MATEO 7

1"Bitatɛku bekyuli litemi kalɛ na Katɔti lɛnɔ ulatɛku-mii litemi. 2Ɔsika Katɔti ɔdubɔtɛku-mii litemi aani kalɛ kani na amii lɛnɔ bɛɛtɛku bekyuli litemi. Na ulu ɔni lɛlɔ bɛ́sia bɛ́tɛku-ma litemi ni, ulu ɔmmɔ kani lɛlɔ na ɔdubɔsia ɔtɛku amii lɛnɔ litemi. 3"Anwuɔsu ni, tanu alakpi ani nkya ƒula ɔnwani anumi. Mmomu ka ligyuku lɛni nkya-a anumi bɔnu asa. 4Tasu ƒula ɔnwani anii, 'Ya na lidie-ɔ alakpi lɛnumi' na uwi ɔni na ligyuku lɛkya awɔ ɔlati lɛnumi. 5Awɔ, anumi lɛlɔ ukyuli, ka ligyuku lɛni nkya-a lɛnumi budie na ɔbla-a nwaa. Na anu edie alakpi ani nkya ƒula ɔnwani lɛnumi. 6"Bitebo ala ani nse kedee bitewi beƒiebuo. Si bíti bíte-ma ni, badubɔta bebeƒie-mii. Bitebo bina asɛɛ ebi ani náƒɔ kuye bitewi baplakuo, ɔsika badubɔnya-nya bakya aba. Katɔti muuti ala abuni teete bekyuli bani muuvele-nwu ala ammɔ. 7"Bivele Katɔti ala, na ɔdubuti-nya ute-mii. Bɛwia nwuna ala, na ɔdubɔya na bɛkɛ-nya. Bibo Katɔti kegbuta kɔnu na ɔdubɔlɛmi ute-mii. 8Ɔsika ukyuli biala ɔni muuvele Katɔti ala ni, ɔdubute-nwu. Na ukyuli biala ɔni mɔɔwia ni, ɔɔkɛ́. Na ukyuli biala ɔni muubó Katɔti kegbuta kɔnu ni, ɔɔlɛmi teete-nwu. 9"Ubi ɔti ɔdi uleti lɛtabi ulete ubidi si úye-nwu bodobodo. 10Na uleti kɔlakpi ulete-nwu si úye-nwu kabɛ. 11Ina ka bɛdi alaekpidi bablane muedi ni, bɛgyi kalɛ na biti ala abuni bite bina bebi. Anwuɔsu geen ni, Katɔti ɔni nse kedee ɔgyi kalɛ na uti ala abuni ute bekyuli bani muuvele-nwu utulo. 12Ala ani na aayɔ́ ka bekyuli bamba babla bete-ɔ ni, bla-nya te ama lɛnɔ lɛni kani. Ɔmɛni ndi Mose ɔda bubo ku Katɔti kenye bediene ala ani bátina kalɔ budie. 13"Bɛsia kayakun kani nse blii suɛ mmɔ biduo. Ɔsika si bɛ́sia kayakun kani nábɛbɛ na akɛ ulu ɔni nse buɛɛ lɛlɔ ni, adubuduo lɛgyavonku kemo. Na nwuna lɛlɔ na bekyuli pii bakɛ. 14Nsu kayakun kani ulu ntɛ késela ngba bɔni nsɔ naaadubo bɔsa kudii kemo ni, kese blii suɛ. Na ulu ɔni ntɛ úsela mmɔ uudé busie. Na bani mɔɔnu ulu ɔmmɔ beeemomo. 15"Bɛnu kaduɛ na ɔkɔ banyine bani nábla lɛlɔ aani Katɔti kenye bediene. Beebo-mii kudɔ aani baƒonu bani nse buɛɛ. Nsu na bana lɛlɔ kemo geen ni, badi begiti. 16Bana udu na bɛdubuti bɛti-ma. Lɛnyɛ kɔbuli kulánwu atoo. Na liyu kugyii kulánwu kɔyaka ebi. 17Kugyii kɔni nédie evete kaduɛ ni, kɔɔnwu ebi abuni. Na kugyii kɔni nátakana evete budie ni, kɔɔnwu ebi ekpidi. 18Kugyii kɔbuni kulánwu ebi ekpidi, na kugyii kukpidi kulánwu ebi abuni. 19Kugyii kɔdi biala na kulánwu ebi abuni ni, baadá-ku na beeti-ku taakya ogya. 20Anwuɔsu ni, ala ani na ɔkɔ banyine bani nábla lɛlɔ aani Katɔti kenye bediene baabla ndubɔya na bɛti-ma. 21"Ɔɔɔdi ukyuli biala ɔni mɔɔlɔ-mi ɔnii, 'Blɔti, Blɔti,' ndubuduo Katɔti Lɛga Kadikɔ. Mmomu bekyuli bani mɔɔbla mina Ɔti ɔni nkya katɔ lɛyɔla ndubuduo mmɔ. 22Na Katɔti litemi bɔtɛ limeyi ni, bekyuli pii badubɔsu-mi banii, 'Blɔti! Bɔ́su ƒula kenye na bɔ́gya ayu ekpidi na ƒula lɛnyi kemo. Na bɔ́bla akɔla budie taatina lidu lidu lɛnɔ na ƒula lɛnyi kemo.' 23Mmɔ na ndubɔsu-ma nnii, 'Lɛɛɛgyi-mii kula kula! Bɛtɔlɔ-mi kudɔ, amii bekyuli bekpidi.' 24"Anwuɔsu ni, ukyuli ɔni muunú mina etemila amɛni na ɔɔdi-nya lɛlɔ ni, ɔdi ɔnundane. Use aani ukyuli ɔni nátu nwuna ɔtɔ na lɛtakpɛ lɛlɔ. 25Ɔnantu ɔ́na na ntukpa búyi, na ɔƒɛƒɛɛ úkpo momoomo ɔ́siaku ɔtɔ ɔmmɔ. Nsu útaƒɛ, ɔsika ɔ́tu-nwu ɔ́lɛ lɛtakpɛ lɛlɔ. 26Nsu ukyuli ɔni muunú mina etemila na uládi-nya lɛlɔ ni, ɔdi ɔdɔlɔdi. Use aani ukyuli ɔni nátu nwuna ɔtɔ na kɔnwinimi lɛlɔ. 27Ɔnantu ɔ́na na ntukpa búyi, na ɔƒɛƒɛɛ úkpo momoomo ɔ́siaku ɔtɔ ɔmmɔ, na ɔ́ƒɛ butu butu." 28Ka Yesu ɔ́su ala amɛni ƒui ɔ́wɔlɔ ni, nwuna ala bɔtina bɔ́bla-ma dɛye dɛye. 29Kalɛ na ɔ́tina ala uuuse aani ɔda bubo ala batinane bani na bɔtɛya na bátɛya-nya kalɛ. Mmomu ɔ́tina ala ku ɔyikun aani ukyuli ɔni ndanku litemi lɛmmɔ úboku kalɛ.

will be added

X\