BUDIE TAATINA 2

1Amu na ɔ́su ami Yohane ɔnini, “Nweni ɔku te Eƒeso baƒɔtaadine lɛkpa ɔtu anii Ami Yesu nda ayabi maatɛ na mina kɔdianu na muusié teebo na sika ugyiedi ligyii maatɛ lɛni lɛlɔ na asogya ɔɔsia mmɔ ntɛ. Na ami mɔɔsu kenye kamɛni. 2Ngyi lɛla lɛni na bɛɛbla. Na ngyi kalɛ na binye kabla kammɔ lɛlɔ kpakplaa ku kalɛ na bɛ́kya ɔkplu. Ngyi ka biléte bekyuli bekpidi kuƒi ku kalɛ na bɛ́kɔku-ma bɛ́nu. Ama ndi bani mɔɔtɔ́lɔ bekyuli banii badi batalane, nsu baaadi batalane. Na bɛ́nu-ma bɛ́ti ka badi ɔkɔ banyine. 3Ngyi ka binye lɛbibo lɛmmɔ kenye kpakplaa na bɛɛkya ɔkplu na ami ɔsu, na enu átaƒɛ-mii. 4Nsu bɔƒiɔ bɔni muudie-mii lɛlɔ ndi ka bɛsɔ bilayɔ-mi aani kalɛ na bítaayɔ-mi kudeedi. 5Anwuɔsu bɛkali bina kenyekɔ kedeedi kani bínye asa na bíbuli bɛnu. Na binwini kama bɛkya bina ekpidi, na bitaabla lɛla lɛni na bítaabla kudeedi. Nsu si bítenwini kama bítakya bina ekpidi ni, ndububo-mii kudɔ na mbada bina sika ugyiedi ugyii ku nwuna asogya ɔmmɔ lɛgyu nwuna kenyekɔ. 6Nsu lɛla lɛni mɔɔda-mi kubiti na bina lɛlɔ ndi ka ala ani na bekyuli bani nsiaku Nikolatia kama baabla ni, biikisi-nya. Na ami lɛnɔ nkisi-nya. 7Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ. Anwu ɔni madi ekpidi lɛlɔ ni, ndubute-nwu ulu na ɔdi ngba kugyii kɔni nnye Katɔti Paradiso kemo mmɔ ebi.” 8Na ɔ́su-mi ɔnini, “Nweni te Smirna baƒɔtaadine lɛkpa ɔtu anii Ami Yesu ndi Udeedi ku Ukplodi. Na líkpi, nsu lɛ́sɔ lɛ́ta líbo nli ngba. Na ami mɔɔsu kenye kamɛni. 9Ngyi ka biibó abi na bɛɛyaki ala. Nsu geen ni, bibo ala ƒui. Ngyi enyekpi ani na bekyuli bani mɔɔlɔ lɛlɔ banii Yudaƒuɔ básu básiku-mii lɛlɔ. Nsu ni, baaasiaku Katɔti. Mmomu badi kasala kani ndi Satan badi. 10Bitayia lɛbibo biala lɛni mebo-mii lɛlɔ. Bise atu na binu! Ukisine ɔmmɔ ɔdubo bina akɔ badi bukpoku bɔnu na ɔya na bakya-mii ɔtɔ na bekpoku-mii emeyi leevu. Ɔlɛka bɛbla ala ulu lɛlɔ bite-mi si ina úbo úte ka bikpi muedi. Na ami ndubuti ngba bɔni nsɔ naaadubo bɔsa kudii lɛƒɔ-mii kayu. 11Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ. Anwu ɔni madi ekpidi lɛlɔ ni, uleduo kukpi kunyɔdi ɔgbankpi kemo.” 12Na ɔ́su-mi ɔnini, “Nweni ɔku te Pergamo baƒɔtaadine lɛkpa ɔtu anii Ami Yesu mbo kewii kani bádɔ-ka lɛvi inyɔ mmɔ. Na ami mɔɔsu kenye kamɛni. 