MATEO 5

1Na ka Yesu ɔ́nu bekyuli pii bani nsiaku-nwu ni, úsie kɔbi kɔdi lili na úlie kalɔ. Mmɔ na nwuna basiakune bákpɛ béde-nwu. 2Na úse kalɔ ɔɔtina bekyuli bammɔ ƒui ala ɔnini, 3"Lɛlɔ litaayɔ bekyuli bani nánu báti ka Katɔti lɛti lɛlɔ na basia anu. Ama ndubuduo Katɔti Lɛga Kadikɔ. 4Lɛlɔ litaayɔ bekyuli bani muuwulo kɔnyana. Katɔti ɔdubɔsia-ma kɔnu. 5Lɛlɔ litaayɔ bekyuli bani muuboku lɛlɔ kalɔ. Ama badubɔdi kayawi lɛlɔ ala aani kalɛ na Katɔti ɔ́su úse. 6Lɛlɔ litaayɔ bekyuli bani na anumi eegyie-ma ka belie siin na Katɔti anumi. Badubɔkɛ lɛla lɛni mayɔ-ma kaƒɔ. 7Lɛlɔ litaayɔ bekyuli bani mɔɔnu bana bekyulikpana kɔnyana. Katɔti ɔdubɔnu-ma kɔnyana. 8Lɛlɔ litaayɔ bekyuli bani kayi kemo nse nwaa. Ama ndubunye Katɔti anumi. 9Lɛlɔ litaayɔ bekyuli bani mɔɔklibi bekyuli ntɛ. Katɔti ɔdubɔlɔ-ma ɔnii nwuna bebi geen. 10Lɛlɔ litaayɔ ama bani na bekyuli beekpóku ka belie siin na Katɔti anumi ɔsu. Ama ndubuduo Katɔti Lɛga Kadikɔ. 11"Lɛlɔ litaayɔ-mii si bekyuli beedumi-mii na beekpóku-mii na baanyi ɔkɔ taasia-mii ka bɛsiaku-mi ɔsu. 12Ebiti ada-mii na lɛlɔ lɛnɔ lɛyɔ-mii, ɔsika bibo lɛyuƒɔla bonwu na katɔ. Lɛni kani na békpoku Katɔti kenye bediene bani nágyu batɔ-mii. 13"Amii nse aani mma bite bekyuli ƒui. Nsu si mma bɔmmɔ emini ása ni, ulu ɔdi uuubo ɔni na basɔ bakya-mu emini. Na ka kɔsia kɔdi kuuubo-mu lɛlɔ ɔsu ni, beebó-mu teewiakun na bekyuli banya-mu bavi. 14"Amii nse aani bukeye bite kayawi ƒui. Ɔma ɔni nsia kɔbi lili ni, ulabɛ. 15Ukyuli biala ulátu asogya teebi-nwu ala. Mmomu uuti taaƒala katɔ kalɛ na ɔdi biala nédu mmɔ ɔnu bukeye. 16Lɛni kani na ɔdi ka bina ablala ekeye aani asogya ute bekyuli. Na banu bina ala abuni aani bɛɛbla bati kalɛ na bemwi bina Katɔti. 17"Bitakali bɛnii líbo nnii mbada Mose ɔda bubo ku ala ani na Katɔti kenye bediene bátina lidie. Ńtebo nnii mbada-nya lidie munu munu. Mmomu ni, líbo kalɛ na ala ani bátina mmɔ ebo ete lɛni. 18Na mɔɔyá na bɛti geen ka ni, na katɔ ku kalɔ anumi ni, balada lɛla linwi ina dɛ na lise blii suɛ muedi beledie na ɔda bubo bɔmmɔ kemo wetédu ka ala ani na ɔda bubo bɔmmɔ bɔɔtina