MATEO 9

1Yesu úduo ɔkɔlɔ kemo na bénwini básia ɛpu ɔmmɔ lɛlɔ bésie nwuna ɔma. 2Mmɔ na béti ɔnana ɔdi na ɔ́ƒɛ uwi kalɔ báva lɛtala lɛlɔ, na béti-nwu béboku-nwu kudɔ. Ka Yesu ɔ́nu ka báƒɔ bɔ́di geen ɔsu ni, ɔ́su ɔlɛne ɔmmɔ ɔnini, "Ubi, kɛ kayi. Líti ƒula ekpidi lɛ́kyiɛ-ɔ." 3Amu na ɔda bubo ala batinane badi bakya baasu lɛlɔ banii, "Ukyuli ɔmɛni ɔɔkɔ́ kakɔ na uutemi enyekpi." 4Yesu ɔ́nu bana kasusu kamɛni ɔ́ti na úye-ma ɔnini, "Bi ɔsu na biiti kasusu kekpidi kamɛni udu? 5Na ɔmani bɔsu nse kpɛtɛ kpɛtɛ ntulo ka lɛsu nnii, 'Líti ƒula ekpidi lɛ́kyiɛ-ɔ' munuu ka lɛsu nnii, 'Ta, na esie'? 6Ndubudie lɛtina-mii ka Ukyuli Ɔyawine Ubi ubo ɔyikun na uti ekpidi ɔkyiɛ na kayawi mɛni." Anwuɔsu ɔ́su ukyuli ɔni náƒɛ uwi kalɔ mmɔ ɔnini, "Ta nye, na eti ƒula atɛla na eteesie kaduli." 7Amu na ɔnana ɔmmɔ ɔ́ta na úti nwuna lɛtɛla na ɔ́tɔlɔ úsie kaduli. 8Uwi ɔni na bekyuli bammɔ bánu ɔmɛni ni, liƒu lɛ́da-ma na bémwi Katɔti ka úti ɔyikun ɔmɛni udu úte ukyuli. 9Amu ka Yesu ɔ́si mmɔ úsela ni, ɔ́nu kuyi ɔƒɔne ɔdi na baalɔ banii Mateo ka ɔ́kya nwuna kabla kablakɔ. Na ɔ́su-nwu ɔnini, "Siaku-mi kama." Mmɔ kani na Mateo ɔ́ta na ɔ́siaku-nwu kama. 10Uwi ɔni na Yesu ulie ɔɔdi na Mateo kaduli ni, kuyi baƒɔne pii ku alaekpidi bablane babambadi bébo babadiku Yesu ku nwuna batɛyane na mmɔ. 11Amu na Ƒarisiƒuɔ bani nánu ɔmɛni ni, béye nwuna batɛyane banii, "Bi ɔsu na bina ala ɔtinane ku bekyuli bamɛni udu baadi?" 12Yesu únu lɛla lɛni na básu na údie kenye ɔnini, "Balɛne mɔɔwia ɔbwine, na ɔɔɔdi bani na beléƒi. 13Bitáwia lɛla lɛni nkya Bunweni Kedee Ɔku kemo kalɔ binu ka ni, 'Lɛƒɔndia na Katɔti ɔɔwia, na ɔɔɔdi bebuo buti taakpa.' Ńtebo nnii mbawia bekyuli babuni, mmomu bekyuli bekpidi ɔsu na líbo." 14Amu na Ntu Ɔkpilane Yohane basiakune bébo bébeye Yesu banini, "Bi ɔsu na abu ku Ƒarisiƒuɔ buulie kɔka uwi uwi, na ƒula batɛyane ama belemonku kɔka bulie?" 15Yesu údie kenye ɔnini, "Bɛɛƒɔ́ taadi ka bekyuli bani na bálɔ béboku uleku ketikɔ badubo kɔnyana buteewulo na uwi ɔni na uleku ɔgya ɔmmɔ ɔkya-ma kudɔ? Ulebo ulete lɛni kudii! Nsu limeyi lɛdi lɛdububo ɔni na badubuti uleku ɔgya ɔmmɔ na bana kudɔ. Na uwi ɔmmɔ na badubulie kɔka. 16"Ukyuli biala uléti lɛdiku lɛwɔdi taaka taada lɛkukudi lɛlɔ. Ɔsika lɛdiku lɛwɔdi lɛmmɔ lɛdubɔduli kɔkukudi kɔmmɔ na ɔya na liƒi lɛmmɔ libomo libu. 17Lɛni kani na beleti ntɛ bɔwɔdi teewi ɔku koƒo kɔkukudi kɔni kemo béewi ntɛ dii. Si ɔɔdi lɛni ni, ɔku koƒo kɔkukudi kɔmmɔ kɔdubɔbwɛ na ntɛ bɔmmɔ lɛnɔ bɔdubuwiakun. Nsu beeti ntɛ bɔwɔdi beewi ɔku koƒo kɔwɔdi kemo. Na bana anyɔ ƒui badubɔdia." 