13Ngyi ka ɔma ɔni na bilie ndi likpo lɛni na Satan úse nwuna lɛga kadikɔ. Bɛ́siaku-mi kama kpakplaa. Na bítedie bina bɔƒɔtaadi atu na mina lɛlɔ ina uwi ɔni na bádu Antipa ɔni lɛnɔ nédie-mi litemi kenye ulu lɛlɔ na likpo lɛni na Satan ulie mmɔ. 14Nsu alakpa alɛɛ adi ábala-mii. Bibo bekyuli badi na bina akɔ mmɔ bani mɔɔsiaku Bileam ala bɔtina kama. Ukyuli ɔmɛni nátina Balak kalɛ na ɔtɔlɔ Israelƒuɔ. Na ɔ́kpanku-ma útákya likpidi kemo. Baadi adila ani na béti bákpa béte baƒiɔ, na bábla lɛyalɛ ala. 15Lɛni kani bibo bekyuli badi na mmɔ bani mɔɔsiaku Nikolatia ala bɔtina kama. 16Binwini kama bɛkya bina ekpidi! Na si ɔɔɔdi lɛni ni, ami ndubo-mii kudɔ uwi klukui ku litemi geen lɛni mɔɔtu aani kewii kani mɔɔlɛ́-mi kenye na mbekpoku bekyuli bani nsiaku ala bɔtina bɔmmɔ kama. 17Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ. Anwu ɔni madi ekpidi lɛlɔ ni, ndubo-nwu adila ani na Katɔti ɔ́bala úse adi bute. Na ndubute-nwu lɛtabi lɛƒualadi lɛdi lɛnɔ lɛni lɛlɔ na bénweni lɛnyi lɛwɔdi básia lɛni na ukyuli ɔmmɔ kani ndubɔti-ni.” 18“Nweni ɔku te Tiatira baƒɔtaadine lɛkpa ɔtu anii Ami Yesu ndi Katɔti Ubidi. Na mina anumi aada aani ogya na mina lɛgba liikeye aani lɛbuala lɛni bákya ogya na lígyie. Ami mɔɔsu kenye kamɛni. 19Ngyi lɛla lɛni na bɛɛbla. Na ngyi kalɛ na bɛɛyɔ́-mi na bɛɛƒɔ́-mi taadi ku kalɛ na bɛɛbla-mi kabla na binye lɛbibo kenye kpakplaa. Na ngyi ka kabla kabuni kani bɛɛbla ɔƒɛni ketulo kalɛ na bítaabla kudeedi. 20Nsu bɔƒiɔ bɔni muudie-mii ndi ka biite uleku Isebel ɔni mɔɔlɔ lɛlɔ ɔnii Katɔti kenye udiene kuƒi. Nsu uleku ɔmmɔ ala ani na ɔɔtina aayá na mina kabla bablane bayii ulu na baabla lɛyalɛ ala, na baadi adila ani na béti bákpa béte baƒiɔ. 21Líte-nwu uwi ɔni na uti ɔvumana na ɔda ekpidi bɔbla ɔya, nsu ulenu kalɔ. 22Anwuɔsu ndubɔya na ɔlɛ ubo-nwu ɔva lɛtala lɛlɔ. Na bani na anwu ku-ma badi kɔsɔnɔ badububo abi geen, amu ntu bada-nwu kama bɔsiaku báya. 23Lɛnɔ ni, ndubo uleku ɔmɛni basɔnɔbi ƒui bɔdu. Na mmɔ ni, baƒɔtaadine lɛkpa lɛmmɔ ƒui badubɔti ka ami ndi ukyuli ɔni ngyi ukyuli biala kayi ku lili kemo. Ndubo bina akɔ ɔdi biala kayu bɔƒɔ na lɛla lɛni na ɔ́bla kenye. 24Nsu amii bakladi bani nkya Tiatira na bɛɛɛsiaku nwuna ala bɔtina kama na bítatɛya Satan ala abɛdi ani baasu ka ana kemo ágyu mmɔ ni, mɔɔsu-mii ka nsɔ lɛɛɛdubo etila abambadi adi buti bɔsia-mii lɛlɔ. 25Nsu biƒie bɔƒɔtaadi bɔni na bibo bɛda kpakplaa úti útédu uwi ɔni na mebo. 26- 27Na ukyuli ɔni madi ekpidi lɛlɔ na wenye kpakplaa wetédu kawɔlɔkɔ ni, ndubute-nwu ɔyikun aani kalɛ na lɛ́ƒɔ lɛ́siku mina Ɔti kudɔ na ɔdubɔdi kadi ƒui lɛlɔ. Bénweni bése banii, 'Ɔdubɔdi-ma lɛlɔ ku ɔyikun kpakplaa na ɔbwɛ-ma uwi kalɔ kpɛtɛ kpɛtɛ aani ebwi kalɛ.' 28Ndubute-nwu bukeye aani ɔtanta lɛyabi lɛnɔ. 29Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.”

will be added

X\