added

X\