ƑILIPIƑUƆ 2

1Mɔɔƒɔ́ taadi ka bina ngba bɔni na bibo na Kristo kemo ɔ́ya na bɛɛkya ɔkplu. Na nwuna bɔyɔ bɔɔsia-mii kɔnu. Na bɛ́bla ku nwuna Kɔyu unwi, na bɛda lɛlɔ kɔkɔɔkɔ, na bina lɛlɔ lɛɛkywí bina lɛlɔ kaƒɔ. 2Na si use lɛni sɔsɔ ni, na mɔɔkya-mii ogya ka bɛya na lɛlɔ lɛyɔ-mi lɛwɔlɔ, na biti bɛtina ka biiti kasusu kenwi na bɛɛyɔ́ lɛlɔ na bɛdi benwi na kɔyu ku kasusu kemo. 3Bitabla lɛla lɛdi bitasiaku amii lɛti lɛkɛ lɛlɔ iye bɛbla na biti bɛtina lɛlɔ. Mmomu biboku lɛlɔ kalɔ bite lɛlɔ. Na uwi biala ni, ɔdi biala utaabu ɔkpanadi teetulo lɛlɔ. 4Na bɛwia bina bakpana bɔdia na ɔɔɔdi awɔ kani ɔdi. 5Bina kasusu ɔlɛka kabla kenwi ku Kristo Yesu kadi. 6Anwu nkɛnku Katɔti ukyuli udu uwi biala kemo. Nsu útata útenye ɔnii nwuna udu ɔmmɔ ute-nwu kuƒi kɔdi. 7Mmomu ɔ́bla lɛlɔ aani si ɔɔɔdi lɛla biala. Ɔ́bla lɛlɔ aani ukyuli ɔni mɔɔbla ukyuli bamba kabla. Ɔsika úbo aani ukyuli ɔyawine kalɛ. 8Ɔmmɔ ɔsu ni, úboku lɛlɔ kalɔ na únu Katɔti litemi utédu ka úkpi ugyii lɛlɔ kukpi muedi. 9Ɔkɛnku ɔmɛni ɔsu ni, Katɔti ɔ́talaku-nwu katɔ na úte-nwu kenyekɔ kenengudi ƒui. Na úte-nwu lɛnyi lɛni ntulo na anyi ƒui akɔ. 10Na si bálɔ Yesu lɛnyi ni, ɔlɛka ɔdi biala ɔlɛ akɔnkɔ kalɔ, ama bani nkya katɔ ku kayawi ku kalɔ kemo ƒui! 11Na ukyuli biala ɔdubudie kenye ɔnii Yesu Kristo ndi Blɔti. Na beti bumwi bete Unwoti Katɔti. 12Anwuɔsu ni, mina bakpana bayɔne, aani kalɛ na bɛɛdi mina litemi lɛlɔ si nkya-mii kudɔ ni, lɛni kani na ɔdi ka bɛdi-nya lɛlɔ bitulo si uwi ɔni na liiibo-mii kudɔ lɛnɔ. Bise anumi na bitaabla ala ani mɔɔtina ka Yesu ɔ́ƒɔ-mii ngba, na biti ɔbu geen bite Katɔti. 13Ɔsika Katɔti ɔkya-mii akɔ ɔɔbla kabla na bina akɔ uwi biala kalɛ na ɔbla-mii na bɛkana na bɛdi ala ani na ɔ́su-mii lɛlɔ. 14Bitaabla lɛla biala basu-mii, na bitata bitenye lɛlɔ lɛlɔ, na bitakyaku lɛlɔ unyeƒi. 15Mmɔ na bɛdubɔlɛ kɔtɔ bɔdu biala kemo na bɛbla sɛɛn aani Katɔti bebi bani na likpidi liiibo-ma lɛlɔ. Na ka bilieku bekyuli bekpidi bani nkya kayawi kani nébie mɛni kemo ɔsu ni, bikeye na bana akɔ aani kalɛ na ayabi eekeye na kayaa. 