18Uwi ɔni na Yesu ɔɔtɛmiku-ma ni, Yudaƒuɔ kasalakɔ lɛlɔ ɔnune ɔdi úbo-nwu kudɔ na ɔ́lɛ akɔnkɔ úvele-nwu ɔnini, "Mina ubi ulekubi úkpi ɔƒaani, nsu bo na eti ƒula enu asia-nwu lɛlɔ na ɔdubɔta." 19Anwuɔsu Yesu ɔ́ta ɔ́siaku-nwu ku nwuna batɛyane lɛnɔ. 20Na ka Yesu úsela ni, uleku ɔdi ɔni na ubugya uuwi akwa leevu-anyɔ úbasia Yesu kama na útuku-nwu awu kɔtu. 21Ɔ́bla lɛni ɔsika ɔ́ƒɔ ɔ́di ka si ɔ́nya útuku-nwu awu kɔtu ni, ɔlɛ ɔmmɔ ɔdubɔba-nwu. 22Yesu únwini na ɔ́nu uleku ɔmmɔ na ɔ́su-nwu ɔnini, "Kɛ kayi, mina ubi ulekubi! Ƒula bɔƒɔtaadi bɔ́bwi-ɔ." Mmɔ kani ɔlɛ ɔmmɔ ɔ́ba-nwu. 23Amu na Yesu útéduo Yudaƒuɔ kasalakɔ lɛlɔ ɔnune ɔmmɔ kaduli kemo, na ɔ́nu lɛkwanu bediene ku bani muuwulo. 24Na ɔ́su-ma ɔnini, "Ukyuli biala ɔlɛ keyi. Ulekubi ɔmmɔ útekpi, mmomu bɔlɛɛ kani ɔda." Amu na bése kalɔ baamá-nwu. 25Amu ka bágya bekyuli bammɔ bálɛku ni, Yesu úduo ulekubi ɔmmɔ ɔtɔ kemo, na ɔ́da-nwu kɔnu. Na ɔ́ta ulie. 26Litemi lɛmɛni lígyingya na kalɔ kammɔ lɛlɔ kesi kesii. 27Amu ka Yesu ɔ́si mmɔ úsela ni, banumbwɛne inyɔ badi báta básiaku-nwu kama ku kɔvanu banii, "Ɔga Dawid uwɔ! Nu-bu kɔnyana." 28Amu uwi ɔni na Yesu útéduo kaduli kemo ni, banumbwɛne inyɔ bammɔ bébo-nwu kudɔ. Na Yesu úye-ma ɔnini, "Bɛɛƒɔ́ taadi ka ndubɔkana-mii bɔbwi?" Mmɔ na bédie kenye banii, "Bɔ́ƒɔ bɔ́di!" 29Amu na Yesu útuku bana anumi na ɔ́su-ma ɔnini, "Ubo ute-mii kalɛ kani na bɛ́ƒɔ bɛ́di." 30Mmɔ kani na anumi álɛmi-ma. Na Yesu úbo-ma ɔda kpakplaa ɔnini, "Bitasu ukyuli ɔdi lɛla lɛmɛni." 31Nsu ka bási mmɔ ni, bébo litemi lɛmɛni kudu na kalɛkɛ kammɔ lɛlɔ ƒui ɔ́si Yesu lɛlɔ. 32Uwi ɔni na banana bási baalɛ́ ni, bekyuli badi béti ɔnana ɔdi ɔni na kɔyu kukpidi kɔ́ya na ulakana butemi béboku Yesu kudɔ. 33Na Yesu ɔ́gya kɔyu kukpidi kɔmmɔ ɔ́lɛku-nwu lɛlɔ kemo. Mmɔ kani na ukyuli ɔmmɔ úse kalɔ uutemi. Ɔmɛni ɔ́bla bekyuli bani nnye mmɔ kalɛ kadi, na básu banii, "Bútanu ɔmɛni udu kudii na Israel kalɔ lɛlɔ!" 34Nsu Ƒarisiƒuɔ badi básu banii, "Ayu ekpidi ɔga néti-nwu ɔyikun ɔni na ɔda ɔɔgyá ayu ekpidi ammɔ." 35Yesu úsie ɔ́vi lɛma ku akpaklɔ ani nkya amadɔ mmɔ kemo. Ɔ́tina ala na Yudaƒuɔ kɔsakɔ. Na ɔ́kɔ litemi buni lɛsa lɛni nkɛnku Katɔti lɛga kadikɔ lɛlɔ. Na ɔ́bwi lɛlɛ lidu lidu. 36Na ka ɔ́nu bekyuli esu esu ammɔ ni, bákywi-nwu kaƒɔ ɔsika béƒu na beeebo bebunkune. Na bese aani baƒonu bani neeebo ɔdane. 37Anwuɔsu únwini na úbo nwuna batɛyane bammɔ lɛgba ɔnini, "Edula ani néedu ka baƒɛ ni, emomo. Nsu bekyuli bani maƒɛ-nya beeemomo. 38Anwuɔsu bivele edula ɔlati ɔmmɔ na uti kabla bablane badi ubebunku kabla kammɔ kemo."

will be added

X\