búbo búte lɛni. 19Anwuɔsu si ukyuli ɔdi ɔ́ta unye ɔda bubo bɔmɛni lɛlɔ na ɔ́tina bekyuli bamba lɛnɔ ɔnii babla lɛni ni, balabu-nwu na Katɔ Ɔga Ɔma. Nsu ukyuli ɔni madi ɔda bubo bɔmɛni lɛlɔ na watina bekyuli bamba lɛnɔ ɔnii babla lɛni ni, badubɔbu-nwu geen na Katɔ Ɔga Ɔma. 20Anwuɔsu mɔɔsu-mii nwaa nnii asa na bɛdubɔkana na biduo Katɔ Ɔga Ɔma ni, ɔdi ka bilie siin kalɛ na Katɔti ɔɔwia bitulo ɔda bubo ala batinane ku Ƒarisiƒuɔ. 21"Kuuku ni, bínu ka básu bekyuli banii, 'Tadu ukyuli.' Na ukyuli ɔni mabla lɛni ni, ɔlɛka batɛku-nwu litemi. 22Nsu ɔƒɛni ni, ami mɔɔsu-mii nnii ukyuli ɔni meti kɔnyi makya ɔnwani ni, badubɔtɛku-nwu litemi. Na ukyuli ɔni lɛnɔ masu ɔnwani ɔnii, 'Aaadi ukyuli ɔdi' ni, badubɔlɔ-nwu benengu anumi. Na ukyuli ɔni masu ɔnwani ɔnii, 'Ɔdɔlɔdi na adi' ni, Katɔti ɔdubɔni-nwu kɔtu na lɛgyavonku lɛmmɔ kemo. 23Anwuɔsu si anii eeti etela esienku Katɔti na nwuna lɛkpabi lɛlɔ na ényimo ka ƒ^ɔnwani ɔda-a kaƒɔ ni, 24da etela ammɔ se lɛkpabi lɛmmɔ anumi na esie kɔnakunwi na awɔ ku ƒ^ɔnwani biwi kenye ntu asa na ebo ebeti etela ammɔ akpa ete Katɔti. 25"Si ukyuli ɔdi ɔnii uuti-ɔ usienku litemi katɛkɔ ni, wia uwi na awɔ ku-nwu bɛka-ni bɔklibi. Si ɔɔɔdi lɛni asa na bísie bítéduo litemi katɛkɔ mmɔ ni, ukyuli ɔmɛni ɔdubuti-ɔ ute litemi ɔtɛne. Na anwu lɛnɔ ɔdubuti-ɔ ute beƒiene na bakya-a ɔtɔ. 26Na mɔɔsu-ɔ nwaa nnii adubɔkya mmɔ utálɛ uwi ɔni na áƒɔ kayu kani na ada ƒui áwɔlɔ. 27"Bínu ka básu banii, 'Bagya ku bele batadi kɔsɔnɔ.' 28Na ami mɔɔsu-mii nnii ɔnana ɔni manu uleku ɔbambadi na wada-nwu ɔkwɛ ni, ɔ́bla likpidi na nwuna kayi kemo. 29Anwuɔsu si ƒula kɔdianu lɛnimi lɛɛyá na aabla likpidi ni, die-ni vaakun. Ɔdia ute-ɔ ka ƒula lɛlɔ kakɛ kadi kayii utulo si Katɔti úti awɔ ukyuli umodi ɔmmɔ ƒui ɔ́kya lɛgyavonku kemo. 30Na si ƒula kɔdianu kɔnu mɔɔyá-a na aabla likpidi ni, kulo-ku vaakun. Ɔdia ute-ɔ ka ƒula lɛlɔ kakɛ kadi kayii utulo si Katɔti úti awɔ ukyuli umodi ɔmmɔ ƒui ɔ́kya lɛgyavonku kemo. 31"Básu banii, 'Ɔnana biala ɔni manyonu ulekudi ni, ute-nwu ɔku ka ɔ́nyonu-nwu.' 32Nsu ami mɔɔsu-mii nnii si ɔnana ɔdi ɔ́nyonu ulekudi ɔni na ɔɔɔdi kɔsɔnɔ na ɔ́di ni, ɔnana ɔmmɔ náya na ɔ́di kɔsɔnɔ. Na ɔnana ɔni meti uleku ɔmmɔ lɛnɔ ɔ́di kɔsɔnɔ. 