16Na bɛda ngba litemi lɛmmɔ kaduɛ. Na si bɛ́kana na bɛ́bla ɔmɛni ni, ndubɔkɛ kenyekɔ na lɛkun lɛmɛnɛ na limeyi lɛni lɛlɔ na Yesu wada walɛ. Ɔsika ɔdubɔtina ka ńtekeli usi ɔmmɔ keeke iye ńtebo abi ńtewiakun. 17Nsu si ina mina ubugya na bada beewi kalɔ aani kalɛ baabla akpala na bina lili kalɛ na bina bɔƒɔtaadi buusié anumi ni, lɛlɔ lɛdubɔyɔ-mi na kubiti kɔda-mi na bina ƒui ɔsu. 18Lɛni kani na ɔdi ka lɛlɔ lɛyɔ-mii na bɛya na ebiti ada ami ku-mii ƒui. 19Si Katɔti ɔ́tunaku-mi ni, uwi klukui kama ndubɔtala Timoteo lɛkya-mii, kalɛ na lɛkɛ ɔlɔkplu si línu bina lɛlɔ lɛla lɛdi lɛsiku-nwu kudɔ. 20Liiibo ukyuli ɔdi liiitulo anwu ɔni na ami ku-nwu kasusu kaabla kenwi. Ɔsika kalɛ na use-mi na bina lɛlɔ ni, lɛni kani na ɔɔbla-nwu. 21Nsu ukyuli bamba biala ni, anwu ɔlati bɔdia lɛlɔ na nwuna kasusu kasia na kaaakɛnku Yesu Kristo ulu lɛlɔ. 22Nsu Timoteo anwu ni, amii alati bɛgyi kalɛ na nwuna udu buni ɔmmɔ use. Ɔsika aani kalɛ na ubi ku ɔti baabla kabla taasala ni, lɛni geen na úbunku-mi na litemi buni lɛmmɔ bɔsu kemo. 23Anwuɔsu mbo lɛnunsia ka ndubɔtala-nwu lɛkya-mii kɔnakunwi si lɛ́nu kalɛ na ala aavínku-mi. 24Na lɛ́ƒɔ lɛ́di na Blɔti lɛnyi kemo ka ni, uwi uletu ami lɛnɔ ndububo-mii kudɔ. 25Nsu lɛ́nu ka ɔlɛka lɛtala Epaƒrodito na ubo-mii kudɔ. Ɔdi mina ɔnwani ɔni nényeku-mi aani ukpone na bɔ́bla Katɔti kabla. Na ɔdi bina ukyuli ɔni na bɛ́tala ka ubo ubanu-mi lɛlɔ. 26Anwu lɛnɔ unye kpakplaa ka ɔnu-mii. Na ɔdi lɛla lɛni muukpóku-nwu geen ɔsika ɔ́ti ka bínu ka úbeƒi. 27Sɔsɔ úbeƒi geen na úbu blii suɛ nka úkpi. Nsu Katɔti ɔ́nu-nwu kɔnyana. Na ɔɔɔdi anwu lɛti na ɔ́nu kɔnyana, mmomu ami lɛnɔ. Si ɔɔɔdi lɛni ni, nka mina lɛlɔ lɛdubɔkywi kaƒɔ geen. 28Anwuɔsu na mɔɔwia geen ka lidie-nwu ulu kalɛ na si bɛ́nu-nwu ni, na kubiti kɔsɔ kɔda-mii. Na ami lɛnɔ mina kɔnyana buwulo bubo kalɔ. 29Anwuɔsu bigyingya enu na bɛƒɔ-nwu ku kubiti na Blɔti lɛnyi kemo. Na biti ɔbu bite bekyuli bani ƒui nse aani kalɛ na use. 30Ɔsika úti nwuna ngba ɔ́kpa na úbu blii suɛ nka úkpi ɔ́si Kristo kabla ɔsu. Na úte-mi kebunku kani amii alati bítakana-mi bute.

will be added

X\