BUDIE TAATINA 12

1Amu na akɔla ala budie taatina bonwu adi áda álɛ kayaa. Na ɔƒɛ ɔ́ka ɔ́mana uleku ɔdi aani kɔdi kalɛ, na kɔbuli kɔkya-nwu lɛgba kalɔ. Na úbi ayabi leevu-inyɔ kagabwa kadi lili. 2Ɔda kaƒɔ. Na ka uwi údu ka ɔwɔ ni, ɔ́va momoomo ka uunú ɔlɛ ɔsu. 3Amu na lɛ́nu akɔla ala bɔnu bɔbambadi lɛnɔ! Liƒu kɔlakpi bonwu kɔdi négyie geen kɔ́da kɔ́lɛ kayaa. Na kubo eli maatɛ ku ese leevu. Na kagabwa kebi-ku lili biala lɛlɔ. 4Na kútiku kayaa ayabi lɛkpa lɛtɛdi ƒui ku nwuna ɔka úbo úbewi kalɔ lɛlɔ. Kunye uleku ɔmmɔ lɛtɔtɔ kalɛ na kuti ubi ɔni na uleku ɔmmɔ wawɔ ɔkun si ɔ́nya ɔ́wɔ-nwu. 5Na uleku ɔmmɔ ɔ́wɔ ɔnanabi ɔni madi kayawi ƒui lɛlɔ ku ɔyikun kpakplaa. Nsu Katɔti Kɔyu kúkpeli ubi ɔmmɔ kɔ́ƒɔ na kúti-nwu kúsienku Katɔti na nwuna lɛgaboku anumi. 6Na uleku ɔmmɔ úkeli úsie ketele kemo likpo lɛni na Katɔti ɔ́klibi úse-nwu. Mmɔ na badubo-nwu lɛlɔ bɔnu emeyi apimu unwi eti alɔ ku leevu. 7Amu na kekpo kálɛ na katɔ. Na Katɔti ɔtu unengudi ɔni ndi Mikael ɔ́tɔnku Katɔti batu bakladi na báta, na ama ku liƒu kɔlakpi kɔmmɔ ku kuna batu lɛnɔ békpo. 8Nsu kɔlakpi kɔmmɔ kútakana-ma kenye bunye. Anwuɔsu básɔ bátakɛ keliekɔ kadi na katɔ mmɔ. 9Na bábɔku liƒu kɔlakpi kɔmmɔ béboku kalɔ. Aku ndi kɔlakpi kɔkukudi bonwu kɔni baalɔ ukisine ɔmmɔ iye Satan, na ɔɔtɔ́lɔ kayawi kemodi ƒui. Bábɔku anwu ku nwuna batu ƒui bábava kalɔ lɛlɔ mɛni. 10Ɔmmɔ kama línu lɛdi bonwu lɛdi na katɔ na lɛɛsu lɛnini, “Ɔƒɛni na Katɔti ngba bɔƒɔ ku nwuna ɔyikun ku lɛgadi lɛ́da lɛ́lɛ. Na nwuna Ukyuli Ɔƒunadi ɔmmɔ kenyekɔ lɛnɔ káda kálɛ. Ɔsika bábɔku baƒɔtaadine ukisine ɔmmɔ bálɛku katɔ mmɔ. Anwu muunye bula Katɔti anumi usien ku ɔƒɛ taawia baƒɔtaadine bammɔ litemi. 11Bula banwani bádi-nwu lɛlɔ ɔkɛnku Koƒonu Ubi ubugya lɛlɔ ku litemi geen lɛni kenye bédie lɛlɔ. Ɔsika bénye kagyumana ka beti bana ngba bakpa. 12Anwuɔsu lɛlɔ lɛyɔ amii bani nkya katɔ mmɔ ƒui! Nsu muute kalɔ ku ɛpu ala ƒui bɔbwɛ! Ɔsika Satan ɔ́ɔda ɔ́lɛ-mii lɛlɔ. Na úti kɔnyi geen, ɔsika ɔgyi ka uwi klukui kani nébu-nwu.” 13Lebo lɛni na liƒu kɔlakpi kɔmmɔ kɔ́nu kɔ́ti ka bábɔku-nwu bábava kalɔ lɛlɔ ni, úse kalɔ ɔ́bi ɔ́siaku uleku ɔni náwɔ ubi ɔnanabi ɔmmɔ. 14Amu na Katɔti úte uleku ɔmmɔ aasɛ bonwu avwi kalɛ na uveyi uteesie nwuna keliekɔ na ketele kemo. Mmɔ na badubo-nwu bɔgyumana akwa atɛ ku kakɛ ɔsiku kɔlakpi kɔmmɔ kudɔ. 15Ɔmmɔ kama ni, kɔlakpi kɔmmɔ kútuo ntu pii bɔdi bɔ́lɛku nwuna kenye kemo kalɛ na bɔgba butéƒie uleku ɔmmɔ na butiku-nwu bɔtɔlɔku. 16Nsu kalɔ kébunku uleku ɔmmɔ na kébimi kenye na káni ntu bɔni nálɛ bɔ́si kɔlakpi kɔmmɔ kenye kemo ƒui. 17Mmɔ ni, kɔlakpi kɔmmɔ kúti kɔnyi kɔ́kya uleku ɔmmɔ geen, na kɔ́gyu kɔ́tɔlɔ kúsie kútékpoku nwuna bawɔ bakladi bani muunú Katɔti litemi na beedie Yesu kenye. 18Amu na kɔlakpi kukpidi kɔmmɔ kɔ́ƒɔ lɛlɔ kɔkya ɛpu kɔtu mmɔ.

will be added

X\