MATEO 8

1Uwi ɔni na Yesu ɔ́si ɔ́yu kɔbi kɔmmɔ lɛlɔ ni, bekyuli pii básiaku-nwu kama. 2Amu na ɔnana ɔdi muuƒi ɔlɛgyie úbo úbalɛ akɔnkɔ na nwuna anumi na ɔ́su-nwu ɔnini, "Blɔti! Si aayɔ́ ni, akana na abla-mi sɛɛn." 3Yesu únene kɔnu útuku-nwu, na ɔ́su-nwu ɔnini, "Mɔɔyɔ́. Lɛlɔ lɛbla-a sɛɛn." Mmɔ kani ni, ɔlɛ ɔmmɔ ɔ́ba ɔnana ɔmmɔ. 4Amu na Yesu ɔ́su-nwu ɔnini, "Nu kaduɛ, na tasu ukyuli ɔdi lɛla lɛdi. Mmomu teesie na eti lɛlɔ atátina Katɔti ɔkpane, na udie-ɔ kenye. Na ete akpala ani na Mose ɔda bubo bɔ́tina. Na ukyuli biala ɔnu ɔti ka ɔlɛ ɔmmɔ ɔ́ba-a sɔsɔ." 5Nwuna kama ka Yesu úduo Kapernaum ni, Romaƒuɔ bekpone unengu ɔdi úbo úbevele-nwu ɔnini, 6"Blɔti! Mina kabla ɔblane uuƒi kpakplaa na ɔ́tɛ kaduli ɔni na ulakana bɔta." 7Yesu ɔ́su-nwu ɔnini, "Ndubusie ntábwi-nwu." 8Bekpone unengu ɔmmɔ údie kenye ɔnini, "Blɔti, oowo! Ńtamanku ka ebo mina kaduli. Nsu su litemi lɛdi kani na mina kabla ɔblane ɔmmɔ ɔlɛ ɔdubɔba-nwu. 9Ami lɛnɔ ndi ukyuli ɔni nkya benengu badi kalɔ, na bekpone badi lɛnɔ bakya-mii kalɔ. Si lɛ́su ɔdi nnii, 'Teesie' ni, uusié. Na si lɛ́su ɔdi lɛnɔ nnii ubo ni, uubo. Na si lɛ́su mina kabla ɔblane nnii, 'Bla ɔmɛni' ni, ɔɔbla." 10Ka Yesu únu ɔmɛni ni, ɔ́bla-nwu kalɛ kadi na ɔ́su bekyuli bani nsiaku-nwu mmɔ ɔnini, "Mɔɔsu-mii geen ka na Israelƒuɔ akɔ muedi ni, ńtanu tɔ bɔƒɔtaadi bɔmɛni udu. 11Mɔɔsu-mii geen ka bekyuli pii badubɔsi ɔƒɛ katukɔ ku kanukɔ bebo Katɔ Ɔga Ɔma limeyi kadikɔ. Badubulie kalɔ na badi ku Abraham ku Isak ku Yakob na mmɔ. 12Nsu Katɔti ɔdubɔbɔku Yudaƒuɔ badi bani nka badi bagadine mmɔ utákya kasuudikɔ. Mmɔ na badubuwulo na badu bana anumi." 13Amu na Yesu ɔ́su bekpone unengu ɔmmɔ ɔnini, "Teesie kaduli. Kalɛ na áƒɔ ádi ni, ɔdububo ute-ɔ lɛni." Na bekpone unengu kabla ɔblane ɔmmɔ ɔlɛ ɔ́ba-nwu uwi ɔmmɔ kemo kani. 14Ka Yesu úsie Petro kaduli ni, ɔ́nu ka Petro uleni ɔtɛ uuƒi kpakplaa ɔni na lɛlɔ lɛ́ƒɔ-nwu ogya. 15Amu na Yesu úƒie-nwu kɔnu ɔ́da na ɔlɛ ɔmmɔ ɔ́ba-nwu kɔnakunwi, na ɔ́ta na ɔ́bla-nwu lɛƒɔ. 16Na useyi uwi ni, béti bekyuli pii bani na ayu ekpidi eekpóku-ma béboku Yesu. Na ɔ́su lɛlakpa linwi na ɔ́bɔku-nya ɔ́lɛku-ma lɛlɔ kemo. Na ɔ́bwi bani muuƒi mmɔ ƒui. 17Ɔ́bla ɔmɛni kalɛ na kenye kani na Katɔti Kenye Udiene Yesaia ɔ́su úse ubo ute lɛni ɔnini, "Anwu ɔlati ɔ́bwi-bu lɛlɛ lɛni na buuƒi ƒui." 18Uwi ɔni na Yesu