ƑILIPIƑUƆ 4

1Anwuɔsu ni, mina banwa bayɔne ɔni na naaanu-mii ni, kɔyɔ kúwi-mi! Bɛɛkya-mi kubiti geen na mɔɔtalaku lɛlɔ katɔ na amii ɔsu. Banwa bayɔne geen, lɛni na ɔdi ka binye kpakplaa na Kristo kemo. 2Muuvele Euodia ku Sinteke lɛnɔ ka benu lɛlɔ kalɔ na basɔ belie aani banwa belekubi na Blɔti kemo. 3Na amii lɛnɔ aani mina kabla bablane bakpana ni, mɔɔyɔ́ ka bibunku beleku bamɛni. Ɔsika báblaku-mi kabla na bɔ́kana na búgyingya litemi buni lɛmmɔ. Bɔ́bla ala amɛni ku Klement lɛnɔ ku banwa kabla bablane bakladi bani anyi na bénweni bakya Katɔti Ngba Ɔku kemo. 4Na mɔɔsu-mii nnii bɛya na lɛlɔ litaayɔ-mii na Blɔti kemo. Na nsɔ mɔɔsia kama nnii bɛya na lɛlɔ litaayɔ-mii. 5Bɛya na ukyuli biala ɔnu ɔti kalɛ na bɛda lɛlɔ buɛɛ. Ɔsika Blɔti bɔsɔ bubo bɔmmɔ búude. 6Ɔdi biala utekpoku lɛlɔ na lɛla biala lɛlɔ, mmomu bitaakpali Katɔti uwi biala kemo, na bitaasu-nwu ala ani bɛɛwia. Na si bɛɛkpali-nwu ni, na bitaagya-nwu enu. 7Na Katɔti ɔni muute keyi buɛɛ bɔni ntulo ɔyawine kalɔ bunu ɔdubɔgyumana bina kayi ku kasusu ƒui ɔni na biliku Kristo Yesu. 8Na ukplodi ni, banwa, biti bina kasusu bɛsia ala ani ndi etemila geen lɛlɔ ku ala ani mbo ɔbu ku ala ani nse siin ku ala ani nse sɛɛn ku ala ani mɔɔdia bɔnu ku ala ani náƒɔ lɛnyi ku ala ani ndia geen ku ala ani námanku bumwi lɛlɔ. 9Biti mina ɔbladu ku mina etemila ani ƒui na bínu na bɛ́tɛya bɛsiku-mi kudɔ bɛkya kabla bɔbla kemo. Na Katɔti ɔni muute keyi buɛɛ ni, ɔdubulieku-mii. 10Lɛlɔ lɛɛyɔ́-mi geen na Blɔti kemo ka bɛ́sɔ bɛ́bla kasusu kawɔdi na mina lɛlɔ bɔnu lɛlɔ. Ɔɔɔdi ɔni na bilánu-mi lɛlɔ ɔsu. Mmomu kuƒi nátatɛ ka bɛbla lɛni bite-mi. 11Na ɔɔɔdi bɔsu na mɔɔsu nnii mɔɔyaki lɛla lɛdi, mmomu ka lɛ́tɛya kalɛ na lɛla biala na lɛ́kɛ liduku-mi ɔsu. 12Na ngyi kalɛ na lɛwaba ku lɛlakɛ lise na lɛla biala kemo. Na lɛ́tɛya lɛbɛla lɛni mɔɔtina-mi kalɛ na lɛti lɛlɔ bɔda na kesii biala ku uwi biala kemo. Na kɔka kemo o-o, bumo o-o, lɛkɛ o-o, iye ayaki kemo o-o ni, nnye nte ana ƒui. 13Mɔɔkana na mɔɔbla lɛla biala ɔkɛnku Kristo ɔyikun ɔni na úte-mi ɔsu. 14Nsu bɛ́bla-nwu kaduɛ ka bíbunku-mi na mina lɛbibo kemo. 15Na amii Ƒilipiƒuɔ ni, amii alati bɛgyi geen ka uwi ɔni na lɛ́tɔlɔ Makedonia na líse kalɔ mɔɔkɔ́ litemi buni lɛmmɔ lɛsa ni, amii kani ndi baƒɔtaadine lɛkpa lɛni néte-mi kebunku na lɛla lɛni na lɛ́bla líte-mii kenye. 16Na ɔni lɛ́kya Tesalonika muedi ni, ka mɔɔwia kebunku ni, bíbunku-mi bítulo kunwi. 17Na ɔɔɔdi etela na mɔɔwia lite lɛlɔ, mmomu lɛla lɛni mete-mii kɔsia na katɔ na mɔɔsia anu. 18Na bɛ́ƒɔ-mi kabla kayu ƒui. Na kayu kammɔ kétulo kalɛ na ɔ́manku muedi. Etela ani ƒui bíti bímene Epaƒrodito mɛni ni, émo-mi! Etela ammɔ ese aani akpala ƒɛƒɛɛ ani béti bákpa béte Katɔti, na áyɔ-nwu kaƒɔ, na aada-nwu kubiti. 19Na mina Katɔti ɔdubute-mii etela ani ƒui bɛɛwia ɔkɛnku Kristo Yesu lɛkɛ ku bukeye kemo. 20Bɛya bumwi Bula Ɔti Katɔti ɔ́si ɔƒɛni úsela ƒui. Ɔsia lɛni. 21Mɔɔkya Katɔti bebi bani ndi Kristo Yesu badi ƒui kenye-oo! Na banwa bani nkya-mi kudɔ mɛni lɛnɔ begyele-mii o-o! 22Katɔti bekyuli bani ƒui nkya mɛni beegyele-mii. Ɔni ntulo ndi bekyuli bani nkya Kaesare kaduli. Ɔsia lɛni. 23Na Blɔti Yesu Kristo lɛƒɔndia lɛsiaku bina ƒui.

will be added

X\