33"Kuuku ni, bínu lɛnɔ ka básu bekyuli banii, 'Bitalɛ kenye kani bíse kama. Na bɛbla bɛsia kenye kani na bise bite Blɔti lɛlɔ.' 34Nsu ɔƒɛni ni, ami mɔɔsu-mii nnii bitakpali ala si biisé kenye kadi. Bitakpali ala bitalɔ katɔ, ɔsika mmɔ ndi Katɔti lɛgaboku. 35Bitakpali ala bitalɔ kalɔ, ɔsika aka ndi Katɔti lɛgba kanyakɔ. Na bitakpali ala bitalɔ Yerusalem, ɔsika mmɔ ndi Katɔ Ɔga Ɔyikune Ƒui ɔma. 36Na bitakpali ala na bɛlɔ bina lili, ɔsika biiibo ɔyikun na bɛya na bina lili linwini lɛƒuala iye lɛnwu. 37Bɛya na bina ɛɛn ɔbla ɛɛn, na bina oowo ɔbla oowo. Si bíti lɛla bamba bíbunku ɔmɛni lɛlɔ ni, na ɔmmɔ ɔdi ukisine ɔmmɔ ablala. 38"Binu ka básu banii, 'Si ábwɛ ƒula ukyulikpana lɛnumi ni, babwɛ awɔ lɛdi lɛnɔ. Na si áƒɛ ƒula ukyulikpana lɛnyi ni, baƒɛ awɔ lɛdi lɛnɔ.' 39Nsu ɔƒɛni ni, ami mɔɔsu-mii nnini, bitedie bina bakpana ekpidi ani na bábla-mii kasi. Si ukyuli ɔdi ɔ́ƒiɛmi-ɔ kɔdianu ɔtugya ni, nwini kɔmii ɔdi lɛnɔ te-nwu. 40Na si ukyuli ɔdi ɔɔwia-a katɛ ɔnii ɔɔƒɔ́ ƒula awu ɔtɔdi ni, die ɔni na akya ewi-nwu lɛlɔ lɛnɔ te-nwu. 41Na si bekpone akɔ ɔdi únye-ɔ lɛlɔ ɔnii tiku-nwu etila na bisie liluku linwi ni, awɔ sie anyɔ. 42Si ukyuli ɔdi úye-ɔ lɛla lɛdi ni, te-nwu. Na si kevokɔ na ɔdi lɛnɔ uye-ɔ ni, na ete-nwu. 43"Bínu ka básu banii, 'Bɛyɔ bina bekyulikpana na bini bina bekisine!' 44Nsu ɔƒɛni ni, ami mɔɔsu-mii nnii bɛyɔ bina bekisine na bɛkpali katɔ bite bekyuli bani muukpóku-mii. 45Na bɛdubunwini Katɔti ɔni nkya katɔ bebi geen. Ɔsika ɔɔyá na nwuna ɔƒɛ ɔɔlɛ́ teewi bekyuli bekpidi ku babuni ƒui lɛlɔ likeke. Na ɔnantu lɛnɔ ɔɔna teete bekyuli bani mɔɔbla ala abuni ku bani mɔɔbla ekpidi. 46Si bekyuli bani mɔɔyɔ́-mii kani na amii lɛnɔ bɛɛyɔ́ ni, Katɔti ɔɔɔdubo-mii kayu kadi bɔƒɔ. Lɛni kani na kuyi baƒɔne lɛnɔ baabla. 47Na si bina bakpana lɛti na biigyele ni, bítabla lɛla lɛdi bítagya. Ama bani naaadi baƒɔtaadine muedi ni, baabla lɛni. 48Bɛbla sɛɛn aani kalɛ na bina Ɔti ɔni nkya katɔ use sɛɛn.

will be added

X\