ɔ́nu bekyuli pii bani nnye-nwu kudɔ ni, ɔ́su nwuna batɛyane bammɔ ɔnii baya na beteesie ɛpu ɔmmɔ ɔvi. 19Ɛpu ɔvi mmɔ ni, ɔda bubo ala ɔtinane ɔdi úbo-nwu kudɔ. Na ɔ́su Yesu ɔnini, "Ala ɔtinane, kesii biala na adubusie ni, ndubɔsiaku-ɔ kama." 20Amu na Yesu ɔ́su-nwu ɔnini, "Beƒiebuo bebo libu lɛni kemo na baatɛ, na baasɛ bebo ayu. Nsu Ukyuli Ɔyawine Ubi ni, anwu uuubo katɛnkɔ muedi." 21Na ukyuli bamba ɔdi ɔ́su ɔnini, "Blɔti, masiaku-ɔ. Nsu ya na lɛka busie ntáva mina ɔti." 22Yesu údie kenye ɔnini, "Siaku-mi kama. Na aya na bani nli aani bekpine ka bátaƒɔ bátadi ɔsu bataava bana bekpine." 23Yesu úduo ɔkɔlɔ ɔdi kemo na nwuna batɛyane lɛnɔ básiaku-nwu kama. 24Kɔnakunwi ni, ɔƒɛƒɛɛ kpakplaa ɔdi úse kalɔ uukpó na ɛpu ɔmmɔ lɛlɔ. Na uubó ntu teewi ɔkɔlɔ ɔmmɔ kemo, na ɔɔyɔ́ ɔnyi. Nsu uwi ɔmmɔ ƒui ni, na Yesu anwu ɔtɛ ɔlɛɛ. 25Batɛyane bammɔ bátágyila-nwu na básu banii, "Blɔti, ƒɔ-bu! Bɔdaku bukpi!" 26Mmɔ na Yesu úye-ma ɔnini, "Bi ɔsu na bibo liƒu lɛni? Bina bɔƒɔtaadi bɔsɔ." Amu na ɔ́ta na ɔ́bɔku ɔƒɛƒɛɛ ku ntu bɔni mɔɔnwanɛ lɛlɔ mmɔ ɔnii bɔda bɔya. Na mmɔ ƒui kábla kpoo. 27Amu na ɔ́bla ukyuli biala kalɛ kadi. Na béye lɛlɔ banini, "Bi? Bútanu ukyuli ɔmɛni udu kudii! Ɔƒɛƒɛɛ ku ntu bɔni mɔɔnwanɛ lɛlɔ muedi buunú-nwu litemi!" 28Ka Yesu útéduo Gadara kalɛkɛ na ɛpu ɔvi ni, nkyuli inyɔ badi na ayu ekpidi eekpóku-ma bási bekyuli kavakɔ mmɔ bábasiaku-nwu. Na ka bana lɛlɔ lɛɛda liƒu geen ɔsu ni, ukyuli ɔdi ulásia ulu ɔmmɔ lɛlɔ. 29Kɔnakunwi ni, báva ku lɛdi momoomo na béye-nwu banii, "Bi na awɔ Katɔti Ubidi aawia-bu kudɔ mɛni? Ébo anii abaka-bu kɔtu bɔni asa na uwi ɔni na Katɔti ɔdubɔtɛku-bu litemi wedu?" 30Amu na amadɔ mmɔ ni, baplakuo pii badi benye baadi. 31Mmɔ na ayu ekpidi ammɔ évele Yesu anini, "Si anii aabɔku-bu alɛku ni, na abɔku-bu atákya baplakuo pii bammɔ kemo." 32Mmɔ ni, Yesu ɔ́bɔku-ma ɔnii, "Bɛvi bɛlɛ-ma kemo." Anwuɔsu bálɛ-ma kemo bétéduo baplakuo bammɔ kemo. Na baplakuo bammɔ békeli báyu kɔbi kɔmmɔ lɛlɔ bátánu béduo ɛpu ɔmmɔ kemo na békpi. 33Ɔmmɔ ɔsu ni, baplakuo lɛlɔ banune bammɔ békeli bátɔlɔ bésie ɔma kemo. Na bátásu ala ani ƒui na alɛku baplakuo bammɔ ku bekyuli bani na ayu ekpidi eekpóku mmɔ lɛlɔ. 34Anwuɔsu ɔma ɔmmɔ bekyuli ƒui bésie banii batásiaku Yesu. Na ka bánu-nwu ni, bévele-nwu ka ɔtɔlɔ bana kalɔ lɛlɔ.

will be added

X\