1 Ɔmmɔ kama ni, lɛ́nu katɔ ku kalɔ kawɔdi. Ɔsika katɔ ku kalɔ kedeedi aka káyii, na ɛpu lɛnɔ ɔsɔ uuubo. 2 Na lɛ́nu ɔma kedee ɔni ndi Yerusalem ɔwɔdi ka ɔ́yu ɔ́si Katɔti kudɔ na kayaa ɔdubo. Na báklibi-nwu aani kalɛ na baaklibi uleku ɔni béti beete ɔgyani. 3 Na línu lɛdi bonwu lɛdi ɔ́si lɛgaboku lɛmmɔ kudɔ ka lɛɛsu lɛnini, “Bɛnu! Katɔti keliekɔ káyu kébo bekyuli akɔ. Ɔdubulie-ma kudɔ na ama benwini-nwu bekyuli. Na Katɔti ɔlati ɔkya-ma akɔ na ɔdi-ma Kɔti. 4 Na ɔdubuni-ma imii biala na bana anumi. Na kukpi kɔsɔ kulakya lɛnɔ. Na keku ku kɔnyana buwulo ku ɔlɛ bunu lɛnɔ bɔdi bɔsɔ bulakya, ɔsika ala akukudi ƒui ávi.” 5 Amu na anwu ɔni nlie lɛgaboku lɛmmɔ lɛlɔ ɔ́su ɔnini, “Bɛnu! Lɛ́sɔku ala ƒui lɛ́bla ɔwɔdi.” Na ɔ́sɔ ɔ́su-mi ɔnini, “Nweni ala amɛni se, ɔsika adi etemila ani ndi ukyuli kama kekpokɔ, na adi etemila geen.” 6 Na ɔ́su-mi ɔnini, “Ɔ́sa! Ami ndi Alƒa ku Omega ɔni ndi lɛla biala kalɔ kesekɔ ku kawɔlɔkɔ. Na bani na utukwɛ ɔɔda ni, ndubute-ma ntu ƒaa na bani basiku libiɔ lɛni muute ngba ƒui kemo. 7 Ukyuli ɔni madi ekpidi lɛlɔ ni, ɔdubɔkɛ kadikɔ kamɛni. Na ami lɛdi-nwu Kɔti, na anwu wadi mina ubi. 8 Nsu bekyuli bani mbo liƒu ku bani nátaƒɔ bátadi ku bani muusé lɛlɔ ku bekyuli badune ku bayalɛ ku evo baƒɛne ku bani mɔɔkpá baƒiɔ ku ɔkɔ banyine ku bana udu ƒui ni, badubuduo lɛgyavonku lɛni mɔɔda ku ogya atabi mmɔ kemo. Na ɔmmɔ madi kukpi kunyɔdi kɔmmɔ.” 9 Ɔmmɔ kama ni, Katɔti batu maatɛ bani náda kɔlaku maatɛ kɔni néyi ku lɛbibo kpakplaa maatɛ mmɔ akɔ unwi ɔ́da ɔ́lɛ na ɔ́su-mi ɔnini, “Bo, na ndubɔtina-a Katɔti bekyuli bani nse aani Koƒonu Ubi ɔmmɔ uleku ɔni na ɔdubo buti mmɔ.” 10 Na útiku-mi na kɔyu kemo ɔ́tɔlɔku úsienku kɔbi bonwu kɔni nákuku lili. Na ɔ́tina-mi Yerusalem ɔma unengudi kedee ɔni náyu ɔ́si Katɔti kudɔ na kayaa ɔdubo. 11 Na Katɔti bukeye bɔ́ƒɔ-nwu lɛlɔ ƒui. Na uukeye aani liseebi lɛni náƒɔ kuye geen na baalɔ-ni yaspa, na lise kede kede aani kanu atabi. 12 Bátu kowodu kangyaa kɔdi báka bámana-nwu, na bakya-ku kɔyakun leevu-inyɔ. Na Katɔti batu leevu-inyɔ benye-ku kenye. Na bénweni Israelƒuɔ kaba leevu-inyɔ bammɔ bebi anyi básia kadi biala lɛlɔ. 13 Na ɔƒɛ katukɔ ni, kɔyakun ɛtɛ kɔkya. Na katɔ kakɛ ni, kɔyakun ɛtɛ kɔkya. Na kada kakɛ ni, kɔyakun ɛtɛ kɔkya. Na ɔƒɛ kanukɔ ni, kɔyakun ɛtɛ kɔkya. 