ƑILIPIƑUƆ 3

1Ukplodi ni, mina banwa, bɛya na lɛlɔ litaayɔ-mii na Blɔti kemo. Lɛɛɛdaku-ni si nsɔ mɔɔsia kama teenweni-mii ala ani na líinweni ḿbavi. Na si ina lɛ́bla lɛni muedi ni, ɔdi bina kebunku. 2Bɛnu ala ekpidi bablane bani mɔɔbla ala aani bakpɛwe bebuo bekpine mmɔ bɛti. Badi bekyuli bani nnye-mii lɛlɔ ka ɔlɛka bikulo bina ago. 3Abu ndi bekyuli bani mmomu nékulo ago, ɔsika buumwi Katɔti ɔkɛnku nwuna Kɔyu lɛlɔ na bɔɔkɛ́ ebiti ka abu ku Kristo Yesu bɔ́bla unwi ɔsu. Na búteti lɛlɔ bútasia ɔlɔna lɛlɔ ɔdi ala bɔbla lɛlɔ. 4Na si ukyuli ɔdi ɔɔkali ka ɔkana uti lɛlɔ ɔsia ɔlɔna lɛlɔ ɔdi ablala lɛlɔ ni, na nka ami mbo kuƒi kɔmmɔ ntulo. 5Uwi ɔni na lɛ́kɛ Kwasida unwi ka báwɔ-mi kani na békulo-mi lego. Na ami lɛnɔ ndi Israelni. Na lɛ́si Benyamin kaba kemo. Na mina bati kuuku badi Hebriƒuɔ geen. Na si Mose ɔda bubo lɛti pɛ lɛlɔ bɔdi ɔsu ni, na nka Ƒarisini na ndi. 6Na nnye ɔda bubo bɔmɛni lɛlɔ kaduɛ. Na ɔkɛnku ɔmɛni ɔsu líkpoku Kristo baƒɔtaadine lɛkpa lɛmmɔ. Na si banii ɔda bubo bɔmmɔ lɛti pɛ lɛlɔ bɔdi na baanu ukyuli ɔni nse siin ni, na nka likpidi lɛdi liiibo-mii lɛlɔ. 7Nsu ɔni na nka ɔlɛka lɛnu ala ammɔ aani kɔsia kɔdi ni, ɔƒɛni mɔɔnu-nya aani ala keeke ɔ́si Kristo ɔsu. 8Na ɔɔɔdi ɔmmɔ lɛti. Mɔɔnu lɛla biala aani lɛla keeke si líti mɔɔkɔ́ku lɛla lɛni náƒɔ kuye geen mɛni, na ani ndi ka lɛ́ti Kristo Yesu ɔni ndi mina Ɔti. Na anwuɔsu ni, líbo lɛla biala líwiakun. Na lɛ́nu-nya aani kebu alakpi kalɛ na ami ku Kristo bɔbla unwi. 9Na mɔɔwia ka liti mina lɛlɔ ƒui lite-nwu. Ɔmɛni ɔdubɔtina ka mina siin bɔbla útasi ami ɔlati kudɔ aani bɔni udu na bekyuli baakali ka baakɛ́ ɔkɛnku ɔda bubo lɛlɔ bɔdi kemo, mmomu bɔkɛnku Kristo bɔƒɔtaadi kemo. Na siin bɔbla bɔmɛni nási Katɔti kudɔ na bɔdanku bɔƒɔtaadi. 10Na lɛla lɛni kani na mɔɔwia ndi ka lɛti Kristo. Na ɔyikun ɔni náya na ɔ́ta ɔ́lɛ bekpine akɔ ɔkya-mi lɛlɔ kemo. Na liboku-nwu abi na lɛblaku-nwu unwi na nwuna kukpi kemo. 11Na ntaasia anu ka ami lɛnɔ mata malɛ kekpine na ulu ɔmmɔ kani lɛlɔ. 12Na ɔɔɔdi bɔsu na nda nnii lɛ́ɛdi lɛlɔ iye ami lɛ́ɛbla sɛɛn lɛ́wɔlɔ. Mmomu nnye kpakplaa ka lɛkɛ lɛyuƒɔla lɛni na Kristo Yesu ubo ute-mi. Na ani ndi ka ɔya na línwini nwuna ɔdi. 13Banwa, ɔɔɔdi bɔkɛ na lɛ́ɛkɛ lɛyuƒɔla lɛmmɔ. Mmomu lɛla linwi lɛni na mɔɔbla ndi ka lɛyiƒla ala aani na lɛ́bla lɛ́vi. Na lɛkya ɔkplu na likpo ntédu kawɔlɔkɔ. 14Anwuɔsu muukeli usi na likulo kabuli kalɛ na lɛkɛ lɛyuƒɔla lɛni na Katɔti ɔ́lɔ-mi ka libo mbaƒɔ na katɔ na Kristo Yesu ɔsu. 15Na abu bani ƒui nésie anumi na bɔƒɔtaadi kemo ni, ɔlɛka bɔkɛ kasusu kamɛni. Nsu si badi bebo kasusu kabambadi ni, Katɔti ɔdubɔya na ɔmɛni ɔbla-mii nwaa. 16Na lɛla lɛni námanku ndi ka bɛya na bula ngba bulie bɔ́manku kesii kani na búusie anumi búbedu. 17Banwa, bisie anumi na bitaatɛya mina udu, na bɛtɛya udu ɔbuni bɛsiaku bani nli ngba bɔbuni bɔni na búlie bɔtina-mii lɛlɔ. 18Lɛ́ɛsu-mii kɔlɛ kɔlɛ ḿbavi, na ɔƒɛni nsɔ mɔɔsu-mii ku keku buwulo ka bekyuli pii bakya-mii akɔ ɔni na bana ngba bulie bɔ́ya na bénwini bekisine béte Kristo kukpi kɔni na úkpi na ugyii lɛlɔ. 19Na ɔdubɔwɔlɔku-ma na bakywi na lɛgyavonku kemo. Ɔsika bana kaƒɔ kani na beemwi. Na baatina lɛlɔ na ala ani na nka ɔlɛka ekpo-ma kɔƒa lɛlɔ. Na kayawi ala lɛlɔ kasusu kani na beeti. 20Nsu abu ni, bula ɔma ndi Katɔ Ɔga Ɔma. Na bunye bɔgya bula Ɔƒɔne ɔni ndi Blɔti Yesu Kristo. 21Na ɔdubɔvumana bula kayawi ɔlɔna kpɛtɛ kpɛtɛ ɔmɛni na ɔbla-nwu aani nwuna ɔlɔna ɔni muukeye mmɔ kalɛ ɔkɛnku ɔyikun ɔni na ubo na ɔɔyá na lɛla biala liiboku lɛlɔ kalɔ teete-nwu kenye.

will be added

X\