BUDIE TAATINA 19

1Ɔmɛni kama ni, línu kɔku bonwu kɔdi na katɔ aani bekyuli lisu bonwu lɛdi. Na báva momoomo básu banini, “Aleluya! Ngba bɔƒɔ ku bukeye ku ɔyikun ɔdi Katɔti ɔmmɔ ɔdi. 2Ɔsika nwuna litemi bɔtɛ buse siin. Na nwuna etemila adi litemi geen. Ɔma ɔni nébile kayawi ku nwuna alaekpidi bɔbla aani ɔyalɛ ni, Katɔti nátɛku-nwu litemi. Na Katɔti kabla bablane bani ubugya na béwi kalɔ ni, údie ɔma ɔmɛni bekyuli kasi na ubugya ɔmmɔ ɔsu.” 3Básɔ báva básu banini, “Aleluya! Uyɔ ɔni mɔɔkɔ́ katɔ mɛni ni, utaakɔ lɛni usela ƒui.” 4Na benengu aavlanyɔ-ine bammɔ ku ngba batu ine bammɔ báyu bébi kalɔ na bémwi Katɔti ɔni nlie lɛgaboku lɛmmɔ lɛlɔ banini, “Ɔsia lɛni! Aleluya!” 5Na lɛdi lɛdi lɛ́si lɛgaboku lɛmmɔ kudɔ mmɔ na lɛɛsu lɛnini, “Bimwi bula Katɔti amii nwuna kabla bablane bani mɔɔyia-nwu, benengu ku banamu ƒui.” 6Ɔmmɔ kama ni, línu kɔku bonwu aani bekyuli lisu lɛdi na ɔ́lɛ aani ntukpa pii bɔku ku katɔ budu taasia kama. Na baasu banini, “Aleluya! Ɔsika Blɔti ɔni mbo ɔyikun ƒui ni, bédie nwuna lɛga bɔdi keyi! 7Bɛya na bula ƒui bɔkɛ ebiti na lɛlɔ lɛyɔ-bu na bɔkɔliku-nwu lɛnyi katɔ. Ɔsika Katɔti Koƒonu Ubi ɔmmɔ limeyi libendi lɛmmɔ lídu aani kalɛ na beeti uleku. Na Katɔti bekyuli báaklibi lɛlɔ bése aani uleku ɔmmɔ kalɛ. 8Blɔti úte-ma kɔdi kɔbuni kɔni muukeye sɛɛn ka beti benyimi.” Na kɔdi kɔbuni kɔmmɔ ndi ala siin ani na Katɔti bekyuli bammɔ bábla. 9Mmɔ na Katɔti ɔtu ɔmmɔ ɔ́su-mi ɔnini, “Nweni ala amɛni. Lɛlɔ lɛdubɔyɔ ama bani na badubɔlɔ beboku uleku ketikɔ adila kadikɔ.” Na ɔ́sɔ ɔ́su-mi ɔnini, “Etemila amɛni adi Katɔti ɔlati etemila geen.” 10Mmɔ ni, lɛ́yu líbi kalɔ na nwuna lɛgba akɔ na límwi-nwu aani Katɔti kalɛ. Nsu ɔ́su-mi ɔnini, “Tabla lɛni! Ami lɛnɔ kabla ɔblane ɔkpana na ndi aani ƒula kalɛ ku ƒula banwa bakladi bani nsiaku Blɔti Yesu ala bɔtina kama. Katɔti kani na ɔlɛka emwi lɛni. Ɔsika ala ani na Yesu ɔ́tina ni, ana kenye budie ndi Kɔyu ɔyikun ɔni nákya Katɔti kenye bediene lɛlɔ kemo.” 11Ɔmmɔ kama ni, lɛ́nu ka kayaa kálɛmi na ɔpɔnkɔ ɔƒualadi ɔdi ɔ́da ɔ́lɛ. Na ukyuli ɔni nlie-nwu lɛlɔ ni, baalɔ-nwu banii Kama Kekpokɔ ku Litemi Geen. Na ɔɔtɛ litemi siin na uukpó kekpo lɛnɔ siin. 12Nwuna anumi ese aani ogya na kɔgabwa pii kubi-nwu lili. Na bénweni lɛnyi lɛdi básia-nwu lɛlɔ lɛni na ukyuli ɔdi ɔɔɔgyi ntu anwu kani. 13Na ɔkya awu gyɔlɔɔ ɔni na báka bɔnyina bɔkya ubugya kemo. Na lɛnyi lɛni kani na bagyi-nwu ndi Katɔti Litemi. 14Na katɔ bekpone ƒui bakya lɛwu lɛbuni lɛƒualadi lɛni nse sɛɛn, na belie bapɔnkɔ baƒualadi lɛlɔ na basiaku ukyuli ɔmmɔ kama. 15Na litemi geen lɛni nse aani kewii kani bádɔ-ka lɛvi inyɔ lɛɛlɛ́-nwu kenye kani na ɔdubuti ukpo kalɔ ƒui bekyuli, na uti nwuna ɔyikun utaadi-ma lɛlɔ. Na ɔdubɔni-ma kɔtu kpakplaa ku Katɔti Ɔyikune Ƒui kɔnyi geen aani kalɛ na baaka ntu teedie ebi kemo kpakplaa na ntɛ kablakɔ. 16Na bénweni lɛnyi lɛdi básia nwuna awu lɛlɔ ku nwuna libuili kakɛ banii BAGA ƑUI ƆGA KU BATI ƑUI ƆTI. 17Ɔmmɔ kama ni, lɛ́nu Katɔti ɔtu ɔdi ka unye ɔƒɛ kemo na ɔ́kpali baasɛ bani ƒui muuveyi taavi kaya ku lɛdi momoomo ɔnini, “Bibo bibasala na bɛdi Katɔti adila enengudi ani na ɔ́klibi úse-mii. 18Katɔti úte-mii baga ku kekpo kenye benyene ku bayikune ku bapɔnkɔ ku bekyuli bani muulie-ma lɛlɔ. Badi benengu ku banamu ku bani mɔɔbla bekyuli bamba kabla ku bani mɔɔbla ama alati kabla. Bana ɔlɔna na úti úte-mii ka bɛduli bibweli na bimo!” 19Na lɛ́nu ka eƒiebuo ɔmmɔ ku kayawi baga ku bana bekpone ƒui básala ka betékpo Anwu ɔni nlie ɔpɔnkɔ ɔmmɔ lɛlɔ ku nwuna bekpone. 20Nsu béƒie eƒiebuo ɔmmɔ ku eƒiebuo ɔni néti lɛlɔ ɔ́bla ɔkɔ kenye udiene. Anwu ndi ɔni nábla akɔla budie taatina na eƒiebuo udeedi ɔmmɔ kenye, na úti akɔla budie taatina ammɔ ɔ́tɔlɔ bekyuli bani na bése likpo ku eƒiebuo ɔmmɔ likpose na bémwi eƒiebuo ɔmmɔ baƒiɔ. Na bekpone bammɔ béti eƒiebuo ɔmmɔ ku bekyuli bamɛni ƒui na bébo-ma bátákya ogya livongu lɛni nse bonwu aani ɛpu kalɛ, na ɔɔda ku ogya atabi kemo. 21Na bekyuli bakladi ni, ukyuli ɔni nlie ɔpɔnkɔ lɛlɔ na kewii katu-nwu kenye mmɔ ɔ́du-ma ku kewii kammɔ, na baasɛ bammɔ báduli-ma ɔlɔna ƒui bébweli na bémo.

will be added

X\