14 Na kowodu kalɔ atabi ani bákya kowodu kɔmmɔ kalɔ ebo atabi leevu-anyɔ. Na bénweni Koƒonu Ubi ɔmmɔ batalane anyi leevu-anyɔ básia kadi biala lɛlɔ. 15 Amu na ɔtu ɔni nnye mɔɔtɛmiku-mi mmɔ ni, ɔda lɛbuala lɛkɔkula lɛni béti sika ugyiedi bábla ka ɔkɔku ɔma ɔmmɔ ku kɔyakun kɔmmɔ ku awodu ammɔ. 16 Na ɔma ɔmmɔ ɔtɛ lɛƒɛnyi ine bɔmmɔ ƒui lɛlɔ ɔni na nwuna bune ku bɔbɛbɛ ƒui bɔdi unwi. Na ɔ́kɔku ɔma ɔmmɔ ku nwuna lɛkɔkula. Na ubo liluku bɔkɔku apimu unwi ku eti leevu. Na nwuna linene ku bɔbɛbɛ ku bɔkuku ƒui búlieku lɛlɔ pɛpɛɛpɛ. 17 Ɔtu ɔmmɔ ɔ́kɔku kowodu kɔmmɔ butigbli, na kubo lɛgba eti ene ku leevu-ɛku aani kalɛ na bekyuli baakɔ́ku ala. 18 Yaspa aseebi bonwu ani náƒɔ kuye na béti bátu awodu ammɔ. Na ɔma ɔmmɔ ɔlati ɔdi sika ugyiedi na use kede kede aani kanu. 19 Na awodu ammɔ kalɔ atabi ani lɛlɔ na bátu awodu ammɔ basia ni, bákya-nya akya ku aseebi abuni lidu lidu ani náƒɔ kuye geen. Udeedi ɔdi liseebi lɛni baalɔ yaspa, na unyɔdi baalɔ sapir. Ɔtɛdi baalɔ yalkedon, na unedi baalɔ smardo. 20 Ɔlɔndi baalɔ sardonik, na ɔkundi baalɔ sardis. Maatɛdi baalɔ krisolit, na maanedi baalɔ beril. Yaalenwidi baalɔ topas, na leevudi baalɔ krisopras. Leevu-unwidi baalɔ yiakint, na leevu-unyɔdi baalɔ ametist. 21 Kɔyakun leevu-inyɔ kɔmmɔ kɔdi aseebi leevu-anyɔ ani náƒɔ kuye geen, na ɔdi biala ɔdi liseebi libendi linwi. Na ɔma ɔmmɔ ɔblɔnu ɔdi sika ugyiedi ɔni na akana na anu avinku-nwu kemo aani kanu. 22 Na ńtanu kakpakɔ kadi na ɔma ɔmmɔ kemo, ɔsika Unwoti Katɔti ɔni ndi Ɔyikune Ƒui ku Koƒonu Ubi ɔmmɔ alati ndi ɔma ɔmmɔ kakpakɔ. 23 Na ɔma ɔmmɔ uláwia ɔƒɛ ɔdi iye kɔbuli ka ute bukeye bɔdi, ɔsika Katɔti bukeye ndi-nwu bukeye, na ɔma ɔmmɔ asogya ndi Koƒonu Ubi ɔmmɔ. 24 Na bukeye bɔmɛni na kadi ƒui bekyuli badubɔnu busie. Na kalɔ lɛlɔ baga badubuti bana agala beboku ɔma ɔmmɔ kemo. 25 Na balakalɛ kɔyakun kɔmɛni kɔdubuwi uwi biala, ɔsika lɛdisa liiibo mmɔ. 26 Na kadi bekyuli ƒui badubuti bana akɛla ku ɔbu bebeduo mmɔ. 27 Nsu lɛla biala muusé lɛlɔ lileduo mmɔ kudii. Na bani ƒui mɔɔbla ala ani muusé lɛlɔ iye ala ani muukpó kɔƒa iye ala ani mɔɔtɔ́lɔ bekyuli ni, beleduo mmɔ. Mmomu bani anyi na bénweni bákya Koƒonu Ubi ɔmmɔ ngba ɔku kemo kani ndubuduo mmɔ.
